Phuba lapêk dinga hnǐna
Hla thruoitu ta ding.
Davida inpakna hla.
109
1 Ka’n pâk rop hlak aw Pathien,Mi tosan zing lul naw rawh.
2 Mi rilo le hlêm hmanghan,
An mi hril siet luoi luoi a,
Khêlin an mi bei a nih.
3 Theidàna thu’n an mi’n huol,
A san boin an mi bei.
4 Hmangaiin ka trongtraipek,
Annin an mi do lêt si.
5 Thratna, suolin an mi rul,
Hmangaina, theidanain.
6 Anni chun hieng hin an tih:
“A chungthu rêlpêk dingin,
Rorêltu mi suol ruot la,
Hêktu a chang tieng ngir sien.
7 A chungthu an rêl pha leh,
Thiem naw inchangtir ngei sien,
A trongtrainahai ngei khom,
Suola ngai ni vong raw se.
8 A nun suktawiin um sien,
A hotu nǐna chân sien,
9 A nauhai fahra hai sien,
A nuhmei hmeithai raw se.
10 A nauhai chu chavaiin,
Kutdawin invak hai sien,
An in se trăwp a’nthok chun,
Hnot suokin um raw hai se.
11 Bata inpuktirtu chun,
A nei po làkpek sien la,
A sin inrim rahai khom,
Ram dang mi’n chĕn raw hai se.
12 Tu khomin lainat naw sien,
A thisan a nauhai chu,
Lunginsiet naw raw hai se.
13 A thlahai mang vong hai sien,
Thrangthar la hung ding lai khom,
An hming nuoi bo ni raw se.
14 “A pipu bawsietnahai,
LALPAN inchik vong sien la,
A nu suolnahai khom chu,
Thai hmang ni ngai naw raw se.
15 An suolnahai po po chu,
LALPAN inchik zing sien la,
Hi hnuoia hin tu khom hriet,
Hlaw lo di’n thai bo raw se.
16 Ngilneina chàng a hriet nawh,
Rethei, pasie, beidonghai,
An thi chenin a hnot thlŭr.
17 Trong sie inphur a chǐng chu,
Ama chungah tla raw se.
Mi a ditsak ngai naw a,
Ditsakna chang naw raw se.
18 Trong sie a silfen a na,
Tui angin a chǐm vĕl a,
Hriek angin a ru a fang.
19 A korfuol a’n zem angin,
Ama chu zem khum sien la,
Kawngchûn angin khit raw se.”
20 Mi hêktuhai chu LALPAN,
Chuong ang chun thungrul sien la,
Mi hrilsetuhai chan khom,
Chuong ang pei chun ni raw se.
21 Aw LALPA le ka Pathien,
I hming leiin mi duot la,
I hmangaina chuoi lo chun,
Mi hung san suok ngei ngei rawh.
22 Retheiin ka tlasam a,
Ka lungril sûng a hliem a.
23 Zăn tieng ni hlim ang ralin,
Khău ang thin thlâkin ka um.
24 Bu nghei leiin ka khûphai,
An lo ongrop zo tah a,
Chêrin kan hriel neng el tah.
25 Mi nuizat bŭr ka ni a,
Mi hmu photin lu an thin.
26 LALPA Pathien mi san rawh.
I hmangaina chuoi lo chun,
Nangin mi hung san suok rawh.
27 I thaw a ni ngeizie khom,
Hung inhriettir rawh, LALPA.
28 Trongsie mi’n phur hai sien khom,
Nangin mal mi sawm i tih.
Mi dotuhai muolpho sien,
I siehlaw hi hlim a tih.
29 Mi sukpâwi tumtuhai chun,
Inzakna puon sil an tih.
30 Ka bâuin nasa takin,
LALPA chu inpâk ka ta,
Mipui lai inpâk ka tih.
31 Aman mi pasie a tran,
Thiem naw inchangtir tumtu,
Lakah a mi san suok hlak.