Thieng le thieng naw thu
7
1 Farisaihai le Dan zirtirtuhai laia mi threnkhat Jerusalema inthoka hunghai chu Isu kuomah an hung a, 2 a zirtirhai laia threnkhatin kut sawp loa bu an fak chu an hmu a. 3 Farisaihai le Juda mi po po chun an upahai chìng dan chel tlatin an dàn anga kut an sawp zet naw chun bu an făk ngai nawh. 4 Bazar hmuna inthoka an hung kǐr khomin an insawp zet naw chun thil an făk ngai nawh. Chǐng dan tam tak an zawm laia thrang sa ve chu no hai, tuibêl hai, ketli hai le bu fakna dawkan hai sawp a nih.5 Chuongchun, Farisaihai le Dan zirtirtuhai chun Isu kuomah, “Ieng dinga i zirtirhaiin upahai chǐng dan zawm ve loa kut sawp loa bu an fak hlak am a na?” tiin an indon a. 6 Ama chun, “Isaiin nangni lemderhai chungthu a ziek kha a lo indik ngot el:
‘Hienghai rawi hin bauin an mi’n pâk a,
An lungril ruok chun an mi hlat hle si;
7 Thuringah mihriem thu an inchuktir a,
An mi chawibiek khom hi a thlawn el a nih’
ti hi” a ta.
8 Chun, ama bokin an kuomah, “Pathien dan thupêkhai hnâwlin pipu chǐng dan in chel a. 9 In chǐng dan in vong theina dinga Pathien dan thupêkhai hnăwl dan chu in thiem khop hi! 10 Mosien, “I nu le pa chawimawi rawh, tu khom a nu le pa hrilsetu chu sukhlum ngei ding a nih” a ta. 11 Nangni ruok chun in nu le pahai kuomah, ‘Ka thâ i sor ding kha Korbana a ni tah’ in ti chun, 12 a nu le pain a thà an sor ding in phal ta ngai nawh. 13 Pipu chǐng dan in inhlăn sawng pei chun Pathien thu chu iengma loah in siem a, chuong ang thil tam tak chu in thaw hlak” a ta.
14 Chuongchun, mipuihai chu a ko khawm nawk a, “Mi tinin ka thu hi ngaithla seng unla, hre chieng ro. 15 Puo tienga inthoka mihriem sûnga lût chun ama a sukporchè thei nawh. Chu nêk hmanin, mihriem sûnga inthoka suok hin a nih mi a sukporchè hlak chu. 16 Tu khom hrietna dinga na nei chun ngaithla ngun raw se” a ta.
17 Mipuihai chu a maksan a, inah a lut hnungin a zirtirhaiin tekhinthu chu an indon chieng a. 18 Ama chun, “Nangni khom chuong lawm chun in lo mawl ve a ni maw? Ieng khom puo tienga inthoka mihriem sûnga lûtin ama a sukporchè thei nawh. 19 A san chu a lungrilah lût loin a phǐngah a lût a, an hnăwm suok nawk el a nih. (Hi hi iengkim fak a thieng thu a hrilna a nih). 20 Sûnga inthoka suok hi a nih mihriem sukporchètu chu. 21 Sûnga inthok, mihriem lungrila inthoka suok chu ngaituona suol dam, inngaina suol dam, rûkrŭkna dam, tuolthatna dam, uirĕna dam, 22 duâmna dam, theidăna dam, hlĕmna dam, hurna dam, îtsǐkna dam, inhril sietna dam, chapona dam le intlâwkna dam a nih. 23 Chuong ang suol chu sûnga inthokin a hung suok a, mihriem a sukporchè hlak” a ta.
Jentel nupui ringna hau
24 Chu hmun chu a suoksan a, Tura le Sidon bielah a fe a, in pakhatah a lût a, a hung thu tu hriet khom a nuom naw a, sienkhom a’n thup thei si nawh. 25 Nuhmei pakhat, a naunu ramhuoi tirdakum pai chun a chanchin a hriet charin a hung pan a, a ke bulah a bokkhup a. 26 Ama nu chu Grik mi, Suria Foiniki-ab pieng a na. A naunu sunga inthoka ramhuoi hnot suokpek dingin Isu a ngĕn a. 27 Isu chun a kuomah. “Nauhaiin fa khop hmasa phot raw hai se. Nauhai bei lakpeka uihai kuoma pêk chu a’n dik nawh” a ta. 28 Ama nu chun, “Lalpa, ni chu ni e, sienkhom dawkan hnuoia uihai khomin nauhai bei nawi tla chu an fak hlak tho annawm” a ta. 29 Isun, “I thu hril lei tak chun kîr nawk ta la, ramhuoi chu i naunu sunga inthokin a suok tah” a ta. 30 Chuongchun, inah a kîr a, ramhuoiin a suoksan, khuma zâl a naunu chu a hmu a.
Nasêt le trong thei lo a sukdam
31 Chu zoah Isu chun Tura biel a suoksan a, Sidon pal tlanga Galili dǐlah trum thlain, Dekapoli biel a tlung a. 32 Mi pakhat, nasêt le trong fel thei lo hi a kuomah an hung thruoi a, a chungah kut innghat dingin an ngĕn a. 33 Isun ama chu mipui sirah a kei bing a, a kutpărin a nakuo a khîkpek a, chil a sâk a, a lei a thempek a. 34 Van tieng nghaa inthuok huoiin, “Effata” a ta, chu chu “Lo inhong ta rawh” tina a nih. 35 Chu phing leh a nâ a hung inhong a, a lei inkhuop khom chu a hung insŭt a, fie takin a hung trong thei tah a.