Pathien le a mihai
105
1 LALPA chu lawmthu hril ro,A hming chu lam hlak unla,
A thilthaw tinrênghai chu,
Hnam tin kuomah hril dar ro.
2 A kuomah zaihla sakin,
A’n pakna hla sak unla,
A thilthaw ropui hril ro.
3 A hming thienghlim suong unla,
LALPA zongtu lungril chu,
Nasa takin hlim raw se.
4 LALPA hrătna chu zongin,
Ama chu pan rop hlak ro.
5 Thil ropui a thawhai chu,
Theinghil loin hre zing ro,
Thilmak a thawhai po po,
A rorêlhai po po khom.
6 A bawi Abraham suonhai,
A thlang bǐk Jakob thlahai,
7 Ama chu LALPA Pathien,
Hnuoi pum rorêltu a nih.
8 A thuthlunghai hrim hrim chu,
Kumkhuoin a hriet zing a,
Suon sâng tam tak ta dinga,
A thupêkhai a hriet zing,
9 Abraham kuoma a thlung,
Isak kuoma a tiem chu.
10 Chuong chu Jakob thlahai di’n,
Dan hmangin a namnghet a,
Israelhai ta dingin,
Chatuon thuthlunga siemin,
11 “In chan le rochung dingin,
Kanan ram pe’ng ka ti cheu”
Tiin a lo tiem nghet a.
12 Mi tlawm te, ieng tham ni lo,
Mikhuol el an ni lai khan,
13 Hnam tin lai invakvaiin,
Ram tinah an indar a.
14 Sienkhom hnam dang tu khomin,
An neksawr a phal naw a,
Anni leiin lalhai chu,
Halin a zil tawl lem hlak:
15 “Ka hriek nalhai tawk naw ro,
Ka zawlneihai poi rêng rĕng,
In tawk ding an nawh” tiin.
16 Ram pumah trăm a’n tlâktir,
An buhai a suksiet vong;
17 An hmaah mi a tir a,
Sala an zor Josef kha.
18 A kol bunna ke hliemin,
A rîngah khaidiet an thlung-
19 A hril lawk ang hung tlung a,
LALPA thu indikzie chu,
Chieng taka an fie chenin.
20 Lal chun mi tirin an suo,
Hnamhai lal chun an suoktir.
21 A ram hotuah siemin,
A nei po po chunga chun,
Thuneituah a sie a,-
22 Mi lienhai a nuom nuom a,
Thunun le zirtir ding le,
A khawnbawl milŭnhai chu
Varna thu inchuktir di’n.
23 Chu zoah Israel chu,
Aiguptaah a hung a,
Hama ramah mikhuol angin,
Jakob chu a chêng tah a.
24 LALPA chun nasa takin,
A mihai a’n pungtir a;
Anni lo ertuhai chu,
An hung tam del el tah a.
25 A ram mihai lungrilah,
Anni a’n theidatir a,
A siehlawhai chu phierin,
Vervêk takin an soisak.
26 A siehlaw Mosie a tir,
A mi thlang Aron le chun.
27 Aigupta mihai kuomah,
Pathien inchikna thilmak,
Tam tak an inentir a.
28 A thu an awi naw leiin,
Thim khuo a’n zǐngtir mup a,
A ram pum a’n thim vong a.
29 An tui thisen a’n changtir,
An ngahai a sukhlum zo.
30 Ram pumah û a’n tămtir,
Lal ina chen an intăm.
31 Thu a pêk, tho an intăm,
A ram chu tlipin an sip.
32 Ruo aiah riel a’n sŭrtir,
Trêk a tla dur dur bok a.
33 Grep le theichang a deng siet,
Thing hnàhai a deng kol vong.
34 Thu a pêk, khâu an intăm,
Tiem seng lo khâu an hung pung.
35 Thing hna an fak kol vong a,
An thlaihai khom an fak vong.
36 A ram nau lutir po po,
Vanglai nauhai a’n thitir.
37 Tangka, rangkachak hawnin,
Israelhai a thruoi suok,
Inpal thlu khom an um nawh.
38 An suok leiin Aigupta,
Nasa takin a lawm a,
Anni chu an pangzat si.
39 Sŭnah sûm hlim a zăr khum,
Zănah èntu mei a pêk.
40 Sa an ngên, vamim a pêk,
Van buin a chawm tawl a.
41 Lungpuiah tui a vuok suok,
Thlalĕrah a luong dem dem.
42 A bawi Abraham kuoma
A thutiem chu a hriet zing.
43 A mi thlanghai a thruoi suok,
Hlim le lawmin an khĕk a.
44 Hnam danghai ram chu pein,
Mi danghai inrim ra chu,
Anni an rochungtir a,-
45 A thupekhai chu vong a,
A dan an zawm theina di’n.
LALPA chu inpak seng ro.b