Hmêlma laka thrangpui hnǐna
Davida inpăkna hla.
108
1 Aw Pathien, ka ring tlat che,Inphet loa ring tlatin,
Rimawiin inpâk ka che.
2 Aw ka thlä, hung tho har la,
Tringtrang rimawi chu tumin,
Khawfing hang ko chat ka tih.
3 Hnam tin lai hin aw LALPA
Nang inpâk ka ti che a,
Mipui lai zaia chawiin,
I’n pâkna hla sak ka tih.
4 I hmangainan văn a khûm,
I ringumnan sûm a pĕl.
5 Aw Pathien, vànhai khèlah,
Ropui takin nang lêng la,
I ropuinan hnuoi ram hi,
Arêngin hung sip raw se.
6 Thrangpuiin mi san suok la,
I hmangaihai himna din,
I kut chang tieng hung phar rawh.
7 A hmun thienghlim a’nthokin,
Hieng hin Pathienin a hril:
“Ka mihan hnèna changin,
Sekem khuo sem dar ka ta,
Sukot ruom thrè dar ka tih.
8 Gilead le Manase ram,
Arêngin ka tâ a na,
Efraim ram ka thîr lukhum,
Judai ram chu ka lal hmol,
9 Moab ram chu ka maihûn,
Edom ram chu ka pheikhok.
Filistinhai chunga chun,
Hlado ka’n sam khum dĕr tah”.
10 Kula inhuon khawpuiah,
Tu’n am mi thruoi ta’ng a ta?
Edom ramah tu-in am,
Thruoiin mi fepui a ta?
11 Aw Pathien, i mi hnawl maw?
Kan sipai ruol lai, Pathien,
I thrang nuom ta naw a ni?
12 Hmêlma lakah mi san rawh,
Mihriemhai thrangpuina chu,
Ienga khom a tlâktlài nawh.
13 Pathien zârin huoi taka
Beiin hnèna chang kan ta,
Kan rălhai chîl pher a tih.