3 An lal tran kum thla khatnaa chun LALPA Tempul kotkharhai chu a hong a, a chei thra a. 4 Thiempuhai le Levihai chu a thruoi lut a, suo tienga kot zawla chun a ko khawm a. 5 Chun, an kuomah, “Nangni Levihai, ka thu hi ngaithla ro. Tuhin nangni insukthienghlim phot unla, LALPA, in pi le puhai Pathien Tempul hi inthien fai unla, Hmun Thienghlima inthokin thil porche po po inthiel fai vong ro. 6 Ei pi le puhai chu an lo ringum naw a, LALPA ei Pathien mithmuah thil suol an thaw a, ama an nghatsan a. LALPA chengna hmun chu an nghatsan a, an lo hnungson ta a. 7 A hulhliepa kotkharhai chu an khàr a, khawnvarhai chu an sukmit a. Israelhai Pathien hmun thienghlima chun rimtui an raw ta naw a, pumraw thilhlân an inhlàn ta bok nawh. 8 Chuleiin, Judahai le Jerusalem chungah LALPA lungsenna chu a tla a, in mit ngeia in hmu ang hin mi pangzat le makti le nuizatbûr dingin a lo siem tah a nih. 9 Hieng lei hin an nawm ei pi le puhai kha kawlhnâma sàm thlukin an lo um a, an naupa le naunu le nuhmeihai chu mi salah an um chu nih. 10 A lungsen inling chu an kieng theina dingin, LALPA, Israelhai Pathien kuomah thuthlung thlung ka tum a nih. 11 Ka nauhai, LALPA chun a rongbawltu ni a, a hmaa ngira a rong chu bawl ding le rimtui inhlàn dinga a ruot chêu in ni leiin, tu hin chu inthlàdà ta hrim hrim naw ro” a ta.

12 Chuongchun, Levihai chu an inthok suok a. Chuonghai chu, Kohat thlaa inthokin Amasai naupa Mahat le Azaria naupa Joel; Merari thlaa inthokin Abdi naupa Kisa le Jehalelel naupa Azaria; Gerson thlaa inthokin Zima naupa Joa le Joa naupa Eden; 13 Elizafan thlaa inthokin Simri le Jeiel; Asaf thlaa inthokin Zekaria le Matania; 14 Heman thlaa inthokin Jehiel le Simei; Jeduthan thlaa inthokin Semaia le Uziel an nih.

15 Anni chun an unauhai an ko khawm a, an insukthienghlim a, LALPA thua lal thupêk angin LALPA Tempul chu sukfai dingin an lùt a. 16 Thiempuhai chu LALPA Hmun Thienghlim inthiel fai dingin an lut a, LALPA Tempul sunga thil thieng lo an hmu po po chu LALPA Tempul tuolzawla chun an hung lak suok a, chu chu Levihaiin an lak a, Kidron varuomah an fepui a. 17 Thla khatna ni khat nia inthienna sin an bei tran chu a ni rietnaa chun LALPA hulhliep chen an phàk hman a. Ni riet dang LALPA Tempul inthien chu an bei nawk a, thla khatna, ni sawm le ni ruk ni chun an zo fel ta a.

18 Chu zoa chun lal Hezekia kuomah an fe a, “LALPA Tempul chu kan inthien fai vong ta a, pumraw thilhlân inhlànna maicham hai, chu taka hmang bûr le bèl po po hai, hlanbei siena dawkan hai le hmangruo dang po po khom. 19 Chun, Ahaz inlal laia depde taka thil a lak hmang po po kan inchik vong a, kan inthien bok a, tu hin LALPA maichàm hmaah a um” an ta.

20 Hezekia chu zing inhma takin a tho a, khawpuia mi lienhai chu a ko khawm a, LALPA Tempulah a hang fepui a. 21 Ram le Hmun Thienghlim le Judahai ta dinga suol ngaidamna thilhlâna dingin bawngchal pasari, beramchal pasari, beramchal te pasari le kelchal pasari an kei a, Aron thla thiempuhai kuoma chun LALPA maichàma inhlàn dingin a pèk a. 22 Bawngchalhai chu an that a, thiempuhai chun a thisen chu an lak a, maicham chu an the a. Beramchalhai khom chu an that a, a thisen chun maichàm chu an the a. Beramtehai khom chu an that a, a thisen chun maicham chu an the a. 23 Suol ngaidamna thilhlana ding kelchalhai chu lal le pungkhawmhai hmaa chun an hung kei a, an lu chungah kut an innghat a. 24 Thiempuhai chun an that a, lalin Israel mihai po po ta dinga pumraw thilhlân le inremna thilhlân inhlàn dinga thu a pèk angin, kel thisen chu Israel mi po po ta dinga inremna siemna dingin maichama chun suol ngaidamna thilhlânah an inhlàn a.

25 Davida le lal zawlnei Gad le zawlnei Nathan thupek angin, LALPA tempula chun Levihai chu darbenthek hai, perkhuong hai le tringtrang hai tum dingin lal chun a sie a; chu chu a zawlneihai hmanga LALPA thupèk a ni si a. 26 Levihai chun Davida insiemtir rimawi hmangruohai chu chawiin inring zingin an ngir a, thiempuhai chun tawtawrawt an chawi bok a.

27 Hezekia chun pumraw thilhlân chu inhlàn ta dingin thu a pêk a. An inhlàn tran chun tawtawrawt le Israel lal Davida insiemtir rimawihai leh remin LALPA hla chu an sak tran ve a. 28 Hla sak pawlin hla sak a, tawtawrawt muttuhaiin an mut lai chun LALPA chawibiekin mipuihai chu an kûn a, chuong ang chun pumraw thilhlân an zo chenin an thaw a.

29 Hlanbiekna thilhlânhai an inhlàn zo chun lal le a kuoma um po po chun dingthrathruonin Pathien an chawibiek a. 30 Lal Hezekia le a thoktuhai chun Davida phuok le zawlnei Asaf phuok inpakna hla sak dingin Levihai chu thu an pèk a. Chuongchun, hlim takin inpakna hla chu an sak a, kûnin Pathien an chawibiek a.

31 Hezekia chun, “Tuhin LALPA ta dingin nangni in inthien thienghlim ta a. Hung hnai unla, LALPA Tempula thil inhlan ding le lawmthu hrilna thilhlân hai chu hung lain hung inhlàn ta ro khai” a ta. Mipuihai chun thilhlan hai le lawmthu hrilna thilhlânhai an hung inhlàn a; a nuom taphotin pumraw thilhlân an hung inhlân bok a. 32 Mipuiin pumraw thilhlân an hung inhlàn zat chu bawngchal sawmsari le beramchal za le beramte zahni a na, chuonghai po po chu LALPA ta dinga pumraw thilhlân vong a nih. 33 Thilhlân po po chu bawngchal zaruk le beram sangthum a nih.

34 Amiruokchu, thiempu an tlawm taluo a, pumraw thilhlân chu a vun an inhlip seng naw a. Thiempu danghai an insukthienghlim hma po le an sin an zo hma po chu an unau Levihaiin an thrangpui a (Levihai chu insukthieng thuah thiempuhai nêk hmanin an khermei lem si a). 35 Pumraw thilhlân chu a tam hle a, pumraw thilhlân le inkopa inhlàn hlak inremna thilhlâna ding thau hai, dawn ding thilhlâna ding uoiin hai khom chu a tam êm êm el a. Chuleiin, LALPA tempula rongbawl dan kalhmang khom an siem thra a. 36 LALPA thrangpuina zara chuong po po chu hun sawt nawte sunga an thaw thei leiin Hezekia le mipuihai chu an hlim êm êm a.