Israel lalah Davida a um
5
1 Israel pahnamhai po po chu Hebron-ah Davida kuomah an hung a, a kuomah “Ngai ta, i thisen inzompuihai kan ni hi. 2 Kha hmaa kan chunga Saula an lal lai khom khan râl beinaa mi thruoitu tak chu nangma i ni hlak a, LALPA chun i kuomah, ‘Ka mi Israelhai thruoi i ta, an lalah i um ding a nih’ a ti chê a ni kha” an ta.3 Israel upahai po poin Hebron-ah Lal Davida kuom an hung tlung chun anni chu LALPA hmaah thu a lo thlungpui a, Davida chu an lal dingin Hebrona chun hriek an năl a. 4 Lal a hung ni chun Davida chu kum sawmthum mi a ni ta a, kum sawmli ro a rĕl a. 5 Hebrona inthokin Judai ramah kum sari le thla ruk a’n lal a, Jerusalema inthokin Israel ram po po le Judai ramah kum sawmthum le kum thum a’n lal a nih.
Davidan Jerusalem a lâk
6 Chun, lal le a mihai chu Jerusalem hluotu Jebuhai do dingin an inthok suok a. Jebuhai chun Davida kuomah, “Hi taka hin lut naw top i tih, mitdel le kebaihai chauh khomin lo dang el an ti che” an ta. Anni chun an lungrilin, “Davida a lût thei teuh awm naw êm el” an ti a nih. 7 Amiruokchu, Davida chun Zion kul chu a lâk a, chu chu Davida Khawpui chu a nih.
8 Chu ni chun Davidan a mihai kuomah “Nangni lai hin keima anga that nuom khopa Jebuhai theidatu in um ve am? Jebuhai hnĕ ding chun tui hor kuo-ah lût inla, mitdel le kebaihai chu hlukhum ro” a ta. Chu lei tak chu annawm, ‘Mitdel le kebaihai chu lal inah an lùt ding a ni nawh’ ti a ni ta zing hi.
9 Davida chun kul sungah umhmun a khuor a, a hmingah Davida Khuo tiin a’n bùk a. A muol suo tienga kul thrut dinga hnuoi an sung zawla inthoka tranin a vel tuokin khawpui a rem a. 10 Iengkim LALPA Pathienin a umpui leiin a hung ropui ta deu deu a. 11 Tura lal Hiram chun Davida kuomah mi a tir a, sidar thinghai a thon a, themthiemhai le lung ser thiemhai a tir bok a, Davida chu lal in a bawlpek a. 12 LALPAN a mi Israelhai zărin Israel mihai chungah lalin ama chu a suknghet a nih ti le a ram khom chu a chawisang a nih ti Davida chun a hriet a.
13 Hebron a suoksan hnungin Davida chun Jerusalemah nuhmei le hmei a nei belsa a, naupa le naunu khom a la nei sa a. 14 Chuong a nauhai chu Samua hai, Sobab hai, Nathan hai, Solomon hai, 15 Ibar hai, Elisua hai, Nefek hai, Jafia hai, 16 Elisama hai, Eliada hai le Elifelet hai an nih.
Davidan Filistinhai a hnè
17 Davida chu Israel mihai lal dingin hriek an năl ti Filistinhaiin an hriet chun ama zong dingin burip takin an inthok tung a, sienkhom Davida chun a lo hriet a, kulbîngah a fe thlăk a. 18 Filistin mihai chu an hung tlung a, Refaim ruoma chun an inzar phei a. 19 Davida chun LALPA kuomah, “Fein Filistinhai chu ka bei di’m a ni? Anni chu ka kutah i pêk ding am a ni?” tiin a rawn a. LALPA chun, “Fe rawh, Filistinhai chu i kutah pe ngéi ngèi ka ti chê” a ta.
20 Davida chu Baal Perazim-ah a fe a, anni chu a hne a, “LALPAN ka hmêlmahai chu tuiting inthrè ang elin ka hmaah a sukdar vong tah” a ta. Chuleiin, hi hmun hminga hin Baal Perazim a’n bŭk a. 21 Chu taka chun Filistinhaiin an milimhai an tlansan a, Davida le a mihai chun an lăk a.
22 Filistin mihai chu an hung tung nawk a, Refaim ruoma chun an inzar nawk a. 23 Davidan LALPA a rawn a, ama chun, “Anni chu pan tung loin an hnung tieng inhuol la, balsam thing zawna khin hang bei rawh. 24 Balsam thingbuk chunga ke pen ri i hriet charin inrang takin che nghal rawh, Filistin sipaihai do dingin i hmaah LALPA a fe tìna a nih” a ta.
25 LALPAN thû a pèk angin Davida chun a thaw a, Filistin mihai chu Gibeon-aa inthoka Gezer chenin a hnĕ ta vong a.