Jethroin Mosie a hung kan
18
1 Mosie tarpu Jethro, Midianhai thiempu chun Mosie le a mi Israelhai chunga Pathienin thil a thawpek po po le Aigupta rama inthoka a hung thruoi suok thu po po chu a lo hriet ve a. 2 Mosien a nuhmei Zipora le a naupa pahnihai a’n kirtir khan Jethro chun a lo umpui a. 3 Mosie chun a naupa upa lem hmingah Gersom a sak a, chu chu “Ram dangah mikhuol ka lo ni tah tina a nih. 4 Chun, a naupa dang hmingah Eliezar a sak a, chu chu “Ka thlatuhai Pathien chu mi thrangpuina a na, Faraw kawlhnâma inthoka mi sansuoktu a nih” tina a nih.5 Mosie tarpu Jethro chun Mosie nuhmei le nauhai chu thlalĕra Pathien tlâng bula Mosie riebuk khuorna hmuna chun a hung thruoi a. 6 Ama chun Mosie kuomah, “Kei, i tarpu hi i nuhmei le nauhai thruoiin ka hung ding a nih” tiin thu a thon lawk a. 7 Mosie chun a tarpu chu a lo va hmuok a, kûnin chibai a bûk a, a fâwp a. An inchibai hnung chun puon inah an lut a. 8 Mosie chun Israelhai leia Faraw le Aigupta mihai chunga LALPA thilthaw dan chanchin le an inzinna lampuia harsatna an tuokhai le LALPAN a san suok pei danhai iengkim chu a tarpu a hril vong a.
9 LALPAN Aiguptahai kuta inthoka Israelhai a sansuok dan le an ta dinga thil thra a thawpek danhai po po chu a hrietin Jethro chu a lawm hle a. 10 Jethro chun, “Aigupta mihai le Faraw laka inthoka sanhimtu chĕu le Aiguptahai thu hnuoia inthoka Israelhai sansuoktu LALPA chu inpâkin um raw se. 11 Tu hin LALPA chu pathien dang po po nêka ropui lem a nih ti ka hriet tah, chuong thilhai chu chapo taka Israelhai nghaisatuhai chunga a thaw a ni si a” a ta. 12 Mosie tarpu Jethro chun Pathien kuomah pumraw thilhlân le hlanbiekna dang dang a’n hlàn a. Aron le Israel upahai po po chu Pathien hmaa Mosie tarpu hlanbiekna ruoi chu kîl dingin an hung a.
13 A zinga chun Mosie chu mipuihai ro rêlpêk dingin a thrung a, zing tienga inthoka zan tieng chenin mipuiin an ngir ngha tuou el a. 14 Chuonga mipuihai ta dinga thil a thaw po po a tarpuin a hmu chun, “Mipuihai hi iem a na i thawpêk tak chu? Ieng leia nang chauh rorêltua thrang a, zing tienga inthoka zan tieng chena mipuiin an ngir huol che am a na?” a ta. 15 Mosie chun, “Mipuihai hi Pathien rawn dinga ka kuoma hung an ni tak a. 16 Thubuoi an nei pha leh ka kuomah an hung intlun a, an thu ka lo rĕlpĕk a, Pathien thupek le danhai ka lo hril tawl bok a” a ta.
17 Mosie tarpu chun, “I thilthaw dan hi a thra nawh. 18 Nang le a hung pantuhai che in insukchău mei mei a nih. Hi sin hi i ta dingin a rik taluo a, makhat chaua hang tlin ruol a ni nawh. 19 Ka thu hi ngaithla la, rem ruotpui ka ti che a, Pathienin malsawm a ti che. Nang chu Pathien tienga mipui aiawtuah thrang la, an thubuoihai chu Pathien kuomah intlun rawh. 20 Thupêk le danhai chu inchuktir i ta, an um dan ding le an thaw dan dinghai chu i kawkhmu pei ding a nih. 21 Amiruokchu, anni laia mi hmang tlak, Pathien tri mi, mi ringum, hlawkna indik lo theida mihai chu thlang suok la, chuonghai chu sang ruol, za ruol, sawmnga ruol le sawm ruol chunga dam hotuah ruot rawh. 22 Anni chun ieng lai khomin mihai ro rêlpêk hai sien, thu lien tham deu chauh i kuomah hung put lut hai sien, thu chîn tham chu anniin rêl vong raw hai se. Chu chun i phur nasa takin hung zâng a tih, an phurpui ding che a ni leiin. 23 Chuong anga i thaw a, Pathien khomin thaw dinga a ti a ni chun, hung tlin thei tang i ta, mipuihai khom lungawi takin mani in tieng inlawi thei tang an tih” a ta.
24 Mosie chun a tarpu thu chu a ngaithlak a, a hril ang takin iengkim a thaw a. 25 Israelhai laia mi hmang tlakhai chu a thlang khawm a, mipuihai hotua dam, thoktuhai hotua dam, a sâng ruol, zanga ruol, za ruol, sawmnga ruol le sawm ruol chunga dam hotuah a sie a. 26 Chuonghai chun ieng lai khomin mipuihai chu ro an rĕlpĕk a, thu lien tham deuh chu Mosie kuomah an hung intlun a, thu chîn tham ruok chu anniin an rĕl ta vong a.
27 Mosie chun a tarpu chu a va’n thla a, Jethro chu a umna ram tieng panin a kir nawk tah a.