Jerusalemah Thuthlung Bawm an laklut
(1 Kro 13:1-14; 15:25-16:6,43)
6
1 Davida chun Israelhai laia a mi thlang thrieu singthum a ko khawm nawk a. 2 Judai ram Baala khuoa inthoka Pathien Thuthlung Bawm, cherubhai kara lalthrungphaa inthrung Iengkim LALPA hming an inputtir chu zu la dingin a kuoma mi um po po le chun Davida chu a’n thok suok a. 3 Pathien Bawm chu tlânga Abinadab ina inthok chun an lăk suok a, tawlailir tharah an sie a, Abinadab naupahai Uza le Ahio chun tawlailir thar chu an khal a. 4 Pathien Bawm chu tawlailir chungah an sie a, Ahio chu a hmaa chun a fe a. 5 Davida le Israel sungkuo po pohai chun LALPA hmaah thil inri thei chi hrang hrang tringtrang dam, perkhuong dam, khuongte dam, tawtawrawt bi nei dam le darbenthek dam tumin theitawpin an lawm a.6 Nakon hrizawl an tlung chun bawngchal chu a petek leiin Uza chun Pathien Bawm chu a kutin a zuk chel a. 7 LALPA lung chu Uza chungah a sen thut a, a thilthaw indik naw leiin chu taka chun Pathienin a sukhlum a, Pathien Bawm bula chun a thi a. 8 Uza chunga LALPA a truong leiin Davida lung chu a sen hle a, chu hmun chu Perez Uza a’n bûk a, tu chen hin chu hming chu a la put ta zing a nih. 9 Chu ni chun Davidan LALPA chu a tri a, “Iengtin am LALPA Bawm chu ka kuom a hung tlung thei ta ding maw?” a ta. 10 Davida Khawpuia ama kuoma LALPA Bawm son lut chu a nuom ta naw a, Git mi Obed-Edom in tieng chun a sie ta lem a. 11 LALPA Bawm chu Git mi Obed-Edom ina chun thla thum a um a, Obed-Edom le a sungkuohai po po chu LALPAN mal a sawm a.
12 Pathien Bawm leia Obed-Edom sungkuohai le an thil nei iengkim LALPAN mal a sawm nasatzie lal Davida an hril chun a fe thlăk a, Pathien Bawm chu Obed-Edom ina inthokin Davida Khawpuia chun hlim takin a hung lăk tung a. 13 LALPA Bawm zawntuhaiin pên ruk an pèn chun bawngchal le bawng tuoi thâuin hlànbiek a thaw a. 14 Davida chun puon zai inhmia siem thiempu zakuo a hâk a, theitawpin LALPA hmaa chun a lâm a. 15 LALPA Bawm an lak tung lai chun Davida le Israel mihai po po chu an khĕk dur dur a, tawtawrawt an mut ruoi ruoi bok a. 16 Davida khuoa LALPA Bawm a lut lai chun Saula naunu Mikal chun tukvera inthokin a lo thlir a, LALPA hmaa Davida inchawma a lâm vel chu a hmu a, a lo inzăpui hle a.
17 Chuongchun, LALPA Bawm chu an lăk lŭt a, a siena dinga Davidan puon in a buotsai sunga a hmun dinga chun an sie a, Davida chun LALPA hmaah pumraw thilhlân le inremna thilhlân chu a’n hlàn a. 18 Pumraw thilhlân le inremna thilhlân a’n hlàn zo chun Iengkim LALPA hmingin mipuihai chu mal a sawm a. 19 Israel mipui po po chu a nuhmei a pasalin bei tlang khat, sa tlang khat le grep em trawl bawr khat a pêk seng a.
20 Chuongchun mi po po chu mani in tieng an inlawi ta seng a, Davida khom a sunghai malsawm dingin an lawi ve ta a. Hmuok dingin Saula naunu Mikal chu a hung suok a, “Voisuna Israel lal chu a va ropui ngei de, mi ho tak, inzak nachang hre lo, saruoka um ang elin a siehlaw nunghakhai hmuah saruokin a um kha tie!” a lo ti a. 21 Davida chun Mikal kuomah, “I pa le a sunghai po po nêka mi thlang a, LALPA mi Israelhai chunga lala mi ruottu LALPA hmaa lâm ka ni lem; LALPA hmaah lawm ding ka ni hrim annawm. 22 Hieng nêk hmana inzapuium hin la um ka tih, keima ngei khom inzăpui ka tih; amiruokchu, chuong siehlaw nunghak i hrilhai chawimawi chun um ka tih” a ta.
23 Chuongchun, Saula naunu Mikal chun a thi chenin nau a nei nawh.