Thrangpui hnǐna
Davida inpakna hla var.
Saula tria pûka an bǐkrŭk laia mi.
“Sukse naw rawh” ti thlûka rem ding.
57
1 Aw Pathien, mi lunginsiet la,Ka chunga hin zà hung ngai rawh.
Ka thla inbǐkna nang i na,
Sietna thlipui a’n kieng hma chun,
I thla hnuoi hi bèl zing ka tih.
2 A Chunghnungtak Pathien ka ko,
Ka ta dinga a tum tinrêng,
Inhlentir hlaktu Pathien chu.
3 Van a’nthokin mi don a ta,
Ama chun mi hung sanhimin,
Mi pĕltuhai hung rău a ta,
A lungsietna le ringumna,
Pathienin inlangtir a tih.
4 Sakeibaknei anga tri-um,
Mi fa nuomhai lai ka um a;
An hà chu thal le fei zum ang,
An lei kawlhnâm ngei ang a nih.
5 Aw Pathien, vanhai khèla khom,
Nang chu ropui takin lêng la,
I ropuinan hnuoi sip raw se.
6 Ka àwkna di’n lĕn châng an kam,
Beidongin ka kûn tlok tlok a;
Ka lampuiah tlâkhol an cho,
Sienkhom anni an tla ta lem.
7 Aw Pathien, ka ring tlat che a,
Inphet loa nang ring tlatin,
Rimawi remin inpâk ka che.
8 Aw ka thla, nang hung tho har la,
Tringtrang le rimawi hai tumin,
Khawfîng hi hang ko chat ka tih.
9 Hnam ze tin lai hin aw LALPA
Nangma inpâk ka ti che a,
Mipui lai khom zâia chawiin,
I’n pâkna hla hung sak ka tih.
10 I hmangainan vàn a khêl a,
I ringumnan vàn sûm a pèl.
11 Aw Pathien, vanhai khèla khin,
Ropui takin nang chu lêng la,
I ropuinan hnuoi sip raw se.