3 LALPA thupĕk angin Mosie chun Paran thlalĕra inthokin Israel pahnam tin inrawituhai chu a tir a. 4 A tirhai hming chu: Reuben hnama inthokin Zakur naupa Samua; 5 Simeon hnama inthokin Hori naupa Safat; 6 Juda hnama inthokin Jefune naupa Kaleb; 7 Isakar hnama inthokin Josefa naupa Igal; 8 Efraim hnama inthokin Nuna naupa Hosea; 9 Benjamin hnama inthokin Rafu naupa Palti; 10 Zebulun hnama inthokin Sodi naupa Gadiel; 11 Manase hnam (Josefa hnam) a inthokin Susi naupa Gadi; 12 Dan hnama inthokin Gemali naupa Amiel; 13 Aser hnama inthokin Mikael naupa Sethur; 14 Naftali hnama inthokin Vofsi naupa Nabi; 15 le Gad hnama inthokin Maki naupa Geuel an nih. 16 Hienghai hi ram thithlai dinga Mosien a tirhai chu an nih. Mosie chun Nuna naupa Hosea chu Josua tiin a ko.

17 Mosien Kanan ram thlithlai dinga mi a tir chun an kuomah, “Negev fe tlangin tlangram tieng pan tung ro. 18 A ram hmêl hmang dam, a rama chênghai hrăt le hrăt nawzie dam, an tam an tlawmzie dam, 19 an ram hluo thrat le thrat nawzie dam, an chĕngna khuohai um dan, kula inhuon a ni le ni naw dam, 20 a ram leilung um dan, a ram a hăng thrat le thrat naw dam, ram chu a ngaw am a pawn ti dam hang thlithlai ro. A ram tharsuok thei hung hawn tum ngĕi ngêi ro” tiin thu a’n cha a. Chu hun chu grêp ra hmasa a hmin tran hun a nih.

21 Zin thlalĕra inthok chun an pan tung a, Hamath kawn tienga Rehob chen an thlithlai a. 22 Negev fe thlengin Hebron an tlung a, chu chu milien Anak thlaa mi Ahiman hnam hai, Sesai hnam hai le Talmai hnam hai chĕngna khuo a nih. Hebron khuo hi Aigupta rama Zoan khuo nêka kum saria inhmaa an indin tah a nih. 23 Eskol ruom an tlung chun grep ra bâwr khat, a kâu pumin an săt bong a, chu chu theibufai le theichang leh mi pahniin an zawn a. 24 Chu ruom hminga Eskol an inbŭk san chu Israelhaiin grêp ra băwr an hawn lei a nih. 25 Ni sawmli zet ram an thlithlai hnung chun an hung kǐr nawk a. 26 Paran thlalèra Kadesh hmuna chun Mosie le Aron le Israel mipuihai kuoma chun an hung kǐr a, an rênga pungkhawm hmaah an thil hmuhai chu an ripawt a, a ram suok theihai chu an inentir a.

27 Hieng hin Mosie kuomah an hril a: “I mi tirna rama chun kan hang fe ngei a, nenetui le khuoizu luongna ram a lo ni takzet el! Hi hi a ram suok thei ra chu a nih. 28 Amiruokchu, a rama chênghai chu mi hrât tak el an na, an khawpuihai chu kula inhuon a na, an lien tawl hle bok a. Anak thlahai chen khom kan hang hmu a. 29 Amalek mihai chu Negev-ah an um a; Hithai, Jebuhai le Amorhai chun a tlangram an del a; Kanan mihai chu tuipui kam hnai le Jordan vadung hrûlah an chĕng” tiin.

30 Kaleb chun mipui chu Mosie hmaa chun a zâp dei a, “Inthok suok ei ta, a ram chu hang la’ng ei tiu, ei ngam tawl ngei ding a ni si a” a ta.

31 Nisienlakhom a fepuihai ruok chun, “Anni chu eini hang tĕr ruol ding an ni nawh, eini nêka hrat lem dai an nih” an ta. 32 Israelhai lai chun an ram hang en thlithlai thu chu thra naw takin an hril dar a, “Kan ram hang en thlithlai chun a rama chênghai a fak zo pei a nih. Mi kan hmuhai chu mi lien tak tak vong an nih. 33 Mi lien Anak thla, Nefelimhai khom kan hang hmu a, anni laka chu khău ang chauin kan inhmu a, anni khomin khău ang chauin mi hmu mei an tih” tiin.