Isboset an that
4
1 Saula naupa Isboset-in Hebrona Abner thi thu a lo hriet chun a lungril a zâm èm ém a, Israel mihai po po khom an thlaphăng a. 2 Saula naupa chun mi rûntu pawla hotu pahni a nei a, pakhat hming chu Baana a na, a dang hming chu Rekab a nih. Anni chu Benjamin thla Beerot mi Rimon naupahai an nih (Beerot chu Benjamin rama ngai a nih. 3 Beerot mihai chu Gitaim-ah an tlăn a, tu chen hin chu taka chun an la um zing.)4 Saula naupa Jonathan chun nau kebai a nei a. Jezreel-a inthoka Saula le Jonathan thi thu an lo hriet chun kum nga mi chauh a la ni a, a enkoltu chun a pom a, a tlànpui a, a’n hmaw taluona lamah a’n thlak pal a, a ke a hung inbai pha ta a. A hming chu Mefiboset a nih.
5 Beerot mi Rimon naupa Rekab le Baana hai chu Isboset in panin an fe a, ni sat vanglai tak, a sùn chawl lai chun a in chu an tlung a. 6 Bu la ding ni awm takin in sung ril tieng an lŭt a, a phingah an sun a, Rekab le a unaupa Baana chu an inrel hmang ta a.
7 A khuma a lo zal lai chun a nih inah an lut chu. An sun hlum hnung chun a lu chu an lăk a, an chawi a, Araba pal tlangin zankhuoin an fe a. 8 Hebrona chun Isboset lu chu Davida kuomah an hung chawi a, a kuomah, “Hi i hmêlma, i hringna la tumtu, Saula naupa Isboset lu chu a nih. LALPA chun ka lalpa phuba chu voisun hin Saula le a thlahai lakah a lakpek tah a nih” an ta.
9 Davida chun Beerot mi Rimon naupa Rekab le a unaupa Baana kuoma chun, “Ka mangangna po poa mi sansuoktu LALPA hring zing hmingin ka hril, 10 chanchin thra hung hawna inngaiin, ‘Ngai ta, Saula chu a thi tah’ tiin mi pakhatin a mi hung hril a, ama chu ka man a, Ziklag-ah ka that a; chu chu a chanchin thra hung intlun mana ka pĕk a nih. 11 Mi fel, ama in sung luma um, a khum laizawl ngeia mi suolin an that thisen man chu in lakah phut nawkzuolin, hi hnuoia inthok hin ka va hang sukbo chieng ding chĕu de aw!” a ta. 12 Davida chun a tlangvalhai chu thû a pêk a, anni chu an that a, an kut le ke an tan a, Hebrona dil kama chun an khăi a. Isboset lu ruok chu an lăk a, Hebron-a Abner thlăna chun an phŭm a.