Khawnvar enkol dan ding
24
1 LALPAN Mosie a biek a, 2 “Khawnvar sit var a ni zing theina dingin, oliv hriek fîm tak, khawnvara insit dinga săwr ngêi chu, i kuoma hung chawi dingin Israel nauhai hril rawh. 3 Intuokna Puon ina Thuthlung Bawm hmaa puonzar puoa chun LALPA hmaah khawnvarhai chu sit var zing dingin zan tienga inthoka zing tieng chenin Aronin enkai a tih. Hi hi thrang la hung pei dinga khom in kumkhaw dàn chu a nih. 4 LALPA hmaa um rangkachak hlîra siem khawnvar siena le khawnvarhai chu in enkai zing ding a nih.Hlănbei
5 “Chun, beiphit indip tak kilogram sawmpahni la la, bei thăwp sawmpahni ur la, bei pakhat siemnaah beiphit kilogram khat pei hmang rawh. 6 LALPA hmaa rangkachak dawkan chunga chun bei chu tlar hniin rem la, tlar khatah bei paruk pei intieng rawh. 7 Bei tlar hni chung ve vea chun beraw fîm tak sie la, chu chu LALPA hmaa meia thilhlân anga bei khom chu inhlăn a nizie hrietzingna aiah sie rawh. 8 Hi bei hi chawlni zâtin Israel thlahai aiawin LALPA hmaah sie zie hlak ding a nih, chu chu kumkhaw thuthlung a nih. 9 LALPA ta dinga meia thilhlân thienghlim tak laia Aron le a naupahai chanpuol a ni leiin, hmun thienghlimah an fak ding a nih” tiin.
Pathien hrilsetu hremna
10 Mi pakhat, a nu Israel mi, a pa Aigupta mi chu Israel mi pakhat leh riebûk tuolah an insuol a. 11 Israel nu naupa chun trongsie inphura Pathien hming a hrilsiet leiin ama chu Mosie kuomah an hung thruoi a. A nu hming chu Selomit a na, Dan chi-hnama mi Dibri naunu a nih. 12 LALPA thusuok an nghăk sûng po chu ripah an khum a.
13 LALPA chun Mosie kuomah, 14 “Trongsie inphurtu kha riebuk puo tieng thruoi suok ro. A hril hretu po poin a chungah kut thlâk an ta, pungkhâwm po poin lungin dêng raw hai se. 15 Israelhai kuomah hi thu hi hril rawh: Tu khom trongsie a Pathien inphurtu chun a maw phur a ta, 16 LALPA hming trongsie inphurtu chu sukhlum ngei ding a nih. Pungkhawmhaiin lungin dêng hlum raw se. A rama pieng amanih ram dang mi amanih tu khom Pathien hming hrilsetu taphot chu sukhlum ding a nih.
Inthungrulna dan
17 “‘Tu khomin mihriem hringna a lâk chun ama chu sukhlum ding a nih. 18 Mi dang ran sukhlumtu chun ran dangin a rul ding a nih, hringna chu hringnain. 19 Tu khomin a tuolbawmhai a sukhliem chun, a hliem dăn chu ieng ang khom ni sien, a thaw dăn ang chara a chunga thaw ve ding a nih: 20 ru tliek aiah ru tliek, mit aiah mit, ha aia ha. Mi a sukhliem chun ama khom sukhliem ve ding a nih. 21 Tu khom ran sukhlumtu chun ranin thung a ta, mihriem hringna latu ruok chu sukhlum ding a nih. 22 A ram mi le hnam dang mihai ta ding khomin dăn thuhmun in nei ding a nih. Kei hi LALPA in Pathien chu ka nih’ tiin” a ta.
23 Mosie chun Israelhai chu a biek a, trongsie inphurtu chu khawhnawmah an thruoi a, LALPAN Mosie kuoma thu a pêk ang peiin Israelhai chun an thaw a, lungin an dĕng hlum a.