Thlalĕra an invâk hun
2
1 “Chuongchun kan inher kir a, LALPAN ka kuoma a hril angin Tuipui Sen tieng panna lam chu hrawin thlalĕr kan lŭt a, Seir tlang chu sawt tak kan hêl kan hêl a. 2 LALPA chun a mi biek a, 3 “Hi tlang hi in hĕl suok rawn ta a, hmar tieng pan ta ro. 4 Hieng ang hin mipuihai chu thu pe rawh: Seir tlanga um Esau thla, in unauhai ram chu in pal tlang ding a na, an tri ding chĕu a ni leiin fimkhur hlè ro. 5 Indo dingin cho naw ro, an ram chu kepha tiet khom ka pêk naw ding chĕu a nih. Seir tlangram hi Esau chanpuola ka pĕk a ni tah. 6 In fàk le dawn man khom a tangkaruoin in pĕk ding a nih. 7 LALPA in Pathien chun in kut sinthaw mal a sawm a, thlalĕr ram zâu tak in pal tlang lai khomin a enkâi zing chêu a. Kum sawmli sung hin LALPA in Pathien chun a umpui chêu a, tlaksam ieng khom in nei nawh,” tiin. 8 Chuong ang chun Elat le Ezion-geber a inthokin Araba lam chu hrawin kan unauhai, Seir tlanga um Esau thlahai ram chu kan pal tlang a, Moab thlalĕr panin kan fe a.9 “LALPA chun ka kuomah, ‘Moab-hai kha sukbuoi naw unla, indo dingin cho bok naw ro, an ram hlek khom ka pêk naw ding chĕu a nih. Ar khuo chu Lota thlahai chanpuola ka pĕk a ni tah’ a ta. 10 (Chu hmuna chun a hmain Anak-hai ang boka mi lien le dung insang Em an tihai chu tam tak an um hlak a. 11 Anni chu Anak-hai ang boka Refa tia ko ni hai sien khom Moab mihai chun Em tiin an ko a nih. 12 Chun, tuta hma chun Seir tlanga hin Hor-hai an um hlak a, sienkhom Esau thlahaiin an hlù suok a, an tukdol hnung chun an hmun chu a hluopek tah a nih, LALPAN Israelhai chanpuola ram a pĕk an thaw ang khan.)
13 “LALPA chun ka kuomah, ‘Tho unla, Zered varuom hi kân ro’ a ta, chuongchun kan fe kai a. 14 Kadesh-barnea kan suoksana inthoka Zered varuom kan kân chen inkara hin kum sawmthum pariet a tlâ a nih. Chu sung chun, an kuoma LALPA a’n khàm angin, chu suona mi laia râl do thei chin chu an mang fâi thrak a nih. 15 Mipui laia inthoka sukchimit an ni vong hmâ khat chu LALPA kutin a khing tlat tawl si a.
16 “Râl do thei chin an thi vong hnung chun 17 LALPAN a mi biek a, 18 ‘Voisun hin Moab ram chu Ar khuoah in fe thleng ding a nih. 19 Amon-hai umna in va paw phâ khom sukbuoi naw unla, indo dingin cho bok naw ro. Amon-hai ram chu Lota thlahai chanpuola ka pĕk tah a ni leiin an ram chu in puola dingin pe nawng ka ti chêu’ a ta.
20 “(Chu hmun khom chu a hmaa chêng hlak Refahai rama ngai a na, sienkhom Amon-hai chun anni chu Zamzumhai tiin an ko. 21 Mi lien tak, tam tak el, Anak-hai ang boka dung insang tak tak an nih. Anni rawi chu LALPAN a sukbohmang a, an umna chu Amon-haiin an hung hluo tah a nih. 22 Chuong ang bok chun LALPAN Seir tlanga um Esau thlahai ta ding khomin a thawpek a, Hor-hai chu a sukbohmang a, anni hmuna chun voisun chen hin an cheng tah a nih. 23 Khaw hrang hranga chêng, Gaza chena inzar Av-hai khom kha Kaptor-a inthoka hung Kaptora mihai chun an sukboral a, an umna hmun an hluopek tah a nih.)
24 “LALPA chun ka kuomah “Tuhin suok unla, Arnon Ruom fe thleng ro. Amon mi, Hesbon-a lal Sihon le a ram chu i kutah ka pêk tah. Hluo tran inla, indopui ro. 25 Voisuna inthok hin vankhup hnuoia hnam tin trìsimah siem ka ti che a, i chanchin an hriet ringot khomin thlabâr le beidongin inthin hâwp an tih’ a ta.
Israelhain Lal Sihon an hne
26 “Chuongchun, Kedemot thlalĕra inthokin Hesbon lal Sihon kuomah inremna thu inchawitirin palai ka tir a, 27 ‘I ram kan hraw tlang mi phalpêk raw khai. Lamlien peiah fe’ng kan ta, chang tieng amanih voi tieng amanih pêt naw’ng kan tih. 28 Kan fak ding bu le dawn ding tui min chawktir la, a man tangkaruoin pe’ng kan ti che. 29 Jordan kâna LALPA kan Pathien ram mi pĕk kan lŭt hmâ chenin, Seir tlanga um Esau thlahai le Ar khuoa um Moab mihaiin kan chunga an thaw angin, nang khomin kea i ram kan hraw tlang mi phalpêk hràm rawh’ tiin. 30 Sienkhom, Hesbon lal Sihon chun a ram kan hraw ding chu a phal nawh. LALPA in Pathien chun ama chu in kuta a pèk theina dingin a thlarau suklululin a lungril a sukkhaupĕk a, chu chu a thaw ta hrim a nih. 31 Chun, LALPAN ka kuomah, ‘Ngai ta, Sihon le a ram chu ka’n hlăn tran mĕk ta che a, tuhin a ram chu la la, hluo tran pei ta ro’ a ta.
32 “Sihon le a mihai po po chu mi bei dingin Jahaz-ah an hung a. 33 LALPA ei Pathien chun ama chu kan kutah a pêk a, ama le a naupahai le a sipaihai po po chu kan that vong a. 34 Chu trum chun a khuo po po chu kan lăk a, kan suksiet vong a, pasal, nuhmei le naupang tu khom damin kan hlà nawh. 35 An ranruolhai le khuo kan laknaa kan rallakhai ruok chu keini chanpuola dingin kan lăk a. 36 Arnon ruom sìra Aroer le a ruom panga khuohai le Gilead chenin kan ta dinga ngam lo khuo hrim a um nawh. LALPA ei Pathien chun a mi pêk vong a nih. 37 Amiruokchu, LALPA ei Pathien thupêk angin, Amon mihai ram chu ei tawk sà ve naw chauh a ni khah, Jabok vadung kama khuohai le tlangrama khuohai khom.