Lal Saula a thi
10
1 Filistinhai chun Israelhai chu an bei a, an hmaah Israelhai an tlansie a, Gilboa tlanga chun tam tak an that a. 2 Filistinhai chun Saula le a nauhai chu an hnot ngat ngat a, Jonathan le Abinadab le Malki-Sua hai chu an that a. 3 Saula thrangna hmun lai chu an inbei nasa hle a, thal kaptuhai chun an hung hnot phak a, an inhliem ta a. 4 Saula chun a ralthuom chawitu kuomah, “I kawlhnâm kha phawi la, mi hung sun tlang rawh, hieng sertan lohai hin mi uongkhum pal rawi an tih” a ta. Sienkhom, a ralthuom chawitu chu a pang an za leiin a sun ngam naw. Saula chun a kawlhnâm chu a lâk a, a baw ta a. 5 A ralthuom chawitu chun Saula a thi ti a hriet chun a kawlhnâm chu a baw ve a, a thi ve ta a. 6 Saula le a nau pathumhai chu an thi a, an thi ruolin an lalna khom a mang ta nghal a nih. 7 Jereel ruoma um Israelhaiin sipai an tlansiet thu le Saula le a nauhai an thi thu an hriet chun an khuo an tlansietsan a. Filistinhai chu an hung a, an hluo ta a.8 A zinga chun Filistinhai chu an ral thathai thuom va rok dingin an fe a, Gilboa tlanga Saula le a naupahai chu thiin an va hmu a. 9 Saula lu chu an lak a, a ralthuom chu an hlîppek a, a lu le a ralthuom chu an lak a, an pathien lem biekhai le mipui po po kuomah chanchin chu puong dar dingin Filistin ram pumpuia chun zuolko an intlantir a. 10 A ralthuom chu an pathien tempulah an sie a, a lu chu an Dagon tempula chun an tàr a.
11 Jabesh-Gilead mihaiin Filistinhaiin Saula an soisak dan po po an lo hriet a, 12 an mi huoisen po po chu an inthok suok a, Saula le a naupahai ruong chu an va lak a, Jabesh-ah an hung hawn a, an ruhai chu Jabesh-a saisuo kung lien hnuoia chun an phùm a, ni sari bu an nghei a. 13 Saula chu LALPA lakah a ringum naw a, LALPA thu a zawm nuom naw a, 14 thruoitu dinga LALPA rawn nêkin ramhuoi zawl, rau ko thiem le aisan thiemhai chen a rawn lem leiin LALPAN a sukhlum a, a ram khom Jesai naupa Davida kuomah a pêk lem tah a nih.