Peterin kebai a sukdam
3
1 Chawhnung dar thum trongtrai hun pangngaiah Peter le Johan chu Tempulah an hang fe a. 2 Pa pakhat, a pieng tira inthoka kebai hi an hung zawn a, ama chu Tempula fehai kuoma kut lo daw dingin kotkhar ‘Mawi’ an ti bula chun ni tin an sie hlak a. 3 Ama chun Peter le Johan, Tempula an lut tawm trĕp chu a hmu a, kut a lo daw a. 4 Peter le Johan chun ama chu chieng takin an en a. Peter chun a kuomah, “Mi hang en ta” a ta. 5 Ama chun iemani dong beiseiin a hang en a. 6 Peter chun, “Tangka le rangkachak ka nei nawh. Nisienlakhom, ka nei ve chu pe’ng ka ti che: Nazaret Isu hmingin lâwn ta rawh” a ta. 7 A kut chang tienga chelin a keitho a, a ke le a kemithai chu an hung hrăt ta nghal a. 8 Chuongchun, ama chu a’n chawm tho a, kein a ngîr a, a lawn tah a. Lawn le inchawm pei puma Pathien inpâkin Tempula chun anni ruolin a lut ve tah a. 9 Mipui po poin kea a lawn le Pathien a’n pak an hmu chun, 10 Tempul kotkhar Mawi bula kutdaw inthrung hlak kha a nih ti an hriet a, a chunga thil tlung chu maktiin a ngaina hrim an hriet nawh.Solomon tuolpŭka Peter thu hril
11 Chun, ama chun Peter le Johan a la chel zing laiin mipui makti chu Solomon tuolpŭk an tia chun an hung tlăn khawm a. 12 Chu chu Peterin a hmu chun an kuomah, “Israel mihai, hi hi ieng leia mak in ti? Hi pa hi kan lunginsiet leia kan thilthawtheinaa kan inlăwntir anga ngai ni awm hiela ieng dinga in mi en am a na? 13 Abraham Pathien, Isak Pathien, Jakob Pathien, ei thlatuhai Pathien chun a siehlaw Isu a chawimawi tah a ni hi. Ama chu sukhlum dingin in pĕk suok a, Pilatin insuo dinga a rĕl khomin in hnâwl tlat a ni kha. 14 Mi thienghlim le fel tak kha in hnawl a, suomhmang insuopek lem dingin in ngĕn a. 15 Hringna petu chu in that a, nisienlakhom Pathienin ama chu mithi laia inthokin a keitho nawk tah a, chu thu hrepuituhai chu kan nih. 16 Hi pa, in hmu le hriet hlak hi Isu hming ringna leiin, chu hming lei tak chun sukhrâtin a um a, Isu ringna lei chun, hi pa hi in hmu ngeiah, a hung dam ta var a ni hih.
17 “Tuhin unauhai, nangni le in hotuhai thilthaw kha thil in hriet naw lei a nih ti ka hriet. 18 Kristan a tuor ding thu Pathienin zawlnei po po hmanga a lo hril lawk kha hieng ang hi a lo intlungtir dan chu a nih. 19 Chuleiin, in suolhai sim unla, Pathien tieng ngha kîr unla, chuongchun in suolhai chu hru fâi a ta, 20 Lalpa kuoma inthoka har tharna hun chu hung tlung a ta, in ta dinga Mesia a ruot, Isu ngei chu, hung tir a tih. 21 Amiruokchu, Pathienin a zawlnei thienghlimhai hmanga tiena inthoka iengkim siem tharna hun hung tlung ding a lo tiem chu a tlung hma chun ama chu vanah a um hri ding a nih. 22 Mosie khomin, ‘Lalpa in Pathien chun keima ang in unauhai laia inthokin zawlnei pakhat in ta dingin hung indin suok a ta, a hril taphot chêu chu zawm ro. 23 Tu khom ama thu ngai nawtu taphot chu a mihai laia inthoka săt thlâk ning a tih’ a ti kha. Deut 18:15, 18, 19 24 Samuel le a hnunga zawlnei po po khom khan tu lai chanchin hi a nih an lo hril lawk chu.
25 “Nangni hi zawlneihai le in thlatuhai kuoma Pathienin thu a lo thlung tahai po po rochungtu chu in nih. Abraham kuomah, ‘I thlaa chun khawvel hnam tinin hamthratna dong an tih’ a ti kha. 26 Chuongchun, Pathienin a siehlaw a hung indin a, rîtlona lampuia inthoka thruoi kîr ding chêu le malsawm ding chĕuin in kuomah a hung tir hmasa a nih” a ta.