EXODUS
Thuhma
Exodus hi Baibula bu hnina, bung 40 le châng 1213-a sei, kum 1450-1410 B.C inkar laia Sinai thlalĕra Israelhai an um laia Mosie ziek a nih. Hi lekhabua hin mi pakhat inrawina hnuoia khawvela mihriem a honpuia an inpem rawnna tak chanchin a chuong. Chuleiin, a bu hming hi a put a nih. ‘Exodus’ chu a honpuia ‘fe suok’ tǐna a na, Pathienin Mosie hmanga Aigupta bawia intâng Israelhai a thruoi suok dan chanchin, thlalĕr rinuma kum sawmli zet an khawsak dan le ram tiem, Kanan ram an lut hmâ chena an chanchin a nih. Hi lekhabu tluka thilthaw mak chuong rawnna lekhabu dang a um nawh. Hnama det taka hung insiem tungna dinga bawlhlo poimawhai chu hi bu sunga hin a um.
Exodus hi buk thuma thrè thei a nih:
(1) Aigupta bawia inthoka Hebrai mihai thruoi suoka an um dan le Sinai tlang chena an inzin dan chanchin.
(2) Pathienin Sinai tlanga thu a thlungpui dan le khawsak an inrelbawlna dinga Dàn a pek hai.
(3) Biekbuk bawl dan ding le chei dan ding, ser le sang an thaw dan ding, thiempuhai rongbawl dan ding le Pathien an chawibiek dan ding thu hrilna. Chuong Danhai laia khawvel hriet lâr tak chu Thupek Sawm (20:1-17) a nih.
A sung thu tlângpuihai
Aiguptaa inthoka Israelhai suok thu (1:1-15:21)
Aigupta bawia an intàng lai (1:1-22)
Mosie pieng thu le a seilien dan (2:1-4:31)
Mosie le Aron-in Faraw an hmasuon dan (5:1-11:10)
Fekan Kŭt le Israelhai suok thu (12:1-15:21)
Tuipui Sen le Sinai tlang inkara an inzinna (15:22-18:27)
Dan le thuthlunghai (19:1-24:18)
Biekbuk le chawibiek dan ding (25:1-40:38)