Israel lal nuhnung tak Hosea
17
1 Juda lal Ahaz inlala inthoka kum sawm le kum hninaa chun Ela naupa Hosea chu Samaria khawpuiah Israel lalin a hung inthrung a, kum kuo ro a rèl a. 2 LALPA mithmuin thil thra lo tak a thaw a, amiruokchu a hmaa lalhai ang èma nasa chun a thaw ve nawh. 3 Asuria lal Salmaneser-in a hung rùn a, sie khuoah a siem a, a kuomah sie a chawi hlak a. 4 Hosea chun a phier ruk a, Aigupta lal So kuomah mi a tir a, chu thu Asuria lalin a lo hriet bakah kum tina a chawi hlak sie chu a hung pèk ta bok naw leiin Hosea chu Salmaneser chun a man a, lung inah a khum a. 5 Asuria lal chun a ram pumpui chu a hung rùn a, Samaria khawpuiah a hang fe a, kum thum zet a’n huol a. 6 Hosea inlala inthoka kum kuonaa chun Asuria lal chun Samaria khawpui chu a lâk a, Israelhai chu Assuria ram tieng salin a thruoi a, Hala rama dam, Gozan rama Habor vadung phaia hai le Medes-hai khuoa dam a’n umtir a.Suol leia Israelhai tluksietna
7 Aigupta lal Faraw kut hnuoia inthoka hung thruoi suoktu LALPA an Pathien chungah thil suol thaw a, pathien danghai an bieksan leiin hieng thil hi a hung tlung tah a nih. 8 An hmaa LALPAN a hnot suok hnam danghai khawsak dan angin an khawsa a, Israel lalhai ngeiin thil thra lo an hung chìng ve ta pei a. 9 Israelhai chun LALPA an Pathien theida zawng thil thra lo arûkin an thaw a; ralvêng bûk insâng le kula inhuon khuo taphotah an ta dingin hmunsâng an siem a. 10 Tlang sang tina le thing buk inzar lien taphot hnuoiah lung milim le Asera lim hai an inngir khep khup a. 11 An hmaa LALPAN a hnot suok hnam danghai ang bokin hmunsânga an bawlhmun taphotah rimtui an inhlàn a. Chuong ang thil rilo chu thawin LALPA lungsen an cho suok a. 12 LALPAN, “Hieng thil hi thaw ve naw ro” ti sien khom milim an biek a. 13 LALPA chun, “In um dàn suolhai maksanin, zawm dinga ka siehlaw zawlneihai hmanga in pi le puhai ka pèk Danhai po po le ka thupêkhai le thu suokhai chu zawm ro” tiin Israelhai le Judahai chu zawlnei tin le thil hmutheituhai chu hmangin LALPAN a hril hlak a. 14 Chuong sà khom chun an ngaithlak nuom naw a, LALPA an Pathien ring zo nuom loin, an pi le puhai ang bokin, lulul an insuo ve a. 15 A thupêkhai le an pi le pua inthoka a thu lo thlunghai le an kuoma thu a lo inhriettirhai chu an hnawl a. Milim hmangna bo an zui a, mi hmangna boah an insiem a. LALPAN, “Anni ang chun thaw ve naw ro” lo ti sien khom an kawl le kienga hnam danghai thaw dan an làk a. 16 LALPA an Pathien thupek po po nghatsanin milim pahni, bawngte lim an sung a, Asera lim thing an siem a, vana ni le thla le arasihai an biek a, Baal bein a rong an bawl bok a. 17 An naupahai le naunuhai chu meiah an inhlàn a. Aien le dawi an chìng a, LALPA lungsenna cho phawk dingin a mithmuah thil suol thawin an inzor a.
18 Chuleiin, LALPA chu Israelhai chungah a lung a sen ta êm êm a, a mithmu phak loah a son hmang dai a, Juda hnam chauh naw chu a um an um ta nawh. 19 Judahai khom chun LALPA an Pathien thupek chu an zawm naw a, Israelhai thil chìng bok chu an hung chìng ve a. 20 LALPAN Israel thlahai hrim hrim chu a hnawl a, a hrem a, a mithmu phak loa a son bo dai hmâ khat chun roktuhai kutah a pêk suok ta a.
21 Davida sungkuoa inthoka Israel a lak hmang chun an lal dingin Nebat naupa Jeroboam chu an siem a, Jeroboam chun Israelhai chu LALPA zui lo dinga zawr hmangin, suol nasa tak an thawtir a. 22 Israelhai chun Jeroboam hnung chu zuiin, thil suol a thaw hai chu an thaw ve pei a. 23 LALPAN a siehlaw zawlneihai po po hmanga a lo hril lawk tah ang khan a mithmu phak loa a hnot hmang tawl tah nghe nghe a. Chuongchun, Israelhai chu an rama inthokin Asuria ramah salin an thruoi a, tu chen hin an la um a nih.
Asuria mihaiin Israel ram an hluo
24 Asuria lal chun Babulon dam, Kutha dam, Ava dam, Hamath le Sefarvaim khuoa mihai dam chu Samaria rama Israel thlahai hmun le hma hluo sip dingin a’n chà khawm a, Samari ram chu an hung hluo a, an khuoa hai chun umhmun an khuor a. 25 An um hlim chun LALPA an chawibiek naw leiin ama chun anni lai sakeibaknei ruol a tir a, a thren an se hlum a. 26 Chuongchun, Asuria lal kuomah, “Samaria ram hluo dinga i hung son hnamhai hin hieng lai ram Pathien biek dan hi an hriet ve naw leiin ama chun anni lai sakeibaknei ruol a tir a, hieng lai ram Pathien biek dan hre lohai chu an se hlum tawl a nih” tiin ripawt an thon a.
27 Asuria lal chun, “Samaria-a inthoka sala in thruoihai laia thiempu pakhat kha thruoi kîr unla, nangni lai um ve sien, chu ram Pathien biek dan chu zirtir raw se cheu” tiin thu a pêk a. 28 Chuongchun, Samari rama inthoka an thruoi laia thiempu pakhat chu Bethel-ah a va um a, an thaw dan ding a zirtir a.
29 Amiruokchu, hnam tinin khaw hrang hrangah anni puol senga ding pathien an siem a, Samaria mihaiin hmunsânga biekbuk an lo bawlhaia chun an sie a. 30 Babulona mihai chun Sukot Benot an biek a, Kuthahaiin Nergal an biek a, Hamath mihai chun Asima an biek a. 31 Avit-hai chun Nibhaz le Tartak an biek a, Sefarvit-hai chu Sefarvaimhai pathien Andramelek le Anamalek kuomah inthawiin an nauhai meiah an inhlàn hlak a. 32 LALPA an chawibieka chu hmunsanga an bawlhmuna hai anni aia inthawina inhlantu dingin thiempu an nuom nuom an ruot hlak a. 33 LALPA an chawibieka chu an hungna rama an chìng dan ang sengin an pathienhai rong an la bawl zing tho.
34 Tu chen hin an ching dan pangngai an la thlakthleng nawh. LALPA an biek tak tak nawh, LALPAN Jakob, ‘Israel’ ti hminga a ko thlahai kuoma dan le thu a pekhai chu an zawm bok nawh. 35 LALPAN Israelhai kuoma thu a thlung khan, “Pathien danghai be naw unla, an hmaah kûnin, an rong bawl naw unla, an kuomah thilhlân inhlàn bok naw ro. 36 Kei LALPA, thilthawtheina nasa tak leh ban phar meua Aigupta rama inthoka thruoi suoktu cheu hi a nih in biek ding chu. A hmaa chun kun unla, a kuomah hlanbiek inhlàn ro. 37 In ta dinga ziek a thuruothai, rorêlhai, danhai le thupêkhai chu fimkhur takin zawm hlak ro. Pathien danghai chawibiek naw ro. 38 Nangni le thuthlung ka siem kha theinghil naw unla, pathien danghai be naw ro. 39 LALPA in Pathien chauh be ro; ama chu in hmèlmahai kuta inthoka sansuoktu ding cheu chu a ni si a” tiin a lo hril a. 40 Amiruokchu, iengti kong khomin a thu chu an pom nuom chuong naw a, kha hmaa an chìng dan pangngai kha an la sunzom zing tho.
41 Chuongchun, hieng mihai hin LALPA be hai sienkhom an milemhai rong an la bawl zui zing bok a. Tu chen hin an tu le tehai chen khomin an pi le puhai thaw dan angin an la thaw zing a nih.