3 “‘Ni ruk sung sin thaw’ng in ta, ni sarina ni chu Sabat a ni a, in chawl ding a nih. Sabat hi LALPA puol a ni a, in umna taphotah sin ieng khom thaw loa inkhawmin in inser ding a nih.

4 “‘Hienghai hi LALPA kŭt, a hunbi ruota inkhawmpui thienghlim in hmang hlak ding chu a nih. 5 Thla hmasa tak ni sawm palina nisa tlâka inthokin LALPA Fekân Kŭt chu intran a tih. 6 Chu thla, ni sawmpangana chun LALPA Chol thrang lo bei kŭt chu intran a ta, ni sari sung chu chol thrang loa siem bei in fàk ding a nih. 7 A ni hmasa taka chun inkhawmpui thienghlim nei in ta, sin hrim hrim in thaw ding a ni nawh. 8 Ni sari sung chun meia pumraw thilhlân LALPA kuomah in inhlăn ding a nih. A ni sarinaa chun inkhawmpui thienghlim nei nawk unla, sin hrim hrim thaw naw ro’ tiin” a ta.

9 LALPA chun Mosie kuomah, 10 “Israelhai kuomah hieng hin hril rawh: ‘Ram ka pĕk chêu in tlung pha, in lo tharsuok bu in sìk hmasa taka^a mi buphal têl khat chu thiempu kuomah hung chawi ro. 11 Pompêk in ni theina dingin, buphal chu LALPA hmaah nangni aiawin thiempu chun thên a ta, Sabat a ni chun a zo tukah thên a tih. 12 Buphal in thĕn ni chun kum khata upa beramchal tuoi, hmêl hem lo chu pumraw thilhlânah LALPA kuomah in inhlàn ding a nih. 13 Chu taka bu le bâl thilhlâna chun beiphit indip kilogram hni, hriek le inpola hmet le dawn thilhlân uoiin litar khat thrangsain LALPA ta dinga rim inhnik, meia thilhlânah inhlăn ro. 14 In Pathien hmaa thilhlân in hung chawi hma chun beia siemin amanih, a zĕua zĕuin amanih le a vŭia chipin amanih in făk ding a ni nawh. Khaw lai hmuna khom um unla, hi hi in thlahai chena in kumkhaw dăn ding chu a nih.

15 “‘Sabat zo zinga thèn thilhlàna buphal in inhlàn nia inthoka tiema a chawlkar sarinaah Pawl Kût in hmang ding a nih. 16 Chu Sabata inthoka tiema a ni sawmnganaa^b chun in bu thar chu LALPA kuomah hung inhlàn ro. 17 Khaw lai hmuna khom um inla, beiphit indip kilogram hnia inthoka chol thranga siem le ur bei tlang hlûm hni chu thar hmasa tak thĕn thilhlâna dingin LALPA kuomah hung inhlăn ro. 18 Bei le hin beramchal tuoi pasari, kum khata upa le hmêl hem lo le bawngchal tuoi pakhat le beramchal pahni hung inhlăn ro. Chuong thilhlânhai le bu le bal thilhlân le dawn thilhlânhai chu LALPA ta dinga pumraw thilhlân, meia thilhlân rim inhnik tak chu ning a tih. 19 Chun, suol ngaidamna hlanbieka dingin kelchal pakhat inhlàn unla, inremna siemna hlanbieka dingin beramchal tuoi pahnih, kum khata upa ve ve, inhlàn ro. 20 Thiempu chun beram pahni le ra hmasa thilhlân bei tlang hlûm hni chu LALPA hmaah thên a tih. Chuonghai chu thiempu chanpuol, LALPA ta dinga thilhlân thienghlim a nih. 21 Chu ni chun inkhawmpui thienghlim hmang in ta, sin hrim hrim in thaw ding a ni nawh. Hi hi in umna taphota in thlahai chen khoma in zawm kumkhuo ding chu a nih.

22 “‘Chun, in loa bu in sǐk pha hnăwm sir râwta mi chén chèn sîk naw unla, sǐk hmai bu tro khom zong bok naw un la, mi retheihai le ram dang mihai ta dingin hlă lem ro. Kei hi LALPA in Pathien chu ka nih’ ti rawh” tiin.

23 LALPA chun Mosie kuomah, 24 “Israelhai kuomah hi hi hril rawh: Thla sarina ni khat ni chu chawl in ta, tawtawrawt mûta puongin inkhawmpui thienghlim in nei ding a nih. 25 Sin hrim hrim in thaw ding a ni nawh. LALPA ta dingin meia thilhlân in inhlăn ding a nih’ tiin” a ta.

26 LALPA chun Mosie a biek a, 27 “Thla sarina ni sawm ni chu Inremna Ni a nih. Inkhawmpui thienghlim nei unla, iengkim insûm vong unla, LALPA kuomah meia thilhlân inhlăn ro. 28 Hi ni hin sin hrim hrim in thaw ding a ni nawh, Inremna Ni, LALPA in Pathien hmaa in ta dinga inremna siemna ni a ni si a. 29 Hi nia tu khom mani insûm lo^c chu a chipuihaia inthoka tuithlăr ning a tih. 30 Hi nia sin thaw hrim hrim chu a chipuihai laia inthokin sukbohmang ka tih. 31 Sin hrim hrim in thaw ding a ni nawh. Khaw lai hmuna khom um inla, hi hi kumkhuoa in zawm ding thupêk a nih. 32 Sabat chu chawlna ni a ni a, iengkimah mani in inhnawl vong ding a nih. Hi thla, a ni kuona zan tieng ni tlâka inthoka a zing zan tieng ni tlâk chen sabat hi in inser ding a nih’ tiin” a ta.

33 LALPA chun Mosie a biek a, 34 “‘Israel thlahai kuomah hieng hin hril rawh: ‘Thla sarina ni sawm le ni nga ni hin LALPA Bâwkte Kùt chu intran a ta, ni sari sung in hmang ding a nih. 35 A ni hmasa tak chu inkhawmpui thienghlim a na, sin hrim hrim in thaw ding a ni nawh. 36 Ni sari sung chun LALPA kuomah meia thilhlân inhlàn unla, a ni rietna chu in ta dingin inkhawmpui thienghlim ni nawk a ta, meia thilhlân LALPA kuomah in inhlàn ding a nih. Inkhawmpui trumtriek ni a na, sin hrim hrim in thaw ding a ni nawh.

37 “‘Chuong chu LALPA kŭt ruot bî senga meia thilhlân- pumraw thilhlân dam, bu le bâl thilhlân dam, hlănbiekna chi hrang hrang le dawn thilhlân dam- LALPA kuoma in hung chawina dinga inkhawmpui thienghlim in siem dinghai chu an nih. 38 Hieng thilhlânhai hi LALPA Sabat nia dinga thilpêk dam, thilthlawnpek dam, thu tiemna leia thilpêk dam le mani nuom thua LALPA kuoma thil in pĕkhai băka in thaw ding chu a nih.

39 “‘Thla sarina ni sawm le ni nga nia in loa thlaihai in sǐk zo pha leh LALPA kŭt chu ni sari sung hmang in ta, a ni khatna chu chawl hadamna ni ni’ng a ta, a ni rietna khom chawl hadamna ni ni bok a tih. 40 A ni khat ni chun thei ra in du chi dam, tŭmkâu dâm, sawlhna dam, tuipuisuthla kău dam la khawm in ta, LALPA in Pathien hmaah ni sari sung chu in hlim ding a nih. 41 Hi kût hi LALPA ta dingin kum tin ni sari sŭng in hmang hlak ding a nih. Hi hi in thlâ pei dinghai chena kumkhaw dân ding chu a nih; thla sarinaah in nei hlak ding a nih. 42 Sâwlbŭkah ni sari um in ta, Israel rama pieng hrim hrim chu sâwlbŭkah an um vong ding a nih. 43 Chuongchun, in thlahai chun Aigupta rama inthoka Israel thlahai ka thruoi suok lai khan sâwlbŭkah ka’n umtir ti hung hre thei an tih. Kei hi LALPA, in Pathien chu ka nih’ ti rawh” tiin.

44 Chuong ang chun, LALPA kŭt hunbi ruothai chu Israel thlahai kuomah Mosien a puong tah a nih.