JEREMIA
Thuhma
Zawlnei Jeremia lekhabu hi ei hmang lai Thuthlung Hlui Baibula bu sawmhni palina, bung 52 le chang 1364-a sei, B.C 626-586 inkar vela Anathot khaw mi Jeremia-in lekhaziektua a hmang Baruk ziek a nih. Kum sawmli zet zawlnei sin a thaw sungin rorêltuhai le mipuihaiin milim bea thil suol an thaw leia Judai ram le a mipuihai chunga sietna râpthlak hung tlung ding thuhai chu mitthli tla pumin a hril lawk a, an pumpel theina dingin an suolnahai chu sim dingin a’n fui mol mol a. A hrilhai chu an poisa chuong naw el bakah ama chu an theida a, that tumin an phierruk a, chirdûpa dam an thlăk a, nêksawrna nasa tak a tuor a. Sienkhom a dam lai ngeiin a hril lawk tam tak chu a hung tlung a, Babulon lal Nebukadnezzar-in Judai ram a hung rŭn a, Jerusalem a suksiet a, Juda lal le a sungkuohai le mi tam tak salah a thruoi hmang a. Chun, an kawl le kienga hnam hrang hrang umhaiin siet an tuok dinghai khom a hril lawk bakah Judahai chu an saltangnaa inthoka an hung kir nawk ding thu le an hnam chu tungding a la ni nawk ding thu khom a hril lawk bok.
Jeremia lekhabu hi a kum indota sie a harsatna chu a thil hril lawk hmasa threnkhat chu a bu hnung tieng dam a um a, a hril lawk nuhnung threnkhat chu a hmasa tieng a um bok a, a saisa nuoi a nih. A sunga thu um tlangpui chu hieng ang hin a nih: (i) Jeremia koa a umna 1.1-19 (ii) Juda lalhai Josia, Jehoiakim, Jehoiachin le Zedekia hai inlal sunga a thu hril lawkhai 2.1-25.38 (iii) Jeremia nuna thil tlunghai 26.1-45.5 (iv) Hnam dang-Aigupta mihai, Filistin mihai, Moab mihai, Amon mihai, Edom mihai, Elam mihai le Babulon mihai chungthu a hril lawkna 46.1-51.64 (v) Jerusalem siet thu le Babulon sala an intang chungchanga ziektu thu bel.
Jeremia hi threnkhatin ‘zawlnei trapder’ an ti hiel angin, pa indik, chîk taka thil sui mi, a mihai lainat èm ém tu, LALPA thu a donghai chun mei anga a hlieu leiin a topui thei naw a, a tuorna ding khom ni sien huoisen takin a puong suok a, a tuor nasa hrim bok. A thil hril laia inchik tlak pakhat chu mihai lungrila Thuthlung Thar la um ding, chu hun a tlung pha chun an lungrila ziek a ni ta ding leiin zirtirtu hran an ngai ta naw ding thu a nih (31:31-34)