16
1 Pathien Bawm chu an hung làk a, a siena dinga puon in Davidan a zar sunga chun an sie a, pumraw thilhlân le inremna thilhlânhai chu Pathien kuomah an inhlàn a.2 Davidan pumraw thilhlân le inremna thilhlânhai a’n hlàn zo chun LALPA hmingin mipuihai chu mal a sawm a.3 Chu zoah Israelhai chu a nuhmei a pasalin bei tlang khat, sa tlang khat le grêp em trawl bawr khat pei a pêk seng a.
4 LALPA Bawm hmaah rong bawl a, LALPA Israel Pathien be a, a kuomah lawmthu hril a, inpaktu dingin Levihai threnkhat chu a ruot a. 5 An hotu tak chu Asaf a na, a dottu chu Zekaria a na, a danghai chu perkhuong le tringtrang tumtu Jeiel, Semiramot, Jehiel, Matithia, Eliab, Benaia, Obed-Edom le Jeiel hai an nih. Asaf chu darbenthek bentu a na, 6 thiempu Benaia le Jahaziel hai chu Pathien Thuthlung Bawm hmaa tawtawrawt mût hlaktu an nih.
Davida inpâkna hla
7 Chu ni chun Asaf le a rawihai chu LALPA kuoma lawmthu hrilna hla sak dingin Davida chun a hmang tran tawl ta a:
8 LALPA kuomah lawmthu hril ro,
A hming chu lam hlak unla,
A thilthaw tinrênghai chu,
Hnam tinrêng lai hril dar ro.
9 Zai hla saka inpâkin,
A’n pakna hla sak unla,
A thilthaw ropuihai hril ro.
10 A hming thienghlim suong unla,
LALPA zongtu lungril chu,
Nasa takin hlim raw se.
11 LALPA chu zong rop unla,
A hratna chu hni unla,
Ama chu pan rop hlak ro.
12 Thil ropui a thawhai chu,
Theinghil loin hre zing ro,
Thilmak a thawhai po po,
A rorêlhai po po khom.
13 A bawi Abraham suonhai,
A thlang bik Jakob thlahai,
14 Ama chu LALPA Pathien,
Leihnuoi hmun kil tinrênga,
Rorêltu a ni si a.
15 A thuthlunghai hrim hrim chu,
Kumkhuoin a hriet zing a,
Suon sang tam tak ta dinga,
A thupekhai a hriet zing,
16 Abraham kuoma a thlung,
Isak kuoma a tiem chu.
17 Chuong chu Jakob thlahai din,
Dan hmangin a namnghet a,
Israelhai ta dingin,
Chatuon thuthlunga siemin,
18 “In chan le rochung dingin,
Kanan ram pe’ng ka ti cheu”
Tiin a lo tiem nghet a.
19 Mi tlawm te, ieng tham ni lo,
Mikhuol el an ni lai khan,
20 Hnam tin lai invakvaiin,
Ram tinah an indar a.
21 Sienkhom hnam dang tu khomin,
An nèksawr a phal naw a,
Anni leiin lalhai chu,
Halin a zil tawl lem hlak:
22 “Ka hriek nàlhai tawk naw ro,
Ka zawlneihai poi réng rèng,
In tawk ding an nawh” tiin.
23 Hnuoia chêng mi tinrênghai,
LALPA kuomah hla sakin,
A sandamna thu hrilin,
Sunni tinin puong dar ro.
24 A ropuizie thu hrilin,
Hnam tin lai puong dar unla,
A thilmak thawhai khom chu
Mi tinrêng lai hril dar ro.
25 LALPA chu a ropui a,
Inpâk tlàk takzet a na,
Pathien dang po po nêkin,
Ama tri tak ding a nih.
26 Hnam dang pathienhai ruok chu,
Milim mei mei vong an na,
LALPA chu van siemtu a nih.
27 Ropuina le chawimawinan,
Ama chu a’n huol vel a,
Thilthawtheina le lawmnan,
A Hmun Thienghlim chu a sip.
28 Hnam tin chi tina mihai,
Ropuina le hratna hi,
LALPA zàr a nih hrein,
Chawimawina ama pe ro.
29 A hming ropuizie phûin,
Chawimawina LALPA pein,
A thienghlimna zàm velah,
In thilpekhai hung chawiin,
LALPA chu hung chawibiek ro.
30 Leihnuoia cheng po pohai,
A hmaa chun inthin ro!
Hnuoi hi inhnîng lo dingin,
Aman a rem nghet a nih.
31 Vanhai, hlim zai vawr unla,
Hnuoiin lawm hla rem raw se;
“LALPA chun ro a rêl ie”
Ti raw hai se, hnam tin lai.
32 Tuifinriet le a sunga
Umhai khêk dur dur raw se.
Ram le a sunga umhai,
Hlimin lawm seng raw hai se.
33 Ramngaw thinghai chen khomin,
Lawm hla sakin khêk raw se.
Hnuoi chungah ro rêl dingin,
LALPA a hung mèk a nih.
34 LALPA chu a thra èm a,
A kuomah lawmthu hril ro,
Ngil a nei kumkhawtluongin.
35 “Aw LALPA kan Sandamtu,
Hnam danghai lak a’nthokin,
Nangman mi hung san suokin,
Mi hung thruoi khawm tawl nawk rawh,
I hming thienghlim inpâk a,
Kan chawimawi theina ding che’n”
Tiin nangni khêk suok ro.
36 LALPA, Israel Pathien chu,
Chatuona inthok chatuon chenin,
Inpakin um pei raw se”
tiin. Mi po po chun “Amen, LALPA chu inpakin um raw se” an ta.
37 Davida chun Asaf le a rawihai chu ni tina a trùl le mamaw ang peia LALPA Thuthlung Bawm hmaa rongbawl zing dingin a sie a. 38 An rongbawlpui dingin Jeduthan naupa Obed-Edom le a rawihai mi sawmruk le pariet chu a sie bok a. Jeduthan le Hosa chu kotkhar vengtu an nih.
Gibeon-a rongbawltuhai
39 Thiempu Zadok le a thiempu chanpuihai chu Gibeon hmunsânga LALPA biekbuka rongbawl dingin Davida chun a sie a. 40 Anni chu LALPAN Israelhai kuoma Dan a pek ang thlapa zing tieng le zan tienga LALPA biekbuk maichama pumraw thilhlân inhlàn rop dinga ruot an nih. 41 Kumkhawtluonga LALPA hmangaina inpâktu dinga anni ruola an siehai chu Heman le Jeduthan le hming meu lama an thlang suokhai chu an nih. 42 Heman le Jeduthan hai chu tawtawrawt muttu le darbenthek bentu anni bakah hla thienghlim an sak changa rimawi tumtu an nih. Jeduthan naupahai chu kotkhar vengtu an nih.
43 Chuongchun, mipui po po chu mani in tieng seng an kir nawk ta a; Davida khom a sunghai malsawm dingin a’n lawi ve ta a.