Ni tin thilhlànhai
28
1 LALPA chun Mosie a biek a, 2 “Israel thlahai thu pe la, a hun ruot takah ka kuoma thilhlân, meia thilhlân le bu le bâl thilhlân, ka ta dinga riminhnik chu an hung inhlăn hlak ding a nih. 3 Hieng hin hril rawh: ‘Hi hi LALPA kuoma meia pumraw thilhlân in inhlăn ding chu a nih: ni tinin beramchal tuoi pahnih, kum khata upa le hmêl hem lo chu in inhlăn ding a nih. 4 Zing tieng pakhat inhlăn unla, zan tieng pakhat inhlăn ro. 5 Bu le bâl thilhlân, beiphit indip tak kilogram khat, hriek a sawra sawr litar khat le hmet pol le chun in inhlăn kop ding a nih. 6 Hi hi LALPA ta dinga meia thilhlân, a ta dinga rim inhnik, Sinai tlanga inthoka an lo thaw tran tah chu a nih. 7 Dawn thilhlân chu beram pakhat peiah litar khat a ni ding a nih. Uoiin tak chia chu Hmun Thienghlimah LALPA hmaah in bun suok ding a nih. 8 Zan tieng chun beram pahnina chu zing tienga in thaw ang bokin, dawn thilhlân leh inhlăn ro. Hi hi meia thilhlân, LALPA ta dinga rim inhnik chu a nih.Sabat thilhlàn
9 “‘Sabat pha beram tuoi pahnih, kum khata upa le hmêl hem lo inhlàn un la, bu le bâl thilhlâna dingin beiphit indip tak, oliv hriek le hmet pol kilogram hni le dawn thilhlân chu inhlàn sa bok ro. 10 Ni tina pumraw thilhlân le dawn thilthlân bakah hi hi Sabat zàta pumraw thilhlân in inhlàn ding chu a nih.
Thla thar thilhlân
11 “‘Thla thar ni hmasa takah LALPA kuoma pumraw thilhlânah bawngchal tuoi pahni, beramchal pakhat le beram tuoi pasari, kum khata upa le hmêl hem lo chu inhlàn ro. 12 Bawngchal pakhat peiah bu le bâl thilhlâna dingin beiphit kilogram thum, 13 beram pakhat peiah kilogram hni le beram tuoi pakhat peiah kilogram khat inhlàn ro. Hi hi pumraw thilhlân, LALPA ta dinga meia thilhlân, rim inhnik chu a nih. 14 Bawngchal pakhat peiah dawn thilhlâna dingin uoiin litar hni, beramchal pakhat peiah uoiin litar khat le a chenve le beram tuoi pakhat peiah uoiin litar khat a ni ding a nih. Hi hi thla thar ni khat zăta pumraw thilhlân in inhlăn dăn ding chu a nih. 15 Pumraw thilhlân le dawn thilhlân pangngai bàkah, LALPA kuoma suol ngaidamna thilhlânah kèlchal pakhat in inhlân bok ding a nih.
Fekân Kŭt thilhlân
16 Thla hmasa tak ni sawm le ni liah LALPA Fekăn Kŭt in hmang ding a nih. 17 Chu thla ni sawm le ni nga ni chu ruoi thrè ni nîng a ta, ni sari sung chu chol thrang lo bei chauh fa ro. 18 A ni khat ni chun inkhawmpui thienghlim nei unla, ieng sin khom in thaw ding a ni nawh. 19 LALPA kuoma pumraw thilhlân, meia thilhlânah bawngchal tuoi pahnih, beramchal pakhat le beram tuoi pasari, kum khata upa le soisĕl bo chu inhlăn ro. 20 Bawngchal pakhat peiah bu le bâl thilhlâna dingin beiphit, oliv hriek le hmet pol, kilogram thum, beramchal pakhat peiah beiphit kilogram hni, 21 beram tuoi pasarihai chu pakhat peiah kilogram khat leh inhlăn ro. 22 Mipuihai ta dinga inremna siempekna dingin, suol ngaidamna thilhlânah kèlchal pakhat inhlăn bok ro. 23 Hi hi zing tienga pumraw thilhlân pangngai in inhlăn băkah buotsai ro. 24 Hieng ang hin LALPA ta dinga rim inhnik, meia thilhlân fak ding chu ni tin, ni sari sung in inhlăn ding a nih; chu chu pumraw thilhlân le dawn thilhlân in thaw pangngai băka in buotsai ding chu a nih. 25 A ni sarinaa chun inkhawmpui thienghlim nei nawk unla, sin ieng khom in thaw ding a ni nawh.
Pawl kûta thilhlân ding
26 Chun, thar suok hmasa tak in inhlàn hun, Hapta Kûta in bu thar suokhai in inhlàn ni chun inkhawmpui thienghlim nei unla, ieng sin khom thaw naw ro. 27 Pumraw thilhlâna dingin bawngchal tuoi pahnih, beramchal pakhat le beram tuoi pasari, kum khata upa le soisel bo chu LALPA ta dinga rim inhnikah inhlàn ro. 28 Bawngchal pakhat peiah bu le bâl thilhlâna dingin beiphit, oliv hriek le hmet pol kilogram thum, beram pakhat peiah beiphit kilogram hni, 29 beram tuoi pasarihai chu pakhat peiah beiphit kilogram khat pei, inhlăn ro. 30 In ta dinga inremna siemna dingin kelchal pakhat suol ngaidamna thilhlâna dingin inhlăn sà ro. 31 Hienghai hi pumraw thilhlân le bu le bâl thilhlân pangngai rĕng bâkah dawn thilhlân uoiin le inhlàn dingin buotsai ro. In ran inhlănhai chu soisel bo ni ngei dingin en fimkhur ro.