Kum thar kûta thilhlân
29
1 “‘Thla sarina, ni khat ni chun sin thaw loa umni khâmin inkhawmpui thienghlim nei ro, chu ni chu in ta dinga tawtawrawt mŭt ni a nih. 2 LALPA ta dingin pumraw thilhlân, rim inhnik buotsai unla, bawngchal tuoi pakhat, beramchal pakhat le beram tuoi pasari, kum khata upa le hmêl hem lo chu inhlăn ro. 3 Bawngchal pakhat peiah bu le bâl thilhlâna dingin beiphit, oliv hriek le hmet pol kilogram thum, beramchala dingin beiphit kilogram hni pei, 4 beram tuoi pasarihai chu pakhat peia dingin beiphit kilogram khat pei inhlàn ro. 5 In ta dinga inremna siemna dingin kèlchal pakhat inhlàn sà bok ro. 6 Hieng thilhlânhai hi thla tin le ni tina pumraw thilhlân dam, bu le bâl thilhlân dam le dawn thilhlân, thaw dan ding tuk ta sa hai băka meia thilhlân, LALPA ta dinga rim inhnik chu a nih.Inremna nia thilhlân
7 “‘Thla sarina ni sawmah inkhawmpui thienghlim nei ro. Ieng khom fain dawn naw unla, sin thaw bok naw ro. 8 LALPA ta dinga rim inhnik, pumraw thilhlânah bawngchal tuoi pakhat, beramchal pakhat le beramchal tuoi kum khat mi pasari, an rênga hmêl hem lo chu, inhlăn ro. 9 Bu le bâl thilhlâna dingin beiphit indip tak, oliv hriek le hmet pol chu bawngchal pakhatah kilogram thum, beramchal pakhatah kilogram hni, 10 beram tuoi pakhat peiah kilogram khat inhlăn ro. 11 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim băkah suol ngaidamna thilhlâna dingin kelchal pakhat inhlàn sà bok ro.
Bâwkte Kŭta thilhlân
12 “‘Thla sarina ni sawm le ni ngaa chun inkhawmpui thienghlim nei unla, sin ieng khom thaw naw ro. LALPA ta dingin ni sari sung kût in hmang ding a nih. 13 LALPA ta dinga rim inhnik, pumraw thilhlânah bawngchal tuoi sawmpathum, beramchal pahni le beramchal tuoi kum khat mi sawmpali, an rênga hmêl hem lo, chu inhlàn ro. 14 Chuong bawngchal tuoi sawmpathumhai chu pakhat peia dingin bu le bal thilhlâna ding, oliv hriek le hmet pol, beiphit indip tak kilogram thum, beramchal pakhat peiah kilogram hni le 15 beramchal tuoi sawmpalihai chu pakhat peiah kilogram khat buotsai ro. 16 Inremna dinga suol ngaidamna thilhlân, pumraw thilhlân, bu le bal thilhlân le dawn thilhlân pangngai hrim băkah suol ngaidamna thilhlâna dingin kelchal pakhat inhlăn sa bok ro.
17 “‘A ni hninaa dingin bawngchal tuoi sawmpahni, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlăn ro. 18 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlăn ding bituk zât ang pei chu buotsai ro. 19 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim băkah suol ngaidamna thilhlâna dingin kelchal pakhat inhlăn sa bok ro.
20 “‘A ni thumna dingin bawngchal tuoi sawmpakhat, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlàn ro. 21 Bawngchal le beramchal le beramchal tuoi pakhat peia bu le bal thilhlân le dawn thilhlâna inhlàn ding bituk zat ang pei chu buotsai ro. 22 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim bakah suol ngaidamna thilhlâna dingin kelchal pakhat inhlăn sa bok ro.
23 “‘A ni linaa dingin bawngchal tuoi sawm, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlăn ro. 24 Bawngchal le beramchal le beramchal tuoi pakhat peia bu le bal thilhlân le dawn thilhlâna inhlăn ding bituk zât ang pei chu buotsai ro. 25 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim bakah suol ngaidamna thilhlâna dingin kelchal pakhat inhlăn sa bok ro.
26 “‘A ni nganaa dingin bawngchal tuoi pakuo, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlàn ro. 27 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlăn ding bituk zât ang pei chu buotsai ro. 28 Inremna dinga suol ngaidamna thilhlân, pumraw thilhlân, bu le bal thilhlân le dawn thilhlân pangngai hrim bakah suol ngaidamna thilhlâna dingin kelchal pakhat inhlăn sa bok ro.
29 “‘A ni ruknaa dingin bawngchal tuoi pariet, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlàn ro. 30 Bawngchal le beramchal le beramchal tuoi pakhat peia bu le bal thilhlân le dawn thilhlâna inhlăn ding bituk zat ang pei chu buotsai ro. 31 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim băkah suol ngaidamna thilhlâna dingin kelchal pakhat inhlăn sa bok ro.
32 “‘A ni sarinaa dingin bawngchal tuoi pasari, beramchal pahni le beramchal tuoi, kum khat mi sawmpali, an rênga hmêl hemna nei lo vong chu, inhlăn ro. 33 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlăn ding bituk zât ang pei chu buotsai ro. 34 Inremna dinga suol ngaidamna thilhlân, pumraw thilhlân, bu le bâl thilhlân le dawn thilhlân pangngai hrim bakah suol ngaidamna thilhlâna dingin kelchal pakhat inhlăn sà bok ro.
35 “‘A ni rietnaa chun umni khamin inkhawmpui thienghlim nei unla, sin ieng khom thaw naw ro. 36 LALPA ta dinga meia thilhlân le rim inhnik, pumraw thilhlâna dingin bawngchal pakhat, beramchal pakhat le beram tuoi, kum khat mi pasari, hmêl hemna nei lo vong chu, inhlăn ro. 37 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlăn ding tuk zât ang pei chu buotsai ro. 38 Inremna dinga suol ngaidamna thilhlân, pumraw thilhlân, bu le bal thilhlân le dawn thilhlân pangngai hrim bakah suol ngaidamna thilhlâna dingin kelchal pakhat inhlăn sà bok ro.
39 Hienghai hi mania thu in intiemkamna hlenna dinga thil in inhlăn le mani lungril puok suoka thilpek inhlânhai baka a hunbi neia kût in hmang phaa pumraw thilhlân, bu le bâl thilhlân, dawn thilhlân le inremna thilhlân in buotsai dàn ding chu a nih’ ti rawh” tiin.
40 LALPAN a kuoma thu a pèk po po chu Mosie chun Israelhai a hril a.