Jerusalemah Pathien Bawm an son
15
1 Davida khawpuia Davidan ama in ding a bawl zo chun Pathien Bawm umna ding hmun a buotsai a, chu taka chun puon in a kei a. 2 Davida chun, “Pathien Bawm hi Levihai chauh naw chun tu khomin an zawn ding a ni nawh; Pathien Bawm hi kumkhuoa zawntu le a rongbawltu dinga LALPA thlang an ni si a” a ta.3 LALPA Bawm siena ding hmun a buotsaia Bawm chu zawn tung dingin Davida chun Israel mihai po po chu Jerusalemah a ko khawm a. 4 Aron thlahai le Levi thla a ko khawmhai chu: 5 Kohat thlaa inthokin an thruoitu Uriel le a sungkuo mi za le sawmhni; 6 Merari thlaa inthokin an thruoitu Asaia le a suongkuo mi zahni le sawmhnih; 7 Gerson thlaa inthokin an thruoitu Joel le a suongkuo mi za le sawmthum; 8 Elizafan thlaa inthokin an thruoitu Semaia le a suongkuo mi zahni; 9 Hebron thlaa inthokin an thruoitu Eliel le a sungkuo mi sawmriet; 10 Uziel thlaa inthokin an thruoitu Aminadab le a sungkuo mi za le sawmpahni an nih.
11 Davida chun thiempu Zadok le Abiathar hai le Levi chia mi Uriel, Asaia, Joel, Semaia, Eliel le Aminadab hai chu a ko a. 12 An kuomah, “Nangni hi Levi hnama lukhaituhai in na, Israelhai Pathien, LALPA Bawm chu a hmun ka buotsaia in zawn tung theina dingin, nangni le in unauhai leh insukthienghlim ro. 13 A tir khom khan nangnin in zawn naw leiin LALPA eini chungah a lungsen a ni kha, amain thaw dan ding a ti ang tak ei lo indon bok si naw a” a ta. 14 Chuongchun, Israelhai Pathien, LALPA Bawm chu zawn tung dingin thiempuhai le Levihai chu an inser thienghlim a. 15 LALPA thu anga Mosien thu a pèk dan ang takin, thiempuhai chun Pathien Bawm zawnfunga chun putin an zawn a.
16 Hla sak mi, rimawi tum thiem mi, perkhuong hai, tringtrang hai, darbenthek hai leh hlim taka hla remtu ding an unauhai laia mi ruot dingin Levi hotuhai chu Davidan a hril a. 17 Levihai chun Joel naupa Heman hai, a unauhai laia mi Berekia naupa Asaf hai, an unau Merari naupahai laia mi Kusai naupa Ethan hai chu an ruot a. 18 Anni le saktu dingin Zekaria, Jaaziel, Semiramot, Jehiel, Unni, Eliab, Benaia, Maaseia, Matithia, Elifelehu, Mikneia, kotkhar vengtu Obed-Edom le Jeiel hai chu an ruot bok a.
19 Rimawi tumtu Heman, Asaf le Ethan hai chu darbenthek tumtu ding an na; 20 Zekaria, Aziel, Semiramot, Jehiel, Unni, Eliab, Maaseia le Benaia hai chu perkhuong ki insang chi tumtu ding an na, 21 Matithia, Elifelehu, Miknei, Obed-Edom, Jeiel le Azazia hai chu tringtrang ri inhnuoi chi tumtu ding le hma thruoitu ding an nih. 22 Levihai lukhaitu tak Kenania chu hla sak thiem le hla saktuhai inrawitu a nih.
23 Berekia le Elkana hai chu Bawm siena kotkhar vengtua ruot an nih. 24 Thiempu, Josafat, Nethanel, Amasai, Zekaria, Benaia le Eliezar hai chn Pathien Bawm hmaa tawtawrawt muttu ding an nih. Obed-Edom le Jehia hai khom Bawm siena kotkhar vengtu dinga ruot sa an nih.
Jerusalemah Thuthlung Bawm an lak
25 Davida le Israel upahai le sipai sangkhat pei kawmandar hai chu Obed-Edom ina um LALPA Bawm chu zuk la tung dingin hlim takin an fe a. 26 LALPA Thuthlung Bawm zawntu Levihai chu Pathienin a thrangpui leiin, bawngchal pasari le beramchal pasariin an hlanbiek a. 27 Davida le Bawm zawntu Levihai le hla saktuhai le zaipawl thruoitu Kenania hai chu puon zai inhmiin an inthuom a. Davida chun thiempu zakuo efod chu a hàk sâ bok a. 28 Chuongchun, beram ki le tawtawrawt bi nei mut ruoi ruoiin, darbenthek ben a, perkhuong le tringtrang tumin, Israelhai po po chun khek dur durin LALPA Thuthlung Bawm chu an zawn tung ta a.
29 Chun, hieng hi a na, LALPA Thuthlung Bawmin Davida khawpui a lut lai chun Saula naunu Mikal chun tukvera inthokin a lo thlir a, lawma lal Davida lâm le inchawm a hei hmu chun a lungrilin a lo inzàpui hle a.