Pathien lal ropui tak
96
1 Hla thar LALPA rempêkin,A’n pâkna hla chu sak ro,
Hnuoi hmun tinah zai remin,
LALPA inpâkin sak ro.
2 LALPA kuomah hla sakin,
A hming chu inpâk unla,
A sandamna thu hrilin,
Sŭnni tinin puong dar ro.
3 A ropuizie thu hrilin,
Hnam tin lai puong dar unla,
A thilmak thawhai puongin,
Mi tinrêng lai hril dar ro.
4 LALPA chu a ropui a,
Ropui takin chawimawi ro.
Pathien dang po po nêkin,
Ama tri tak ding a nih.
5 Hnam dang mihai pathien chu,
Mi lim mei mei an ni a,
Ei LALPA Pathien ruok chu,
Vanhai siemtu a ni si.
6 A hmaah ropuina le
Chawimawina chu a som a,
Thilthawtheina le mawinan,
A hmun thienghlim an nghak a.
7 Hnam tin chi tina mihai,
Ropuina le hratna hi,
LALPA zàr a nih hrein,
Chawimawina ama pe ro.
8 A hming ropuizie phûin,
Chawimawina LALPA pein,
In thilpekhai hung chawiin,
A tuolzawla chun hung ro.
9 Thienghlimna thuom inbelin,
LALPA hung chawibiek unla,
Hnuoia chenghai po po khom,
A hmaah inthin raw se.
10 “LALPA chun ro a rêl ie.
Hnuoi hi inhnîng lo dingin,
Aman a rem nghet tlat a.
Mi tin chungah fel takin,
Ro a rel ding a ni si”
Tiin hnam tin hril vel ro.
11 Vanhai, hlim zai vawr unla,
Hnuoiin lawm hla rem raw se;
Tuifinriet le a sûnga
Umhai khek dur dur raw se.
12 Ram le a sunga umhai,
Hlimin lawm seng raw hai se,
Ramngaw thinghai chen khomin,
Lawm hla sakin khêk raw se.
13 Hnuoi chungah ro rêl dingin,
LALPA a hung mek a nih;
Khawvel chungah fel takin,
Ro chu hung rêlpek a ta,
Indik takin mi tinrêng,
An chungthu rêlpek a tih.