BU NGANA
(Sam 107-150)
Lalpa thratzie inpâkna
107
1 LALPA chu a thra ĕm a,A kuomah lawmthu hril ro,
Ngil a nei kumkhuo si a.
2 Hmêlma laka inthoka,
LALPAN a’n tlan suokhai chun,
Chu chu ti rop raw hai se,
3 Sak, thlang,a sim le hmar rama,
Mi a hung thruoi khawmhai chun.
4 A thren chu thlalèr ram sie,
Hmun reah an invăk a,
Hmun khuorna ding khawpui chu,
A păwna lam an hmu nawh.
5 Phingtrâm le dangchâr tuorin,
Chăuin an tlep ngawi ngawi a.
6 Harsatna an tuok pha leh,
LALPA koin an khĕk a,
An beidongna a’nthokin,
Aman a lo san suok hlak.
7 Lam tluonga chun a thruoi a,
An chêngna ding khawpui chu,
An tlung thei tawl tah a nih.
8 Hmangaina chuoi lo LALPA,
Hriem nauhai dinga thilmak,
Tam tak thawpektu kuomah,
Lawmthu intlun raw hai se.
9 Dangchârhai a sukkhop a,
Phingtrâmhai fak ding thrain,
A hrâi tlai tawl hlak si a.
10 Threnkhat chu inthim hnuoiah,
Beidonga rinum tuorin,
An inthrung, thir kol bunin,
11 Pathien thu lakah hel a,
Chunghnungtak remruotpek chu,
Hmusita an hnawl leiin.
12 Sin rinum del dè hnuoiah,
An lung a dong kor kor a,
Santu nei loin an tlu.
13 Harsatna an tuok pha leh,
LALPA koin an khĕk a,
An beidongnaa inthok,
Aman a lo san suok hlak.
14 Thim le thǐna hlim a’nthok,
Aman a lak suok tawl a,
An khaidiethai a suktan.
15 Hmangaina chuoi lo LALPA,
Hriem nauhai dinga thilmak,
Tam tak thawpêktu kuomah,
Lawmthu intlun raw hai se.
16 Dar thîr kot a suksiet a,
Thîr kalhai a sukbong bok.
17 Invêthai nat san tak chu,
Hel kong an hrăw lei a na,
An tuor hlakna san tak khom,
An bawsietna lei a nih.
18 Făk ding tinrêng an hnăm a,
Thlăn ko tieng an pan hnai hlak.
19 Harsatna an tuok pha leh
LALPA koin an khêk a,
An beidongnaa inthok,
Aman a lo san suok hlak.
20 Thu a pêk, a sukdam a,
Thlan a’nthok a san suok hlak.
21 Hmangaina chuoi lo LALPA,
Hriem nauhai dinga thilmak,
Tam tak thawpêktu kuomah,
Lawmthu intlun raw hai se.
22 A kuomah lawmthu hrilin,
Hlànbiekna thaw hai sien la,
Lawmna hla mawi chu remin,
A thilthaw hril raw hai se.
23 Threnkhat longa inzinin,
Tuipuiah făk an zong a.
24 LALPA thilthaw an hmu a,
Tui inthûk taka thilmak,
A thawhai po po khom chu.
25 Thu a pêk, thlipui a hrâng,
Tuipui a sukfawn hlup hlup.
26 Văn tieng an invor sàng a,
Li tieng an bir nawk vung vung,
A pangzatum ĕm leiin,
Thlabârin an chi-ai hlak.
27 Zu rui lam lawn pai angin,
An thle ton an thle ton a,
Thaw ngaina hrim an hriet nawh.
28 Harsatna an tuok pha leh,
LALPA koin an khêk a,
An beidongnaa inthok,
Aman a lo san suok hlak.
29 Thlipui chu a suktawp a,
Tui fawn khom an rê chip a.
30 A rè chun an hlim hle a,
An pan long chawlna hmunah
A thruoi tlung tawl hlak a nih.
31 Hmangaina chuoi lo LALPA,
Hriem nauhai dinga thilmak,
Tam tak thawpektu kuomah,
Lawmthu intlun raw hai se.
32 Mipui pung khawmna hmunah,
Ama chu chawimawi unla,
Upa ruol thrung khawmnaah,
Ama chu inpâk hlak ro.
33 Vadung khom thlalèr hmunah,
Ama chun a’n changtir a;
Tui hnăr umna ram hnawng khom,
Ram trawlah a’n changtir bok.
34 A chêngtuhai suol leiin,
Pil hâng khom hmangna um lo,
Hnuoi alah a’n changtir hlak.
35 Thlalèr khom tui tamna hmun,
Ram trawl khom tui hnăr tamna,
Ram hnawngah a’n changtir hlak.
36 Chu taka chun chêng dingin,
Phingtrâmhai a hung thruoi a,
Umhmun an khuornaa chun,
Khawpui an hung indin a.
37 Thlai chîngin grêp an phun a,
A ra kûr têr tuor el hlak.
38 Mal a sawm, an pung tuol tuol,
An ranhai kiem a phal nawh.
39 Neksawrna, sietna leiin,
An hung kiem ta tiel tiel a,
Lungngaiin an kŭn tlok tlok.
40 Sienkhom milŭnhai chunga,
Hmusitna bun thlatu le,
Thlalèr ram palailĕnga,
Invâkvaitirtu ngei chun,
41 An tuornaa inthokin,
San ngaihai a chawi kăng a,
Ran ruol angin an sungkuo,
An hung pung nawk hlak a nih.
42 Mi indikhan an hmu chun,
Namên loin an hlim a,
Mi suolhai ruok chun an bau,
An inchîp hmak thung a nih.
43 Mi var chun hieng thuhai hi,
Inzain poisa sien la,
LALPA ngilneina ropui,
Ngaituoin sût chieng raw se.