4 Saula chun a ralthuom chawitu kuomah, “I kawlhnâm phawi la, mi sun tlang rawh; chuong naw chun hieng sertan lohai hi hung an ta, mi hung sun tlang an ta, mi uongkhum pal rawi an tih” a ta, sienkhom a ralthuom chawitu pang chu a’n za leiin a thaw ngam naw a. Saula chun a kawlhnâm a lâk a, a baw a. 5 A ralthuom chawituin Saula a thi tah ti a hmu chun ama khomin a kawlhnâm a baw a, a thi ve ta a. 6 Chuong ang chun Saula le a naupa pathum le a ralthuom chawitu le a mihai po po chu ni khat thilthuah an thi ta vong a nih.

7 Saula le a naupahai an thi vong thu le Israel sipaihai an tlansie ti ruom ral khing tienga Israel umhai le Jordan rala umhaiin an lo hriet chun an khuohai suoksanin an tlanse a, Filistinhai chu an hung a, an khuohai chu an hluo ta a.

8 A zingah Filistinhaiin an ral thathai thuom hlippek dinga an va fe chun Saula le a nau pasal pathumhai chu Gilboa tlangah thiin an va hmu a. 9 Saula lu chu an tan a, a ralthuom chu an hlǐp a, a chanchin chu an milim biekna tempula hai le mihai kuoma puong dar dingin an thon dar a. 10 A ralthuom chu an pathiennu Astoret tempulah an sie a, a ruong chu Bethsan kul bangah an tăr a.

11 Jabesh Gilead-a umhaiin Filistin mihaiin Saula an thaw dàn an lo hriet chun, 12 a zân a zânin an mi huoisen po po chu Bethsan panin an inthok suok a, Saula ruong le a naupahai ruong chu Bethsan kul banga inthok chun an lăk thlăk a, Jabesh-ah an hung hawn a, chu taka chun an raw a. 13 An ruhai chu an rŭt khawm a, Jabesh-a tamarisk thingbuk hnuoiah an phŭm a, ni sari sung bu ngheiin an sŭn a.