Israel lal Davida
11
1 Israel pahnam po po chu Hebron-ah Davida kuomah an hung a, a kuomah “Ngai ta, i taksa le thisen inzompui kan ni hi. 2 Kha hmaa Saula kan chunga a’n lal lai khom khan kan ràl beinaa Israel thruoitu tak chu nangma i ni hlak a. LALPA chun i kuomah, ‘Ka mi Israelhai thruoi i ta, an lalah i um ding a nih’ a ti che a ni kha” an ta.3 Israel upahai po po Hebron-ah Davida kuom an hung tlung chun LALPA hmaah anni chu thu a lo thlungpui a, LALPAN Samuel hmanga a lo tiem tah angin Davida chu Israel lal dingin Hebrona chun hriek an nàl a.
Davidan Jerusalem a lâk
4 Israelhai po po chu thruoiin Jebuhai khawpui Jerusalem bei dingin Davida chu a suok a. 5 Jebuhai chun Davida kuomah, “Hi taka hin lut naw top i tih” an ta. Amiruokchu, Davida chun Zion kul chu a lâk a, chu chu Davida Khawpui a hung ni ta a.
6 Davida chun, “Jebuhai bei dinga hma thruoitu chu kawmandar lû takah ruot ka tih” a ta. Zeruia naupa Joab chu a hang fe hmasa tak a, kawmandar lû takah a sie ta a. 7 Davida chun kulah umhmun a khuor phot a, chu lei chun Davida Khawpui tiin an ko a nih. 8 Suo tieng muola kul thrut ding hnuoi an sung zawla inthoka intranin kul vêl tuok chu Davidan a siem thra a, Joab-in khawpui sung a siem thra a. 9 Iengkim LALPA chun a umpui leiin Davida chu a hung ropui ta deu deu a.
Davida mi huoisenhai
10 Hienghai hi Davida sipai huoisen, Israelhai po po leh thrang tlânga, LALPAN a lo tiem tah anga a ram pum huopa a lalna indinpuitu, 11 a kuoma um mi hrat khawkhènghai chu an nih: Hakmon mi Jasobeam, sipai hotu lien pathumhai laia a lû tak, trum khata inbeinaa fei ringota mi zathum thattu a nih. 12 A dottu chu Aho mi, Dodai naupa Eleazar, hotu lien pathumhai laia pakhat chu a nih. 13 Indo dinga Pas Damim-a Filistinhai an inhawr khawm trumin Davida a zui a. Chu hmun chu barli bil a na, Israelhai chu an tlanse el ta a. 14 Ama le a rawihai chun lo lai thranghmun an khaw a, an vêng tlat a, Filistinhai chu an lo that pei a, LALPAN hnèna ropui tak a pèk a.
15 Mi huoisen sawmthum thlang suok laia pathumhai chu Davida kuomah Adulam pukah an fe a, Filistin mihai chu Refaim Ruomah an lo inkul a. 16 Chuong lai chun Davida chu kulah a um a, Filistin sipai pawl khat chu Bethlehemah an inkul a. 17 Davida chun tui a châk êm êm a, “Bethlehema tuikul tui, kul kotkhar bula um kha mi chawipek um hlauh hai sien chu maw!” a ti vong vong a. 18 Mi huoisen pathumin Filistinhai chu an tawn tlang a, kul kotkhar bula um Bethlehem tuikula tui chu an hang chawi a, Davida kuomah an fepui a. Sienkhom Davida chun dawn loin LALPA ta dingin a bun thlak ta lem a. 19 “Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?” a ta. An hringna meu thâpa an hung chawi a ni leiin Davida chun a dawn naw a nih. Chuong ang chu mi ropui pathumhai huoisen dan chu a nih.
20 Joab unaupa Abisai chu pathumhaia chunga lû tak a nih. Ama chun feiin mi zathum a bei a, a sun hlum vong a, pathumhai ang tluk chun hming thrat a hung hlaw ta a. 21 Chuongchun, a lêt hnia kaisangna dongin pathumhai lai chun thrang sa ve naw sien khom anni chunga kawmandar-ah a hung um tah a nih.
22 Kebzeel khaw mi Jehoiada naupa Benaia chu mi huoisen tak a na, thil nasa tak tak a thaw a. Moab mi huoisen pahni a that zoin a fe thlak a, vûr tlak hun lai hin khurah sakeibaknei a zu that nawk a. 23 Chun, Aigupta mi lien tak el, a dung meter hni le centimeter thuma insang chu a that bok a. Aigupta pa chun fei, a ngul khom puon khawngna themtlang tiet hi a chawi a, Benaia chun hmol chauh chawiin a zu pan a, a fei chu a lakpek a, ama fei ngei chun Aigupta mi lien chu a that a. 24 Chuong ang thil chu Jehoiada naupa Benaia chun a thaw leiin mi huoisen pathumhai ang chun a hming a thra ve a. 25 Mi sawmthumhai nèk chun chawimawi tlak a ni lem hrim a, sienkhom a huoisen tak pathumhai lai chun tiem sa a kâi phâk ve nawh. Chun, Davida chun ama vêngtu laia hotuah a sie a.
26 Mi huoisen hmingthang danghai chu Asael, Joab unaupa; Dodo naupa, Bethlehema mi Elhanan; 27 Haror mi Samot; Pelon mi Helez; 28 Tekoa mi Ikes naupa Ira; Anathot mi Abiezer; 29 Husait mi Sibekai; Aho mi Ilai; 30 Netofat mi Maharai le Baana naupa Heled; 31 Benjamin hnama mi Gibea inthoka hung, Ribai naupa Ithai; Pirathon mi Benaia; 32 Gaash ruom khokroka mi Hurai; Arbat mi Abiel; 33 Baharum mi Azmavet; Saalbon mi Eliahba; 34 Gizon mi Hasem naupahai le Harar mi Sagee naupa Jonathan; 35 Harar mi Sachar naupa Ahiam; Ur naupa Eliphal; 36 Mekerat mi Hefer; Pelon mi Ahija; 37 Karmel mi Hezro; Ezbai naupa Naarai; 38 Nathan unaupa Joel; Hagri naupa Mibar; 39 Amon mi Zelek; Berot mi Naharai, Zeruia naupa Joab ralthuom chawitu; 40 Jatirb mi Ira le Gareb; 41 Hit mi Uria; Ahlai naupa Zabad; 42 Siza naupa Adina, Reuben hnam laia hotu le rawi mi sawmthum nei; 43 Maaka naupa Hanan; Mithan naupa Jehosafat; 44 Astera mi Uzia; Aroer khaw mi Hotham nauhai Sama le Jeiel; 45 Tiz khaw mi Simri nauhai Jediael le Joha; 46 Mahava mi Eliel; Elnaam nauhai Jeribai le Josavia; Moab mi Ithma; 47 Zoba mi Eliel, Obed le Jaasiel an nih.