Jerusalema Davida thilthaw
14
1 Tura lal Hiram chun Davida kuomah mi a tir a, a lal in bawlna ding sidar thing le a bawltu ding lung sertuhai le themthiemhai a thon bok a. 2 LALPAN Israelhai chunga lala a suknghetzie le a mi Israelhai zara a ram chu a chawisang a nizie Davida chun a hriet a.3 Jerusalema chun Davidan nuhmei a nei bel a, naupa le naunuhai a nei sa bok a. 4 Jerusalema a nau pienghai chu Samua, Sobab, Nathan, Solomon, 5 Ibar, Elisua, Elpelet, 6 Noga, Nefeg, Zafia, 7 Elisama, Beeliada (Eliada) le Elifelet hai an nih.
Filistinhai a hnè
8 Filistin mihaiin Davida chu Israel mi po po lalah hriek an nàl tah ti an hriet chun zong dingin an sipai po po leh an inthok suok a, sienkhom Davidan a lo hriet lawk leiin anni chu lo bei dingin a’n thok suok ve a. 9 Filistinhai chu an hung a, Refaim Ruom an hung rûn a. 10 Davida chun “Fe suokin Filistinhai chu ka do ding am a ni? Anni chu ka kutah i mi pèk ding am a nih?” tiin Pathien a rawn a. LALPA chun, “Hang fe rawh, anni chu i kutah pe’ng ka ti che” a ta.
11 Davida chu a mihai leh Baal-Perazim-ah a hang fe a, chu taka chun Filistinhai chu a hne a. Ama chun, “LALPAN ka kut hmangin, ka hmêlmahai chu tuiting inthrè angin a vuok dar vong tah” a ta, chu hmun hminga chun Baal Perazim a’n bûk a. 12 Filistinhai chun an pathien lemhai chu an tlansan a, Davida chun raw hmang vong dingin thu a pêk a.
13 Filistinhai chun Refaim ruom chu an hung rùn nawk a. 14 Davida chun Pathien a rawn nawk a, Pathien chun, “Ngil taka hang hmason chot el loin inhuol tawl la, balsam thing kung zawna son bei tawl rawh. 15 Balsam lèra ke pên ri tlut tlut i hriet charin anni chu bei rawh. Filistin sipaihai bei dingin i hmaah Pathien a fè tìna a nih” a ta. 16 Davida chun Pathienin a hril ang tak chun a thaw a, Filistin sipaihai chu Gibeon-a inthoka Gezer chen a that treu a. 17 Chuongchun, Davida hming chu a hung inthang ta hle a, LALPA leiin ama chu hnam tinin an tri ta a.