A mihai ta dinga LALPA thratna
106
1 Haleluia!LALPA chu a thra ĕm a,
A kuomah lawmthu hril ro,
Ngil a nei kumkhawtluongin.
2 LALPA thilthaw ropuizie,
Tuin am hril zo theiin,
Inpâk tawk thei um an ta?
3 Rorêlna dik kengkawtu,
Thil indik thaw roptu chu,
Mi hamthra a va ni ngei!
4 I mihai chungah LALPA,
Ditsakna i’n suo pha chun,
Mi hung hre ve zing raw aw;
Anni i san suok hunah,
Kei khom mi’n thrangtir ve rawh;
5 I thlanghai hmuingilna chu,
Ka chang ve theina ding dam,
I hnam thlanghai hlimna chu,
Ka hlimpui vena ding le,
I rochanhai leh hlim zai,
Kan văwr tlâng theina dingin.
6 Kan pipuhai ang bokin,
Thilsuol kan lo thaw ve a,
Indik lo taka thawin,
Rilo takin kan um hlak.
7 Aiguptaa an chĕng lai,
I thilmak thaw pipuhan,
Mênah an lo thlàk hlak a,
I ngilneina innghilin,
Tuipui Sen kama ngei khan,
Chunghnungtak lakah an hel.
8 Sienkhom a theina mak chu,
An hung hriet theina dingin,
A hming leiin anni chu,
A san suok ta tho a nih.
9 Tuipui Sen chu a hal a,
Chuongchun a hung kang chat a,
A mihai chu hnuoi chărah
Va râl chu a thruoi kai a.
10 Dotuhai kut a’nthokin,
A mihai a san suok a,
Hmêlmahai kut an’thokin,
A mihai chu a’n tlan suok.
11 Tui chun hmêlma a lem zo,
Pakhat khom an tlàn suok nawh.
12 A thutiem an ring tah a,
A’n pâknan zai hla an vawr.
13 Sienkhom a thilthawhai chu,
Kar loin an nghil nawk a,
A remruot an nghak pei nawh.
14 Thlalĕrah an inrăwp a,
Pathien chu an fie tah a.
15 An thil hni chu a pêk a,
Sietna hri a tir bok a.
16 Chuongchun an puon in a’nthok,
Mosie le ser hran Aron,
An hung thǐk ta êm êm a.
17 Hnuoi chu a hung kak phut a,
Dathan chu a lem nghal a;
Abiram le a rawihai,
An pil hmang ve ta vong a.
18 An lai mei a hung suok a,
Mi suolhai a kăng hlum vong.
19 Horeb tlangah bawng tuoi lim,
Sungin chu chu an biek a.
20 An Pathien ropuina chu,
Hlo pet hlak bawng ang chauin,
An inchangtir tah a nih.
21 Aigupta rama thil mak,
Ropui tak tak thawpektu,
An Sandamtu Pathien chu,
An lo theinghil el tah a,
22 Aigupta rama thil mak,
Tam tak a thawpekhai le,
Tuipui Sena thil rapthlak,
A thawpekhai chen khomin.
23 A mi thlang Mosie ngei chun,
A lungsen sukrè dingin,
An kârah bân phar meuin,
Lo ngenpek naw sien la chu,
Sukbohmang vong a tum kha.
24 A thutiem chu ring loin,
Ram ditum an ngainĕp a.
25 An puon inah an chier a,
LALPA thu an awi nuom nawh.
26 Kut phar meua intiemin:
“Thlalĕrah tlu hlum in ta,
27 In thlahai chu hnam dang lai,
Inchek dartir vong ka ta,
Ram tinah chêng dar an tih”
Tiin a’n khăm ta hiel a.
28 Peor-ah Baal an biek,
Mi lem pathien biekna thil,
Inthawina sa an fâk a.
29 An thil rilo thawhai chun,
Pathien an suklungsen a,
Hripui a’n lêngtir tah a.
30 Sienkhom Finehasa ngîr a,
Kut a hung rol tàk leiin,
Hripui chu a rè tah a.
31 Chu thil chu kumkhawtluonga
Thrangtharhai hriet pei dingin,
A felnaa ngai a nih.
32 Meriba tuiah LALPA
Lung chu an suksen nawk a,
Anni leiin Mosie khom,
Nasa takin a buoi a.
33 A lung a sen êm leiin,
Thu hnung ding khom dawn loin,
A trong pha tah hiel a nih.
34 LALPAN a ram mihai chu,
Sukhlum din thu a pêk a,
Sienkhom an sukhlum nuom nawh.
35 Chuonghai leh chun inneiin,
An hnam chǐng dan an zui a.
36 An mi limhai be vein,
An chânga chun an ăwk a.
37 An naunu-naupa hai chu,
Inthawina dinga hmangin,
Ramhuoi kuomah an inhlàn.
38 Poi tawk lo thisen insuo,
An hung chǐng tran ve leiin,
Kanan mi limhai kuomah,
An naunu naupa thisen
Inhlànin an inthawi a;
An thisen chun a ram chu,
An sukporche tah a nih.
39 An thil thaw chun anni chu,
A sukporche zo vong a;
Nawchizor an inchang tah.
40 A mihai chungah LALPA,
A lunginsen ĕm êm a;
A rochanhai chen khom chu,
A tirdak ta uoi uoi a.
41 Hnam dang kutah a pêk a,
An hmêlmahan an chungah,
Ro an rêl khum tah a nih.
42 Hmêlmahaiin sirdein,
An thuhnuoiah an sie a.
43 Voi tam san suok tawl sien khom,
Hel hrim an ma chuong naw a,
Suolah an inhmang zo lem.
44 Sienkhom an beidong meu chun,
An kona a ngaisak a;
45 Anni leiin a thuthlung,
A hriet zing, a nghil ngai nawh,
Ngilneina a hau leiin,
A ngaisak tawl nawk hlak a,
46 Sala mantuhai chen khom,
Anni a’n lungsiettir hlak.
47 Aw LALPA le kan Pathien,
Nangin mi hung san suok la,
Hnam dang laia inthokin,
Nangin mi thruoi khawm nawk la,
I hming thienghlim inpâk a,
Kan chawimawi theina ding che’n.
48 LALPA, Israel Pathien chu,
Kumkhuon inpakin um sien,
Mi tinin “Amen” raw se.
Haleluia.