Thuhma
Joba lekhabu hi ei hmang lai Thuthlung Hlui Baibula bu 18-na, bung 42 le châng 1070-a sei, Mosie hun hma daia ziek tah le Baibul bu pumpui laia ziek hmasa tak ni dinga ring a nih. A ziektu le a ziek hun hi hriet a ni nawh. Entirna nei tienami ni dinga ring pawl khom an um.
Joba chu mi thra le neinung, Pathien laka pa ringum a nih. Sukhlum êm si loa a nuom ang tawka a ringumzie fie dingin Setan kutah Pathienin a pêk suok a, a nei po po a chân a, pânsie-in a bawm sip a. A ruolhai pathumin an hung kan a, a suol leia Pathienin a hrema ngaiin hril fie an tum a. Joba ruok chun chuong ang hremna nasa chu tuor dingin Pathien lakah iengkhom thil suol a thaw nawzie thuin a thrang tlat a, Pathiena a ringna khom a’n phet chuong bok nawh. A suol lei khom ni loa ieng dinga Pathienin a hrem el am a na? ti chu Joba thil indon tak a nih.
Pathien ruok chun Joba zawnahai chu don loin, a thilthawtheizie le varzie thuin a don lem a. Joba chun lungsena a lo suosal chu insirin, inngaitlawm takin Pathien kuomah a tlu lût a, a hma nêka nasa lema tungdingin a um a. Joba tuorna san hre thiem loa thiem naw inchangtirtu a ruolhai chu Pathienin a zilhau tawl bok a nih.
A thu tlangpui:
Thu hongna (1:1-2:13)
Joba le a ruolhai (3:1-31:4)
Joba nuorna (3:1-26)
Inbiek voi khatna (4:1-14:22)
Inbiek voi hnina (15:1-21:34)
Inbiek voi thumna (22:1-27:23)
Varna thu hrilna (28:1-28)
Joba thu tlangkawmna (29:1-31:40)
Elihu thu hril (32:1-37:24)
LALPAN Joba a donna (38:1-42:6)
Thu khârna (42:7-17)