Sum enkoltu depde
16
1 Chun, a zirtirhai kuomah, “Mi hausa pakhatin sum enkoltu a nei a, chu pa chun a sum a sukriral mei mei a nih tiin an hĕk a. 2 Mi hausa chun ama chu a ko a, “I chungchang thu ka hriet hi iem an ta leh? I sum enkol ziekna bu chu hung la rawh; sum enkoltuah thrang thei ta naw ti nih” a ta. 3 Sum enkoltu chun a lungrilin, “Ka puin ka sina inthoka a mi băn ta si chun iem thaw ta’ng ka ta? Hnuoi cho hlak chu ka thâin a tlin si naw a, kut daw hlak chu ka’n zak bok si. 4 Ka sina inthoka a mi băn hnunga mihaiin an ina an mi’n umtirna dingin thaw dan ka hriet tah’ a ta. 5 Chuongchun, a pu sum battuhai chu pakhat khatin a ko tawl a, a hmasa tak kuoma chun, ‘Ka pu sum ieng zat am i bat?’ a ta. 6 Ama chun, ‘Oliv hriek gallona zariet’ a ta. Sum enkoltu chun, ‘I bat inchikna lekha hi la la, inthrung la, gallon zali tiin ziek nghăl rawh’ a ta. 7 A pahnina kuoma chun, ‘Nang ieng zat am i bat?’ a ta, ama chun ‘Bu trîn sang khat’ a ta. Sum enkoltu chun, ‘I bat inchikna lekha kha hung la la, trîn zariet tiin ziek rawh’ a ta. 8 A pu chun sum enkoltu mi depde dawha thratzie chu a’n pak a; var nauhai nĕkin tu lai mihai hi khawvel thila chu anni thrang le indawr ding chun an verther lem hrim a nih. 9 Ka hril chêu hi, khawvel hausakna hmangin in ta dingin ruol siem ro, sum a ral pha chatuon ina lawm lut in ni theina dingin.Sum hmang thrat dan
10 “Tlawmte chunga ringum chu tam tak chunga khom a ringum hlak; tlawmte chunga ringum lo chu tam tak chunga khom a ringum ngai nawh. 11 Khawvel sum le pai chunga hman in ringum naw chun tuin am hausakna tak tak lem chu inkoltir ngam an ti chêu a? 12 Mi dang ta chunga hman in ringum naw chun nangni ta ding lem chu tuin am peng a ti chêu a? 13 Siehlaw tu khomin hotu pahni rong a bawl kop thei nawh; pakhat theidain a dang chu a dit amanih ning a ta, an naw leh pakhat chu ngainain a dang chu a hnăm amanih ni’ng a tih. Pathien rong le sum rong in bawl kop thei nawh” a ta.
Isu thuhril dang threnkhat
14 Sum ngainatu Farisaihaiin chu chu an hrietin Isu an nuisaw a. 15 Ama chun an kuomah, “Mihai mithmua mi fel anga intâr lang mei mei in na, in lungril sung ruok chu Pathienin a hriet. Mihriemhai ngaisang zawng hi Pathien mitah chu tirdakum a nih. 16 Johan a hung chen khan Dan le Zawlneihai thu kha hmang ding a na, a hunga inthok ruok chun Pathien ram Chanchin Thra hi hril dar a ni ta thung a, mi tinin chu taka chun lut tumin an baw huoi huoi a nih. 17 Nisienlakhom, Dan thu sunhang chikte khom a bo nêk chun hnuoi le van bohmang ol lem a tih.
18 “Tu khom a nuhmei maa nuhmei dang nei taphot chu a uirĕ a na, mi nuhmei măk nei taphot khom a uirĕ a nih.
Mi hausa le Lazar
19 “Mi hausa pakhat, puon senduk le puon zai inhmia inthuom, ni tin inhoi taka khawsa hlak a um a. 20 A kotkhar bula chun kutdaw pakhat a hming Lazar, pânin a bawm sip chu a zâl a; 21 mi hausa dawkana inthoka a fak nawi tla chu fâk a châk thei hle a. Uihaiin a pânna chu an hung liekpek hlak a. 22 Kutdaw thi hun a hung tlung chun vantirkohaiin an thruoi a, Abraham angsungah an sie a. Mi hausa khom chu a thi a, an phûm a. 23 Hremhmuna na tuora a’n rûm lai chun a hang en a, hla taka Abraham angsunga Lazar inthrung chu a hang hmu a. 24 ‘Pa Abraham, mi lunginsiet la, Lazar kha hung tir rawh, a kutpar hmawr tuiah inchie sien, ka lei hi hung dep dei raw se, hi mei choka hin ka na êm ĕm a nih’ a ta.
25 “Abraham ruok chun, ‘Ka naupa, nangin i dam laiin thil thrâ ngot i chang a, chuong ang bokin Lazarin thil thra naw ngot a chang kha hre zing ta la; tu ruok hin chu ama chu thlamuong takin hi taka hin a um a, nang chu i nâ a ni kha. 26 Chu bâkah, hi taka inthoka nangni kuoma hung tum le kha tienga inthoka keini kuoma hung tumhai an infe paw thei nawna dingin chadan inthuk tak ei inkarah a um a nih’ a ta.
27 “Ama chun, ‘Chuong an leh Pa, Lazar chu ka pa ina bek infetir dingin ka ngĕn che. 28 Piengpui pasal panga ka nei a, hi hremna hmuna hin an hung ve nawna dingin zu hril tawl raw se’ a ta. 29 Abraham ruok chun, ‘Mosie le zawlneihai an nei annawm, chuonghai thu chu ngai raw hai se’ a ta. 30 Ama chun, ‘Ni lo e, Pa Abraham, mithi laia mi meuh an kuomah fe sien chu sim an tih’ a ta. 31 Abraham chun, ‘Mosie le zawlneihai thu an bengkhon naw chun, mithi laia inthoka tho nawk thu khom awi chuong naw ni hai’ a ta” tiin a hril a.