8 Gad mihai laia threnkhat chu thlaler kula Davida a um laiin ama tieng an hung pakai a. Anni chu mi huoisen, indo thiem, phaw le fei hmang thiem le sakeibaknei hmel ang put, tlanga sazuk tuoi anga zuonzâng an nih. 9 An hotu tak chu Ezer a na, a pahnina Obadia, a pathumna Eliab, 10 a palina Mismana, a pangana Jeremia, 11 a parukna Atai, a pasarina Eliel, 12 a parietna Johanan, a pakuona Elzabad, 13 a sawmna Jeremia le a sawmpakhatna Makbanai a nih.

14 Chuong Gad mihai chu sipai hotu an na, anni laia hrat naw tak khomin mi za a hen a, a hrat tak chun mi sangkhat a hen a nih. 15 Anni hi a nih thla khatnaa Jordan vadung kuong a liem zur zur lai khoma pal kai a, ruoma chenghai sak le thlanga inrel suoktirtu chu.

16 Benjaminhai le Judahai laia threnkhat chu kulah Davida kuomah an fe a. 17 Davida chun anni chu a lo hmuok a, “A thra tienga mi thrangpui dinga ka kuoma hung in ni chun lungril takin ka lawm lut cheu a, amiruokchu, in chungah ieng khom poi ka tawk naw sa khoma ka hmelmahai mi’n mantir tuma hung in ni chun, ei pi le puhai Pathien chun inchikin hrem cheu raw se” a ta. 18 Chuongchun, sawmthumhai hotu Amisai chunga chun thlarau a hung tlung a,

19 Saula do dinga Filistinhai an inthok laiin Davida khom anni tieng a thrang ve a, Manase-hai laia mi threnkhat chu Davida tieng an hung pakai bok a. (Amiruokchu, Davida le a mihai chun Filistinhai chu an thrangpui ta nawh. Filistin hotuhai an inrawn hnung chun, “A pu Saula tieng pakai a ta, ei lu chân hlau rawi ei tih” an ti a, an hnar kìr tah a nih.) 20 Ziklag-a Davida a fe laia a kuom tienga Manase mi hung pakaihai chu Adnan, Jozabad, Jediael, Mikael, Jozabad, Elihu le Zilethai hai an na, sipai sangkhat chung peia hotu vong an nih. 21 Rûkràla che pawlin Davida an hung bei laia lo dopuitu mi huoisen an na, a sipai hotu vong an nih. 22 Pathien sipaihai tluka ropuia a sipaihai an din chenin Davida tienga thrang chu ni tin ni tinin an hung pung tuol tuol a.

23 LALPAN a hril anga Saula lalram Davida kuta inhlàn dinga Hebron khuoa inralthuom sa ngot Davida kuoma hung zat chu: 24 Juda thla, phaw le fei chawia indo dinga inralthuom mi sangruk le zariet; 25 Simeon thlaa mi huoisen, indo dinga inralthuom mi sangsari le zakhat; 26 Levi thlaa mi sangli le zaruk; 27 Aron thlahai thruoitu Jehoiada le rawihai mi sangthum le zasari; 28 tlangval huoisen Zadok le a sungkuo laia mi, sipai hotu sawmhni le pahnih; 29 Benjamin thla, Saula chipuihai mi sangthum (Benjamin hnama mi tam lem chu Saula trantu an la ni zing); 30 Efraim thlaa mi, mi hrat huoisen, an sungkuo laia mi hmingthang ngot singhni le zariet; 31 Manase hnam zatve laia mi, lala Davida siem dinga an tir suok singkhat le sangriet; 32 Isakar thlaa mi, thil chinchang hrie le Israelhaiin iem a na an thaw ding ti hre chieng, hotu zahni le an thu hnuoia um an sungkuohai po po leh; 33 Zebulun thlahai, hriemhrei tinreng hmanga indo thiem, Davida laka ringum taka um, thrangpui dinga inralring zing mi singnga; 34 Naftalia thlaa mi ofisar sangkhat le phaw le fei chawi sipai singthum le sangsari; 35 Dana thlaa mi, indo dinga inpei sa singhni sangriet le zaruk; 36 Aser thlaa mi, indo thiem le indo dinga inralring zing singli; 37 Jordan vadung sak tienga cheng Reuben hnam, Gad hnam le Manase hnam zatvea inthokin inralthuom sa nuoikhat le singhni an nih.

38 Chuonghai po po chu raldo dinga mani nuom thua inpe, Davida chu Israel ram pumpuia lala siem ngei dinga Hebron-a hung an nih. Chun, Israel dang po po khom Davida chu lala siem dingin an khuongruol vong a. 39 Davida kuoma chun ni thum faa dawnin an um a, chuonghai chu an unauhaiin an buotsaipek vong a nih. 40 Chu bakah, an unau hmun hlaa inthoka hung Isakar hai, Zebulun hai le Naftalia hai chun sabengtung dam, sanghawngsei dam, sakor dam le bawngchal dam hung thruoiin fak ding tam tak bei dam, theichang pèr dam, grêp ra em trawl dam, uoiin dam, hriek dam an hung phur a, bawngchal le beram an hung kei treu bok a, Israel ram chu lawmnain a sip a.