3 Kum sawmlina, thla sawm le pakhatna ni hmasa taka chun LALPAN Israelhai chungthua hril dinga thu a pĕk po po chu an kuomah Mosien a hril a. 4 Chu chu Hesbon-a um Amorhai lal Sihon a hnĕ hnung le Astarot-a um Basanhai lal Og chu Edrei hmuna a hnĕ hnung a nih. 5 Jordan vadung sak tieng Moab rama an um laia hi dân hi Mosien a puong tran a nih:

6 LALPA ei Pathien chun Horeb tlangah hieng ang hin a mi hril a: “Hi tlânga hin in chàm sawt tawk tah. 7 In riebŭkhai thriek unla, Amor mihai umna tlangram tieng inson suok unla, Araba le a sè vèl tlângrama hai, thlang tieng tlâng thrut phaizawla hai, sim tieng panga hai, Kanan mihai chĕngna tuipui kama hai, Lebanon tlang khĕla Eufretis Vadungpui chenin fe ro. 8 Ngai ta u, hi ram hi ka pêk ta chêu a nih. In thlatu Abraham hai, Isak hai, Jakob hai le an thla la hung pei dinghai kuoma inkhâm meua LALPAN a pĕk chêu rama chun lut unla, hluo ta ro” tiin.

9 Mosie chun mipuihai kuomah, “Keima ngot chun ka phur zo ta naw chêu a nih. 10 LALPA in Pathien chun a sukpung chêu a, vana arasi zât zeta tam in lo ni ta hi. 11 LALPA, in thlatuhai Pathien chun tuta in lĕt sangin sukpung sienla chêu, a tiem tah angin malsawm raw se cheu. 12 Amiruokchu, iengtin am keima chauh chun in harsatna hai, phurrik hai le in kăra thubuoihai chu phur zo ta’ng ka ta? 13 ‘In hnam chita inthokin mi var, thil chinchăng hrie le inzà phurhai chu thlang suok unla, in chunga rorêltuah sie tawl ka tih’ tiin ka biek chĕu a. 14 Chun, nangnin, ‘I thilthaw tum chu kan ta dingin a thra ngot el’ tiin in mi don a.

15 “Chuong ang chun in hnam chita mi challang, mi var le inzàum in hung thlang suokhai chu sâng chunga hai, za chunga hai, sawmnga chunga hai, sawm chunga hai rorêltu dinga siein, in hnam lukhâitu dinghai khom ka ruotpĕk chêu a. 16 In rorĕltuhai kuomah, ‘In unauhai kara thubuoi chu ngaithlapĕk unla, Israel unau le unau inkar amani le Israel unau le hnam dang inkara thubuoi ieng khom indik takin rêlpêk ro. 17 Thlei bik neiin rêl naw unla, mi chîn mi lien thu inang vongin ngaithlapĕk ro. Tu khom trì naw ro, in thu rĕl thlŭk chu Pathiena inthoka hung suok a ni si a. In ta dinga thu khir taluohai ruok chu ka kuomah hung put lût unla, lo ngaithlang ka tih’ tiin thu ka pêk a. 18 Chu lai chun in thaw ding thil danghai khom iengkim ka hril ta chêu kha.

19 “Chu zoah, LALPAN thu a mi pĕk angin Horeb tlanga inthokin ei suok a, in hmu tah thlalĕr zâu tak le trium tak chu fe thlengin Amor mihai chĕngna tlangram tieng panin, Kadesh Barnea chu ei tlung a. 20 Chun, in kuomah, ‘LALPA ei Pathienin a mi pek Amorhai chĕngna tlangram chu in hung tlung ta hi. 21 Ngai ta u, LALPA in Pathien chun hi ram hi a pêk ta chêu a nih. LALPA, in thlatuhai Pathienin a hril angin, hang fe unla, ram chu hang hluo ro. Tri naw unla, zâm bok naw ro’ tiin ka hril chêu a. 22 Chu phing leh inrêngin ka kuomah in hung a, ‘A ram hang thlithlai a, lampui ei hraw ding le khuo ei sir ding hai chanchin hung ripawt nawktu ding thlithlaitu tir hmasang ei tiu’ in ti a. 23 In thil rot chu thraa ka hriet leiin nangni laia mi sawm le pahnih, pahnam tina mi pakhat pei, ka thlang suok a. 24 Anni chu an suok a, tlangrama chun an kai a, Eskol ruom an tlung a, an thlithlai vong a. 25 A ram suok thei ra iemani zat hung hawn thlain, “LALPA ei Pathienin ram a mi pĕk chu ram thra tak a nih” tiin an hung ripawt a.

26 “Nisienlakhom, kai tung nuom loin, LALPA in Pathien thupêk laka chun in hel a. 27 In puon ina hai chun, ‘LALPAN a mi theida a, mi sukbohmang tumin Amorhai kuta pĕk dingin Aigupta rama inthokin a mi thruoi suok a nih. 28 Ieng leiin am ie ei pan tung ding? Ei unauhai hlak chun, ‘Chutaka umhai chu eini nêkin an lien a, an insang lem a, an khuohai a lien a, van tongin kul an nei a, mi lien Anak thlahai khom kan hmuh’, an ti nawk nghal a, lungril an sukzâm vong annawm” tiin in chier a.

29 “Chun, kei chun in kuomah, “Thlabâr naw unla, anni chu trì bok naw ro. 30 In hmathruoitu LALPA in Pathien chun, Aigupta rama in mithmua ngei a thawpek chêu ang khan, anni chu dopêk a ti chêu. 31 Thlalĕra in thang sung po khom khan pain a naupa a puok ang elin LALPA chun hi hmun chen hin a puok tlung chĕu ti in hriet si a. 32 Chuong sà khom chun LALPA in Pathien chu in la ring chuong nawh; 33 in hma a thruoi pei a, riebûk khuorna ding hmun a zongpĕk chêu a, zanah meichokin, sŭnah sûma thruoiin, in lampui ding a kawkhmu chêu a ni khah.

34 “In thil hrilhai LALPAN a hriet chun a lung a sen a, 35 ‘Hi suon suol taka mi tu el khom hin in pi le puhai kuoma inkhâm meua pĕk ka tiem ram chu hmu naw ni hai, 36 Jefune naupa Kaleb ti chauh naw chun. Ama chun hmung a ta, a sir ram chu ama le a thlahai kuomah pe’ng ka tih, lungril po poa LALPA a zui leiin” tiin a’n khâm a. 37 Nangni leiin ka chunga khom LALPA a lungsen a, ‘Nang khom lût bik naw ti nih. 38 I kaiza vengtu Nuna naupa Josua ruok chu lût a tih. Ama hi infui phûr rawh, Israelhai thruoiin a la’n hluotir ding a ni si a. 39 Naupang chikté tè, râllâka an lâk el dinga in hrilhai, tuta a sie a thra la hre thei lohai hi, chu rama chun lût an ta, anni chu pe’ng ka ta, hluo’ng an tih. 40 Nangni ruok chu hnung kir unla, Tuipui Sen tieng panna lam chu hrawin thlalĕr tieng pan ro’ tiin a hril a.

41 “Chun, nangnin, ‘LALPA chungah thilsuol kan lo thaw tah a nih. LALPA kan Pathien thu pèk angin kai tung kan ta, hang bei kan tih’ tiin in mi don a. Mi tinin ralthuom in inbel a, tlangram pan tung chu olsam hlè dingin in ngai a. 42 Sienkhom, LALPA chun ka kuomah, ‘Fe naw raw hai se, hang do bok naw raw hai se, nangni lai ka um naw ding a ni si a. In hmĕlmahaiin lo intlăwm an ti chêu tiin an kuomah hril rawh’ a mi ti a. 43 Chu thu chu ka hril chêu a, in pom nuom naw a, LALPA thupĕk chu kalin, awm-êu takin tlânga chun in hang fe lui a. 44 Chu tlâng hluotu Amorhai chun an lo bei chêu a, khuoi hon angin Seir tlànga inthokin Horma chenin an hnot thlŭr chêu a. 45 In hung kir a, LALPA hmaah in trap a, sienkhom LALPA chun in trap rawl chu a uksak naw a, a nâ a sit bok nawh. 46 Chuongchun, Kadesh-ah ni tam tak, in um pha a ni kha.