Thieng le thieng naw
15
1 Chuong lai chun Jerusalema inthokin Farisaihai le Dan zirtirtuhai chu Isu kuomah an hung a, 2 “Ieng leia i zirtirhaiin upahai thurosie an bawsiet hlak am a na? Bu an fak hmain kut an sawp ngai nawh” an ta. 3 Isun a don a, “Nangni khomin in pipu thurosie leiin ieng dinga Pathien thupek in bawsiet? 4 Pathien thupek chun, ‘I nu le pa chawimawi rawh; mani nu le pa trong sie inphurtu chu sukhlum ngei ding a nih’ a ta 5 Nangni ruok chun, ‘Tu khom a nu amanih a pa amanih kuomah, ka thâ i sor ding po po chu Pathien ta dinga pèk a ni tah titu chun a nu le pa a chawimawi a ngai ta nawh’ in ti hlak. 6 Chuongchun, in thurosie lei hin Pathien thu chu iengma loah in inchangtir a ni hi. 7 Lemderhai, Isaiin in chungthu a lo hril indik ngot el:8 ‘Hienghai rawi hin bauin an mi’n pàk a,
An lungril ruok chun an mi hlat hle si;
9 Thuringah mihriem thu an inchuktir a,
An mi chawibiek khom hi a thlawn el a nih’
ti hi” a ta.
Mihriem sukporchĕtu
10 Isun mipuihai chu a ko a, an kuomah, “Ngaithla unla, hre fie ro. 11 Baua lûtin mihriem a sukporche naw a, baua inthoka suokin, chu ngei chun a nih mihriem a sukporche lem hlak” a ta.
12 Chuong lai chun a zirtirhai chu a kuomah an hung a, “I thu hril khan Farisaihai nàk a kal hle ti i hriet am?” an ta. 13 Isu ruok chun, “Ka Pa vana miin a phun naw chu ieng kûng khom a zung puma phawi vong ni’ng a tih. 14 Anni rawi hi ûksak naw ro, thruoitu mitdel an nih. Mitdelin mitdel bok a thruoi chun khurah tla rĕl an tih” a ta.
15 Peterin a kuomah, “Tekhinthu kha mi hrilfie tawl ta la” a ta. 16 Ama chun, “Nangni khom chuong khop chun in lo chawlol ve a ni maw? 17 Băua lût taphot chu phingah a lût thla a, inhnawm pha a suok nawk vong hlak an naw maw? 18 Băua inthoka suok ruok chu lungrila inthoka hung suok a na, chu ngei chun mihriem a sukporchè a nih. 19 Lungrila inthoka suok chu ngaituona suol dam, tuolthatna dam, uirĕtna dam, inngaina suol dam, rûkrŭkna dam, khêla inhêkna dam le Pathien hrilsietna dam hi a nih. 20 Chuonghai chu mihriem sukporchĕtu an na, kut sawp loa bu fak ruok hin chu mi a sukporchĕ nawh” a ta.
Kanan nu ringna
21 Chu hmun chu maksanin Isu chu Tura le Sidon bielah a fe a. 22 Chu lai mâ chun a ram mi Kanan nuhmei pakhat hi a kuomah a hung a, “Lalpa, Davida Naupa, ramhuoiin ka naunu inrim takin a soisak a, mi lunginsiet hrăm rawh” tiin a khêk a. 23 Isu ruok chun bau khat khomin a don nawh. A zirtirhai chun, “Ei hnungah a khêk a khêk el si a, tir hmang el rawh” tiin an ngĕn a. 24 Ama chun, “Israel hnam, beram inhmanghai laia chauh tir ka nih” a ta. 25 Sienkhom nuhmei chun a hung hnai a, a hmaah dingthrathruonin, “Lalpa, mi thrangpui rawh” tiin a ngèn a. 26 Isu chun, “Nauhai bei lakpek a, uihai kuoma pek chu thil âwm a ni nawh” a ta. 27 Nuhmei chun, “Ni e, Lalpa, sienkhom uihai khomin an puhai dawkana bei nawi tla chu an fak hlak tho annawm” a ta. 28 Chu phing leh Isun, “Nuhmei, i ringna hi a nasa ĕm a, i dit ang takin i chungah tlung raw se” a ta. Chuongchun, a naunu chu chu darkar lá là chun a hung dam ta a.
Mi tam tak a sukdam
29 Chu taka inthoka Isu a suok chun Galili dil kam hrûlah a fe a; chun, tlangah a kai a, a’n thrung a. 30 Mipui tam tak a kuomah an hung a, kebaihai, mitdelhai, piengsuolhai, trong thei nawhai le mi dang tam tak an hung thruoihai chu a ke bulah an hung sie a, ama chun a lo sukdam tawl a. 31 Trong thei nawhai trong thei a, piengsuolhai hung thra a, kebaihai lawn a, mitdelhai mit a varzie hmutu mipui chun mak an ti ĕm êm a, chuongchun Israel Pathien chu an inpàk a.
Mipui sangli hrai
32 Isun a zirtirhai chu a ko a, “Mipuihai hi ka lunginsiet èm êm a, ka kuomah ni thum zet an um tah a, fak ding ieng khom an nei si naw a, lampuiah trâmsawl el thei an ni leiin phingtrâma inlawitir ka nuom nawh” a ta. 33 Zirtirhai chun, “Mipui hieng zozai hraina khop hieng ang hmun thlalera hin khaw lai am bei hmu tang ei ta?” an ta. 34 Isun, “Bei phek ieng zat am in nei a?” a ta. Anni chun, “Phek sari le ngate tlawmte leh” an ta.
35 Isun mipuihai chu hnuoia inthrung dingin thu a pêk a, 36 bei phek pasari le ngate hai chu a lâk a, mal a sawm zoin a khoi a, zirtirhai a pêk a, zirtirhai chun mipui lai an sem a. 37 An rêngin tlai takin an fak a, an fak mahla zirtirhaiin an rùt khawm chu bawm sari sip a nih. 38 A fatuhai chu nuhmei le naupang tiem loin patling ngot khom sangli an nih. 39 Isun mipui a’n trîntir hnung chun longah a chuong a, Magadana bielah a fe tah a.