4 “Kohat thlahai sin tak chu Intuokna Puon in, Hmun Thienghlim Taka thilhai enkol a nih. 5 Riebuk an inson ding pha Aron le a naupahai chu Intuokna Puon inah lût an ta, Hmun Thienghlim puonzâr chu hlîp thla’ng an ta, chu chun Thuthlung Bawm chu inkhum an ta, 6 chu chunga chun tui bawng vunin inkhum an ta, chu chunga chun puon dum pawlin inkhum nawk an ta, a zawnfung inbûk an tih.

7 “Chun, bei siena dawkan chunga chun puon dumpawl phăng an ta, chu chunga chun thlĕnghai, haihawhai, berbuhai, dawn thilhlân bun suokna no tung rîng rèk le ieng lai khoma sie zing hlak hlanbei chu sieng an ta. 8 Chu chunga chun puon senlârin inkhum an ta, chu chu tui bawng vunin inkhum nawk an ta, a zawnfung inbûk an tih.

9 “Chun, khawnvar siena le a khawnvarhai, a phità chep ruolna chaichèhai, a vâp siena thlĕnghai le khawnvar tuia hmang oliv hriek siena bŭr po po chu puon dum pawlin inkhum an tih. 10 Chuonghai le a bebawm hmangruo danghai chu tui bawng vunin tuom an ta, a zawnna chunga chun an sie ding a nih.

11 “Rangkachak maichăm chu puon dum pawlin inkhum an ta, chu chunga chun tui bawng vunin inkhum nawk an ta, a zawnfung inbûk an tih.

12 “Hmun Thienghlima rongbawlna hmangruo po po chu la’ng an ta, puon dum pawlin fùn an ta, tui bawng vunin tuom nawk an ta, a zawnna chunga chun sieng an tih.

13 “Dâr maichăma vut po po an inthiel fai zoah puon sen dukin inkhum an ta, 14 chu zoah maichăm rongbawlnaa hmang bûr le bêl po po, mei lăkna berbu dam, sa thurna thirkut dam, vutluo dam le maihŭn dam thrangsain, maichăm chunga chun sieng an ta, a chunga chun tui bawng vunin inkhum an ta, a zawnfung inbûk an tih.

15 “Aron le a naupahaiin hmangruo thienghlimhai le thil thienghlimhai po po an inkhum vong hnungin, an riebuk an inson ding pha a zawn dingin Kohat naupahai an hung inthok ding a nih. Thil thienghlim ruok chu an tăwk ding a ni nawh, an tăwk chun thi’ng an tih. Intuokna Puon ina thil um po po zăwn chu Kohat thlahai chanpuol ding a nih.

16 “Thiempu Aron naupa Eleazar thaw ding chu khawnvara sit ding oliv hriek dam, rim inhnik dam, bu le bâl thilhlâna hmang ding hmangruo dam le hriek nàl ding dam ngaituo a nih. Biekbŭk le a sûnga um po po, a cheina le hmangruohai po po enkol chu a mawphurna ni’ng a tih” tiin.

17 LALPA chun Mosie le Aron kuomah, 18 “Kohathai hi Levi thlaa inthoka thrè thlâk an ni nawna dingin fimkhur ro. 19 Thil thienghlim tak hung hnaia an thi pha nawna dingin hieng ang hin thawpêk ro: Aron le a naupahai chu biekbŭkah lûtin mi tin sin thaw ding le chanpuol ding seng chu ruotpĕk raw hai se. 20 Amiruokchu, Kohathai chu a sûngah lûtin thil thienghlimhai an en vĕl ding a ni nawh, sawt naw te khom an lŭt chun thi’ng an tih” tiin.

21 LALPAN Mosie a biek a, 22 “Gerson thlahai le sungkuohai khom tiem rawh. 23 Intuokna Puon ina rongbawla thrang tlâk pasal kum sawmthum le sawmnga inkar mihai chu tiem vong rawh. 24 Gerson thlahai sin puol chu thil phur a nih. 25 Biekbŭk puonzar hai, intuokna puon in hai, a’n khumna hai, a chung inkhumna tui bawng vun hai, Intuokna Puon in kotkhara puonzâr hai, 26 tuol inhuonna kotkhara puonzâr hai, biekbŭk le maichăm bula puonzâr hai, a hruihai le hmangruo dang po po chu phur an ta, thaw ding trul taphot chu thaw’ng an tih. 27 Thil phur amanih le thil dang Gerson thlahaiin an thaw hrim hrim chu Aron le a naupahai inrawina hnuoiah thaw’ng an ta, an sin ding neu neu chen ruotpekin an enpui ding a nih. 28 Chuong chu Intuokna puon ina Gerson thlahai thaw ding chu a nih; an thaw ding chu thiempu Aron naupa Ithamarin rêlpêk a tih.

29 “Merari thlahai le sungkuohai khom tiem rawh. 30 Intuokna Puon ina rongbawla thrang tlâk pasal kum sawmthum le sawmnga inkar mihai chu tiem vong rawh. 31 Intuokna Puon ina an sin ding le chanpuol ding chu thil phur, biekbuk ban rem khawm hai, a bangru hai, a ban hai, a ban thrut ker kuok hai, 32 a tuol inhuonna vĕla ban hai, a ban thrut ker kuok hai, a kildĕna hai, a hruihruol hai le a hmangruo dang po po phur chu a nih. An phur ding seng i ruotpêk thlap ding a nih. 33 Chuong chu Merari thlahaiin thiempu Aron naupa Ithamar inrawina hnuoia Intuokna puon ina rong an bawl dan ding le an sin ding chu a nih.

34 Mosie le Aron le khawtlang hotuhai chun Kohat chi le kuong le sungkuohai chu an tiem a. 35 Intuokna Puon ina sin thaw ding, pasal kum sawmthum le sawmnga inkâr an tiem po chu an ziek suok a. 36 Hieng hming an ziekhai hi 2750 an nih. 37 Chuonghai chu Kohat thlahai, Intuokna Puon ina sinthaw, LALPAN Mosie thu a pĕk anga Mosie le Aronin an tiem po zăt chu a nih.

38 Gerson thlahai, Intuokna Puon ina sin thaw dinghai khom chu an chi le kuong le sungkuo ang peiin an tiem a. 39 Pasal kum sawmthum le sawmnga inkâr po an tiem a, 40 an chi le kuong le sungkuo kuo ang peia an tiem po chu 2630 an nih. 41 Chuonghai chu Gerson thlahai, Intuokna Puon ina sinthaw, LALPAN Mosie thu a pĕk anga Mosie le Aronin an tiem po zăt chu a nih.

42 Merari thlahai, Intuokna Puon ina sin thaw dinghai khom chu an chi le kuong le sungkuo ang peiin an tiem a. 43 Pasal kum sawmthum le sawmnga inkâr po an tiem a, 44 an chi le kuong le sungkuo kuo ang peia an tiemhai chu 3200 an nih. 45 Chuonghai chu Merari thlahai, Intuokna Puon ina sinthaw, LALPAN Mosie thu a pĕk anga Mosie le Aronin an tiem po zăt chu a nih.

46 Chuong ang chun Mosie le Aron le Israelhai hotuhai chun Levi thlahai chu an chi le kuong le sungkuo kuoin an tiem vong a. 47 Intuokna Puon ina sin thaw ding le puon in phurtu dinga hung pasal kum sawmthum le sawmnga inkâra upa an tiem po chu, 48 mi 8580 an nih. 49 Mosie hmanga LALPA thupĕk angin, mi tin sin thaw ding le phur ding chu ruotpêk a na, LALPAN Mosie kuoma thu a pĕk anga tiem vong an ni bok.