NAMBAR
Thuhma
Nambar hi Thuthlung Hlui Baibul ei hmang laia bu lina, bung 36 le chang 1288 a sei, kum 1450-1410 vela Israelhaiin Sinai thlalĕra inthoka Jordan vadung suo tieng an tlung chen, kum sawmli deuthaw sunga an inzinna chanchin Mosien a ziek a nih. Sinai tlang an suoksan hmain intiemna (census) an nei a, Jordan vadung sak tieng, Moab ram an tlungin intiemna an nei nawk a. Intiemna an nei inkara hin Israelhai chun Kanan ram sim tieng Kadesh Barnea an tlung a, chu taka inthoka fea ram tiem Kanan chu hang hluo dingin Pathienin a hril a, sienkhom a chier pawl le ngam lo pawl an um leiin a hnam pumin a hrem a, kum sawmli sung deuthaw thlalĕrah a’n văktir a. Thranghluihai an thi zo vong deuthaw hnungin, Kanan ram lut thei dingin Jordan vadung sak tieng a thruoi tlung a. Intiem hmasak le nuhnung le a kara thil tlunghai ziekna a ni leiin ‘Nambar’ ti hming hi an inputtir a nih. Hebrai tronga a bu hming chu ‘B’midbar’ a ni a, chu chu ‘Thlalĕr-ah’ tina a nih.
A bu thu chabi chu “tu khom ka ropuina le inchikna thil mak Aigupta ram le thlalĕra ka thawhai hmu ta si a, ka thu awi nuom loa voi sawm zet mi fietuhai hrim hrim chun, an pi le puhai kuoma inkhâm meua pĕk ka tiem ram chu hmu top naw ni hai; anni laia mi ngainêptu hrim hrim khomin hmu bok naw ni hai” (14:22-23) ti hi a nih.
A thu tlângpuihai
Israelhan Sinai tlang an suoksan (1:1-9:23)
Intiem hmasa tak (1:1-4:49)
Dan le thupêk hrang hrang (5:1-8:26)
Fekân Kŭt voi hnina (9:1-23)
Sinai tlanga inthoka Moab an tlung dan (10:1-21:35)
Moab-a thil tlunghai (22:1-32:42)
Aigupta-Moab chena an inzin dan (33:1-49)
Jordan kăn hmaa inrelbawl dan ding (33:50-36:13)