DEUTERONOMI
Thuhma
Deuteronomi hi Thuthlung Hlui Baibul ei hmang laia bu ngana, Mosie lekhabu panga (Pentateuch/Torah) laia a tawpna tak, bung 34 le châng 958 a sei a nih. Kum 1407-06 B.C vel khan Israel thlahai, suon thar deu vong chu Mosien Jordan vadung sak tieng a thruoi tlung a. Kanan ram an lut hmain thla hni chuong zet chu hmuna chun an khawsa a. Israelhaiin Pathien pek tiem Kanan ram an hluo phaa an khawsak pei dan dinghai chu ngun takin Mosien a mipuihai chu a hril ngat ngat a. Chu a thu hril, a ziek thlakhai chu Deuteronomi lekhabu hi a nih. A bung tawp tak ruok hi chu a thi hnunga mi dang, Josua-in amanih ziek a nih ti a chieng.
Hi lekhabu thucha chabi tak chu, “LALPA in Pathien hi Pathien a nih ti hre ro; Pathien ringum, ama hmangaia a thupêkhai zawmtu chunga chu suon sâng chen khoma a hmangaina thuthlung vong zing hlaktu le a theidatuhai ruok chu chop le chila thungrula sukbohmang hlaktu a nih; ama theidătuhai chu sawt riel loin, chop le chilin thungrul a tih. Chuleiin, voisuna ka pĕk chêu thupêk hai, thusuok hai le dan hai hi fimkhur takin zawm ro” (7:9-11) ti hi a nih.
Hnam thruoituin hieng khopa chipchier, fie, mawi le thrahnemngai taka a fesan ding a mihai kuoma thurosie poimaw a sie le maksan hi khawvel chanchinah hmu ding a um nawh. Chuleiin, hi lekhabu hminga hin ‘Deuteronomy’ ti an inbûk hiel a, a umzie chu ‘Dan Pahnina’ tǐna a nih. A thucha laia hrilsawng hlaw tak chu “LALPA in Pathien chu in lungril po poin, in thlarau po poin, in hrătna po poin in hmangai ding a nih” (6:4-6) ti hi a na, Isu khomin thupêk po po laia ropui taka a hril hiel a nih.
Pathienin a thlang hnamhai chu a hmangai a, a hum a, a san suok a, mal a sawm a; an hmuingil pei theina dingin anni indintu chu hre zing a, hmangai lĕt a, a thu zawm dingin a dit a, a ngiet bok a. Ama kal zawnga an khawsa chun a thunun a, a hrem a, a thren chu a sukchimit hlak. A thu zawm chu malsawmna, bawsiet chu sietna a nih. Chu thu Mosien a mihai kuoma a hrilna lekhabu hi hnam tin chunga khom thudik a ni leiin, hi lekhabu hi khawvel um sung chun poimaw zing a tih.
A thu tlângpui
Mosie thu hril voi khatna (1:1-4:49)
Mosie thu hril voi hnina (5:1-26:19)
Thupêk Sawm (5:1-10:22)
Dàn chi hrang hrang (11:1-26:19)
Kanan ram an lŭt dàn ding (27:1-28:68)
Thuthlung suktharna (29:1-30:20)
Mosie thuhril nuhnung tak (31:1-33:29)
Mosie thi thu (34:1-12)