35
Tuoi thar beiseina1 Thlalĕr ram trawl chu lawmin,
Ram kol vel vulhai khom chu,
Hlimin hung par vul a tih.
2 Buhlăwng angin hung vul a ta,
Hlim takin lawm hla rem a ta,
Lebanon tlang anga hringin,
Karmel phŭl le Saron phăi angin,
Thlalĕr chu inchang a ta,
LALPA ropuina hmung an ta,
Pathien mawina hmu bok an tih.
3 In băn zoihai sukhrat unla,
In khŭp tlephai chu sukhrât ro.
4 Lungril dawihai kuoma chun,
“Insukpachangin tri naw ro,
In hmĕlmahai sukse dingin,
In Pathien a hung ding a nih;
Phuba lain hrem tawl a ta,
Ama chun san suok a ti cheu”
Tiin i hril tawl ding a nih.
5 Mitdelhai mit hung var a ta,
Nasethai na inhong a tih.
6 Kebaihai chu sakhi angin,
Inchawm zek zek tang an ta,
Trong thei lohai khom hlimin,
Lawmna hla sak tang an tih.
Thlalĕrah tui hung pŭt a ta,
Thlalĕrah vadung luong a tih.
7 Pilvut sa huom huom hlak chu,
Dilah hung inchang a ta,
Ram trawlah tui hnăr pût a ta,
Sihal ruol inkulna hmun chu,
Hlobet, phairuong le thielkuong
Tamna bil inchang a tih.
8 Lamlienin hung sun a ta,
‘Thienghlimna Lamlien’ tiin,
A hming khom inbûk an tih.
Mi porchehan hraw naw ni a,
Lam mihaiin hrawng an ta,
Mi rilo invêthan hraw naw nih.
9 Sakeibaknei um naw ni hai a,
Ram sa kolin hraw naw ni hai a,
Hmu ding um bok naw ni hai a,
Tlanhai chauin hrawng an tih.
10 LALPA intlanhai hung kìr an ta,
Hla sakin Zion lût an ta,
Chatuon lawmna chu khum an ta,
Lungngai inrûmna bo a ta,
Hlimna le lawmnan hmuok a tih.