Davida thu hnuhnung
23
1 Hienghai hi lal Davida thuhril nuhnung tak chu a nih: Jesai naupa Davida, Chunghnungtakin a chawimawi, Jakob Pathienin hriek a nàl, Israelhai laia zaipu chun hieng hin a hril: 2 “LALPA Thlarau chun a thu,
Keima hmangin a hung hril a,
A thu chu ka leiah a um.
3 Israelhai Pathien chun a hril,
Israelhai Lungpui ngei chun:
‘Mi chungah indik taka thaw a,
Pathien tri puma ro rêl hlaktu chu,
4 Sûm um dêr lo boruok inthienga,
Zing nisa hung suok ang hi a na,
Raw sur zo khaw inthienga,
Hlobet hring no sarh ang a nih.
5 “Ka sungkuo hi Pathien lakah,
A tlatlum a ni naw am a ni?
Chatuon thuthlung mi thlungpuiin,
Iengkim sukfelin a namnghet a.
Ka sandamna chu ra insuotirin,
Ka dit tinrêng a mi pek naw dim a ni?
6 Mi suolhai ruok chu hling angin,
Hnăwma peihawnin um an ta,
Kuta inkhawm an ni nawh.
7 Hling tawktu chun thir hriemhrei le
Chem sei ngei a hmang lem a,
A hmunah an raw hmang hlak.”
Davida sipai hmingthanghai
8 Hienghai hi Davida sipai huoisen le hmingthanghai chu an nih: Takemon mi Jose-Basebet chu sipai hotu lu pathum laia a lû tak a nih. Ama hin trum khata inbeinaah a fei ringotin mi zariet a that.
9 Ama dottu chu Aho mi, Dodai naupa Eleazar a nih. Ni khat chu indo dingin Filistinhai an pung khawm a, an hung cho a, Israel mihai an fe hmang vong trum a ni si leiin Davida le sipai pathum chauin an lo bei a, chuonghai laia pakhat chu a nih. 10 Ama chu a tho a, a kut a kham taluo leia a kawlhnâm a hlăng thei ta naw chenin Filistinhai chu a that ngat ngat a, chu ni chun LALPAN nasa takin a ngampek a; sipaihai chu a hnungin râllâk thil inkhawm ding ringotin Eleazar kuoma chun an hung kir a nih.
11 Chu dottu chu Harar mi Age naupa Sama a nih. Lehi khuoa dailaw bilah Filistinhai an pung khawm a, Israel mipuihai chu an tlansie a. 12 Nisienlakhom, ama chu chu hmuna chun a ngìr a, a vêng tlat a, Filistinhai chu a that ngat ngat a, LALPAN nasa takin a ngampek a.
13 Busîk hun lai hin sipai huoisen sawmthum thlang suok laia pathum chu Davida kuomah Adulam pûkah an fe a, Filistin mihai chu Refaim Ruomah an inkul a. 14 Chuong lai chun Davida chu kulah a um a, Filistin sipai pawl khat chu Bethlehemah an inkul a. 15 Davida chun tui a châk ĕm êm el a, “Bethlehema tuikul tui, kul kotkhar bula um kha dawn dinga mi pe um hai sien la chu aw” a ti vong vong a. 16 Sipai huoisen pathumhai chun Filistin sipaihai chu an tawn tlang a, kul kotkhar bula um Bethlehem tuikula tui chu an hang chawi a, Davida kuomah an fepui a, sienkhom dawn loin LALPA ta dingin a bun thlàk ta lem a. 17 “Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?” a ta, chu lei chun a dawn nuom naw a nih. Chuong thilhai chu mi huoisen pathumhai chun an thaw a nih.
18 Zeruia naupa Joab unaupa Abisai chu anni pathumhai chunga hotu tak chu a nih. Ama chun a feiin mi zathum a bei a, a sunhlum vong a, anni pathumhai chunga chun hming thrat a hlaw ta a. 19 Pathumhai chunga chun chawimawi a phû bîk hrim a ni naw am a ni? Chuleiin, a chunghnung tak pathumhai lai chun tiem sa ni ve naw sienkhom an hotuah a hung um tah a nih.
20 Kabzeel mi huoisen naupa Jehoiada naupa Benaia, thil nasa tak tak thawtu chun Moab mi huoisen pahni a that a, chu zoah a fe thlăk a, vûr tlâk hun lai hin khurah sakeibaknei a zu that nawk a. 21 Aigupta mi lien tak el a that bok a. Aigupta pa chun fei a chawi a, Benaia chun hmol chauh chawiin a zu pan a, a fei chu a lakpek a, ama fei ngei chun Aigupta mi lien chu a that a. 22 Chuong ang thil chu Jehoiada naupa Benaia chun a thaw leiin mi huoisen pathumhai lai chun hming thrat a hlaw a. 23 Mi sawmthumhai nĕk chun chawimawi tlâk a ni hrim a, sienkhom a huoisen tak mi pathumhai lai chu tiem sa a kâi phak ve nawh. Ama chu Davidan ama vengtu laia hotuah a sie a.
24 Mi huoisen sawmthum laia thranghai chu: Joab unaupa Asahel hai, Bethlehem khuoa mi Dado naupa Elhanan hai, 25 Harod mi Sama hai, Harod mi Elika hai, 26 Pal mi Helez hai, Teko mi Ikes naupa Ira hai, 27 Anathot mi Abiezer hai, Husat mi Mebunai hai, 28 Aho mi Zalmon hai, Netofat mi Maharai hai, 29 Netofat mi Baana naupa Heled hai, Benjamin mi Gilead-a inthoka hung Ribai naupa Ithai hai, 30 Pirathon mi Benaia hai, Gaash varuoma mi Hidai hai, 31 Arbat mi Abi-Albon hai, Barhum mi Azmavet hai, 32 Salbon mi Eliaba, Jasena nauhai laia mi Jonathan hai, 33 Harar mi Sama hai, Harar mi bok Sarar naupa Ahiam hai, 34 Makat mi Ahasbai naupa Elifelet hai, Gilon mi Ahitofel naupa Eliam hai, 35 Karmel mi Hezro hai, Arba mi Parai hai, 36 Zoba khaw mi Nathan naupa Igal hai, Gad mi Bania hai, Hagri (Hagadi) naupa hai, 37 Amon mi Zelek dam, Zeruia naupa Joab ralthuom chawitu Beerot mi Naharai hai, 38 Jatir mi Ira le Gareb hai, 39 Hit mi Uria hai an nih.
Chuonghai chu sipai huoisen hmingthang sawmthum le pasarihai chu an nih.