Khawsak mivarhai
2
1 Lal Heroda inlal laia Judai ram Bethlehema Isu a hung pieng chun, khawsak tienga inthokin mi varhai Jerusalem-ah an hung a. 2 “Judahai lal hung pieng chu khaw lai am a um a? Khawsak tieng a arasi kan hmu a, ama chawibiek dingin kan hung a nih” an ta.3 Lal Heroda’n chu thu a hriet chun a lungzîng hle a, Jerusalem mi po po khomin an lungkham a. 4 Chuongchun, thiempu lalhai le Dan zirtirtuhai chu a ko khawm a, Krista piengna ding hmun chu a’n don a. 5 Anni chun, “Judai ram Bethlehem khuoa pieng ding a ni thu hieng ang hin zawlneiin a ziek:
6 Nang Bethlehem, Judai rama mi,
Judai rama roreltuhai lai hin,
I chîn tak naw top,
I sunga inthokin rorêltu,
A hung suok ding a ni si a,
Ka mi Israelhai optu ding chu”
an ta.
7 Chuongchun Heroda chun mi varhai chu a rûkin a ko a, arasi hung inlang hun chu ngun takin a’n don a. 8 Bethlehem tieng chun a’n fetir a, “Fe unla, naute thu chu ngun takin hung indon suok ro. In hmu charin mi hung hril unla, kei khoma ka chawibiek ve theina dingin” a ta.
9 Lal thu an hriet hnung chun an fe pei a, khawsak tienga arasi an hmu khan naute umna chung zawn a tlung chenin an hma a thruoi a. 10 Arasi chu an hmuin an hlim êm êm a. 11 In sungah an va lut chun Mari le a naute chu an hmu a, hnuoi sikin an chawibiek a; an robawmhai hongin, thilpêk rangkachak dam, beraw dam, mura dam an pêk a. 12 Heroda kuomah kir nawk ta lo dinga an manga hrilh an ni leiin an ram panin lampui dangah an kîr nawk ta a.
Aigupta ramah an tlàn
13 Mi varhai an kir hnungin, Lalpa vantirko chu Josefa mangah an lâr a, “Tho la, naute le a nu thruoi la, Aigupta ramah tlân rawh; ka hril nawk hmâ khat che chu taka chun um zing rawh, that tumin Herodan naute hi a zong ding a nih” a ta. 14 Chuongchun, a tho a, naute le a nu chu thruoiin a zân a zânin Aigupta ram an pan a, 15 Heroda thi hma chu chu taka chun an um zing a. Zawlnei hmanga, “Ka naupa chu Aigupta rama inthokin ka ko suok a” tia a lo hril kha a hung tlung tah a nih.
Naute that thu
16 Mi varhaiin an dawha ti Herodan a hriet chun a lung a sen êm êm a, mi varhaiin naute pieng hun awma an hril ang khan Bethlehem le a sè vela pasal naupang kum hnia inthoka a hnuoi tieng po chu that vong dingin thu a pêk a. 17 Zawlnei Jeremia-in hieng thu a lo hril kha a hung tlung ta a nih:
18 “Rama khuoa ri an hriet chu,
Lusûn trap khêk rong rong a nih;
Rakilin a nauhai a tra a,
An um ta si naw leiin,
Thlĕm tlăi ruol a ni nawh.”
Aiguptaa inthoka an kǐr thu
19 Heroda thi hnungin Aigupta rama um Josefa mangah Lalpa vantirko a hung inlàr a, 20 “Tho la, naute le a nu thruoi la, Israel ramah kîr nawk ta rawh; naute that tumtuhai kha an thi tah” tiin a hril a. 21 Chuongchun a tho a, naute le a nu chu a thruoi a, Israel ram tieng a kîr nawk ta a. 22 Nisienlakhom, Arkelausa chu a pa Heroda aiawin Judai ramah a’n lal ti a hrietin chu taka chun fe ngam loin, manga inhriettir a ni angin Galili ram tieng a pan a, 23 Nazaret khuo an ti-a chun a um ta a. Zawlnei hmanga a lo hril, “Ama chu Nazaret mi tîng an tih” ti chu a hung tlung kim tah a nih.