Thuthlung Bawm
13
1 Davida chun mi sangkhat chunga kawmandarhai le zakhat chunga kawmandar tinhai chu a’n rawnpui a. 2 Chu zoah Israel pungkhawmhai po po kuoma chun, “Thra in ti zawng a ni a, LALPA ei Pathien remti zawng a ni bok chun, Israel ram po poa ei unau la hung ve lohai le an kuoma um thiempuhai le Levi chihai, an khuo le ran tlatna hmuna chenghai po po chu hung ve dingin fiel ei tiu khai. 3 Ei Pathien Bawm hi la kir nawk ta’ng ei tiu, Saula inlal sung po khan ei ngaiven dèr si naw a” a ta. 4 Pungkhawmhai po po chun thil indik niin an hriet a, an remti a.5 Chuongchun, Davida chun Aigupta vadung Sihora inthoka Hamath khaw lutna chena Israel mi um po po chu Kiriat-Jearima um Pathien Bawm chu la dingin a ko khawm vong a. 6 Davida le mi po po chu Judai rama Baala khuo, Kiriat Jearim an tia chun cherubim thla zar kara inthrut LALPA hming chuongna Pathien Thuthlung Bawm chu la dingin an hang fe a. 7 Pathien Bawm chu Abinadab ina inthokin tawlailir tharin an fepui a, Uza le Ahio-in tawlailir chu an khal a. 8 Davida le Israel mi po po chun hla sakin, tringtrang hai, perkhuong hai, khuong hai, darbenthek hai, tawtawrawt hai tumin, Pathien hmaah an làm suou suou el a.
9 Chun, Kidon hrizawl an hang tlung chun bawnghai chu an inpal leiin Bawm chu chel nghet tumin Uza chun a zuk ban a. 10 Chu phing leh LALPA lung chu Uza chungah a sen thut a, Bawm a chel lei chun a sukhlum a, chu hmuna chun Pathien hmaah a thi ta a. 11 Uza chunga LALPAN kut a thlâk lei chun Davida lung chu a sen hle a, chu hmun chu tu chen hin Perez Uza ti a la ni zing.
12 Chu ni chun Davidan Pathien a trî hle a, “Iengtin am Pathien Bawm chu ka hawn thei hrim hrim ding a na?” a ta. 13 Pathien Bawm chu Davida khawpuia chun ama kuomah son ta loin, Git mi Obed-Edom inah a sie ta lem a. 14 Obed-Edom ina chun Pathien Bawm chu thla thum a um a, a sungkuo le a thil nei po po chu iengkimah LALPAN mal a sawm a.