7 Chuleiin, an kuomah Isun a hril nawk a. “Thu dik tak ka hril chêu hi. 8 Kei hi beram kotkhăr chu ka nih. Ka hmaa hunghai po po kha rûkru le suomhmang vong an nih; sienkhom beramhaiin an rawl an ngaithlak nawh.

9 “Kei hi kotkhăr chu ka nih; tu khom keimaa lût taphot chu him a ta, lûtin suok a ta, tlatna hmun thra hmu bok a tih. 10 Rûkru chu inru ding dam, sukhlum ding dam le sukse ding dam chauin a hung a; kei ruok chu hringna an neina ding le tam tak an neina dinga hung ka nih.

11 “Kei hi berampu thra ka nih; berampu thra chun beramhai ta dingin a hringna a pêk hlak. 12 Inhlawfa, berampu tak ni lo, beram neitu ni bok lo chun satene hung a hmu pha beramhai chu a tlănsan a, satenein beramhai chu a se a, a sukdar hlak. 13 Inhlawfa a ni leiin a beramhai a ngaisak naw a, a tlănsan hlak. 14 Kei hi berampu thra ka nih; ka beramhai chu ka hriet a, ka beramhai khomin an mi hriet, 15 Pain a mi hriet ang le keiin Pa ka hriet ang hin; chun, an ta dingin ka hringna ka pêk bok. 16 Hi beram huonga mi naw khom hi beram dang ka nei. Anni khom la hung thruoi ngei ka tih. Ka rawl ngaithlang an ta, beram ruol khat ni ta’ng an ta, a vêngtu pakhat leh. 17 Lăk nawk dinga ka hringna ka pêk ding lei hin Pain a mi hmangai a nih. 18 Tu khomin mi lapêk naw nih, keia nuom thuin ka pêk ding a ni lem. Pe thei ka na, la nâwk thei khom ka nih; hi thupêk hi ka Pa kuoma inthoka ka hmu a nih” a ta.

19 Chuong thu lei chun Judahai lai inthrĕna a suok nawk a. 20 Anni laia mi tam takin, “Ama hi ramhuoi zâwl, mi invêt letdĕr a ni hi; ieng dinga a thu in ngaithlak?” an ta. 21 Threnkhatin, “Hieng ang thu hi ramhuoi zâwl thu ni thei naw nih. Ramhuoiin mitdel mit a sukvar thei am a ni?” an ta.

22 Thlasik lai, Jerusalemah Hlănthar Kût^a an hmang laiin, 23 Isu chu Tempula Solomon Tuolpŭka chun a’n văk vĕl a. 24 Judahai chun an hung bawr a, “Ieng chen am lungawpinkaiin i mi sie ding a na? Krista i ni chun chieng takin mi hril el rawh” an ta.

25 Isun a don a, “Ka hril ta chêu a, in awi si nawh. Ka Pa hminga thilmak ka thawhai khan ka chanchin a’n hriettir a nih. 26 Nisienlakhom, in awi si nawh, ka beram laia mi in ni naw leiin. 27 Ka beramhai chun ka rawl an hriet a, an mi zui hlak; 28 an kuomah chatuon hringna ka pêk a, kumkhuoin thi naw ni hai; tu khomin ka kuta inthokin inchŭ thla thei bok naw ni hai. 29 Anni mi petu ka Pa chu iengkim nĕka ropui lem a nih; ka Pa kuta um chu tu khomin an lăk hmang thei bok nawh. 30 Kei le Pa chu pumkhat kan ni si a” a ta.

31 Judahai chun ama dêngna dingin lung an rŭt nawk a. 32 Isun an kuomah, “Paa inthoka suok thilmak ropui tak tak ka’n entir chêu a, a ieng lei tak khan am mi dĕng in tum a na?” a ta. 33 Judahai chun, “I thilmak thaw leiin lungin dĕng che kan tum nawh. Pathien i hrilsiet a, nang mihriem ve el bok si, Pathiena i’n săl lei lem a nih” an ta.

34 Isun a don a, “In Dan lekhabuah “Pathienhai in nih, ka tih” ti ziek a ni naw’m a ni? 35 Pathien thu tlungnahai hman Pathienhai ti an ni chun (Pathien lekha thu chu hnawl thei a ni si naw a), 36 Pathienin a ser hrang, ‘Pathien Naupa ka nih’ ka ti leiin, khawvela Pathien mi tir kei hin ‘Pathien a hrilsiet’ in ti maw? 37 Ka Pa sin ka thaw a ni naw chun mi ring naw ro; 38 ka thaw ruok chun kei mi ring naw unla khom, ka sinthaw bek chu ring ro; Pa chu Keimaah a um a, kei Paah ka um ti in hriet a, in chieng theina dingin” a ta. 39 Chuongchun, ama chu man an tum nawk a, sienkhom an man phak lo dingin a’n rel hmang a,

40 Jordan râl, Johanin kha hmaa baptisma a’n changtirna hmuna khan a fe a, chu taka chun a um ta zing a. 41 Mi tam tak a kuomah an hung a, “Johanin inchikna thilmak ieng khom a thaw nawh, amiruokchu Johanin hi pa chungchang a hril taphot kha a lo indik vong a ni hi” an ta. 42 Chu hmuna chun mi tam takin ama chu an ring tah a.