Juda lal Manase
21
1 Lal a hung ni chun Manase chu kum sawm le kum hni mi chauh a la ni a, Jerusalemah kum sawmnga le kum nga ro a rèl a. A nu hming chu Hefziba a nih. 2 Israelhai hmaa LALPAN hnam a hnot suokhai thil chìng tirdakum takhai chu thaw vein LALPA mithmuah thil thra lo takhai a thaw hlak a. 3 A pa Hezekia thriek hnung hmunsânga an bawlhmunhai chu a’n din thar nawk a; Israel lal Ahab thaw dan angin Baal ta dingin maichàm a siem a, pathiennu Asera lim thing a siem a, vana ni le thla le arasihai a biek a, an rong a bawl a. 4 LALPAN, “Jerusalemah ka hming inumtir ka tih” a tina hmuna chun maichàm hrang hrang a siem a. 5 LALPA tempul inhuonna sung tuol zawl pahnia chun vana um po po ta dingin maichàm a siem a. 6 A naupa ngei khom meia inthawinaah a’n hlàn a, dawithiem a hmang a, aisan thiemhai a ruoi a, rau ko thiem le be thiemhai a rawn hlak a. Chuong ang chun thil suol tak el thawin LALPA suklungsen dingin a cho phawk hlak a.7,8 LALPAN Davida le Solomon kuoma, “Hi tempul le Israel hnamhai hmun po po laia ka thlang suok Jerusalema hin kumkhuoin ka hming inumtir ka ta, ka thupek po po le ka siehlaw Mosie-in Dan a pèkhai po po kha an zawm phot chun, an pi le puhai ka pèk tah rama inthok hin Israelhai ke chu inpên suoktir ta naw ning” a lo ti ta sa hmuna ngei chun Asera lim thing kerhai chu a sie a. 9 Mipuihai chun LALPA thu an zawm naw a, Manase chun a thruoi hmang tawl a, Israelhai hmaa LALPAN a hnot suok hnamhai nêk hmana nasain thil thra lo an thaw a.
10 LALPAN a siehlaw zawlneihai hmangin thu a hril a: 11 “Juda lal Manase hin hieng thil suol tirdakum tak hi a thaw a. A hmaa Amor mihai nêk hmanin thil suol a thaw nasa lem a, Judahai hi milim bieknaah a thruoi lut a. 12 Chuleiin, LALPA, Israelhai Pathien chun hieng hin a tih: ‘Ngai ta u, a hre taphot na khawk rum rum khopin Jerusalem le Juda chungah sietna ka hung intlungtir ding a nih. 13 Samaria ka hremna ang le Israel lal Ahab le a sungkuohai chunga ka thaw ang charin Jerusalem chunga khom thaw veng ka ta, miin thleng a hruk faia a’n khup angin, Jerusalem chu hrût fai ka ta, inkhup ka tih. 14 Ka rochana ka la hlà sunhai khom zamsan ka ta, an hmèlmahai kutah pe suok ka tih. 15 Aiguptaa inthoka an pi le puhai ka thruoi suoka inthokin voisun chen hin ka mithmuah thil suol an thaw a, ka lung suksen dinga an mi cho phawk leiin an hmèlmahai po poin rok an ta, suom an tih’ tiin” a ta.
16 Chu bakah, Manase chun thil suol tak thawa Judahai chu thil suol a’n thawtir el chauh khom ni loin, poi tawk lo thisen a’n suo nasa êm êm a, Jerusalem dung le khang a sip a nih.
17 Manase inlal laia thil tlung danghai, a thilthawhai le a suol thawhai chu Juda lalhai inlal lai chanchin inziekna lekhabuah a chuong. 18 Manase chu a thlatuhai kuomah a chawl a, a lal ina huon, Uza huona chun an phŭm a, a naupa Amon chun a lalna chu a hung hluo ta a.
Juda lal Amon
19 Lal a hung ni chun Amon chu kum sawmhni le kum hni mi a na, Jerusalemah kum hnih a’n lal a, a nu hming chu Mesulemet a na, Jotba khuoa Haruz naunu a nih. 20 A pa Manase ang bokin LALPA mithmuah thil suol a thaw a. 21 A pa lampui hraw po po a hraw ve a, milimhai bein an rong a bawl a. 22 LALPA, a thlatuhai Pathien chu a maksan a, LALPA lampui hrim a hraw nawh.
23 A thoktuhaiin Amon chu an phier rùk a, lal inah an that a. 24 Chu zoah mipuiin lal Amon phiertu po chu an that vong a, a naupa Josia chu ama hmunah lalah an sie a.