4 “‘Aron thlà tu khomin inkai thei vun hri amanih a taksaa thil pût amanih a nei chun, a porchènaa inthoka a’n thieng hmâ khat chu thil thienghlim inhlànhai chu fa thei naw nih. Mithi ruongin a tawk thilhai a tawk lei dam, chî a put suok lei dam, 5 tawk thieng lo hnuoia thil invàk chi hrim hrim a tawk lei dam, mi sukporchè thei hrim hrim, ieng ang porchèna khom ni sien, a tawk lei damin a porchè thei. 6 Chuong ang thil tawktu taphot chu zan tieng chenin tirdakum kai a tih. Tuia a’n sil fai hmâ khat chun thil thienghlim inhlànhai chu a ieng khom a fâk ding a ni nawh. 7 Nisa tlâk pha hung inthieng ta’ng a ta, chu hnung chun thil thienghlim laia mi chu fa thei ta’ng a tih, a fàk ding chanpuol a ni leiin. 8 Sa thi sa amanih le sahuoi sê hlum sa amanih a fak leiin a’n sukporchè ding a ni nawh. Kei hi LALPA chu ka nih.

9 “‘Thiempuhai chun ka thupêkhai chu an zawm ding a nih, an zawm naw chun thiem nawna phurin, an poisak nawna chu thipui rawi an tih. Kei hi LALPA, anni sukthienghlimtu chu ka ni si a.

10 “‘Thiempu sungkuo ni ve lo le a mikhuol amanih, inhlawfa a lakhai amani khomin thil thienghlim chu an fàk ding a ni nawh. 11 Amiruokchu, suma thiempuin bawi a’n chawk amani le a ina pieng bawihai chun a bu chu fa thei an tih. 12 Thiempu naunuin thiempu ni lo pasala a nei chun thèn thilhlân, thil thienghlim laia mi chu a fâk ding a ni nawh. 13 Sienkhom, thiempu naunu chu nau nei hman loa a hmeithai amanih, an naw leh màk amanih a ni a, a pa inah a naupang lai ang boka khawsa dinga a hung kir nawk a ni chun, a hung kir nia inthokin fa thei a tih. Mi dang chun an fàk a thieng nawh.

14 “‘Miin hre loa thil thienghlim a lo fak pal a ni chun thiempu chu thung kir a ta, hmun ngaa threa hmun khat pe belsang a tih. 15 Israelhaiin thil thienghlim LALPA kuoma an hung inhlàn chu thiempuhaiin an sukporche ding a ni nawh. 16 A fa thieng lohai chungah thiem nawna intlungtir a, an thung nawk a ngai nawna dingin thil thienghlim chu thiempuhaiin an infaktir ding a ni nawh. Kei hi LALPA, anni sukthienghlimtu chu ka ni si a’ ti rawh” a ta.

17 LALPA chun Mosie kuomah, 18 “Aron le a naupahai le Israel thlahai po po chu hieng ang hin hril rawh: ‘Israel sungkuo laia mi amanih, Israelhai laia um ram dang mi amanih tu khomin LALPA ta dinga pumraw thilhlân in inhlàn hunah, thutiemna amanih mani nuom thua thilhlân amanih a ni khomin, 19 in thil inhlàn chu nangni aia pom tlâk a ni theina dingin bawngchal amanih, kèlchal amanih hmêl hemna nei lo in inhlàn ding a nih. 20 Hmel hemna nei hrim hrim hung inhlàn naw ro, in inhlàn chun nangni aia pompek ni naw nih. 21 Tu khom thutiem bik hlenna ding amani le mani nuom thu lei amania inremna thilhlân inhlàn ding chun, a thil inhlàn chu ama aia pom a ni theina dingin, bawngchal amanih, beramchal amanih, kelchal amanih hmêl hem lo hung inhlàn raw se. 22 Ran mitdel amanih, inhliemna nei le sil-ong amanih, inphărna le pânna nei lai amanih chu inhlăn naw ro. Chuong ang hrim hrim chu LALPA ta dinga meia pumraw thilhlânah in hmang ding a ni nawh. 23 Mani nuom thua thilhlâna ruok chu bawngchal amanih beramchal amanih pieng infuk rak lo khom in inhlàn thei a, amiruokchu thutiem hlenna thilhlâna ding chun chu chu pom ni naw nih. 24 A tilmu inhliem amanih, vuok nawi amanih, sut koi amanih le làk amanih ran chu LALPA kuomah in inhlàn ding a ni nawh. Chuong ang chu in rama hin in hmang ding a ni nawh. 25 Chun, hnam dang mihai ran chu in Pathien kuoma fak ding thilhlâna dingin in pom ding a ni nawh; chuong ang inhlan chu piengsuolna le hmêl hemna neia tiem ding a ni leiin pom ni thei naw nih’ tiin hril rawh” a ta.

26 LALPA chun Mosie kuomah, 27 “Bawng amanih, beram amanih, kel amanih a chal a hung piengin a pui bulah ni sari a um ding a nih. A ni rietnaa inthok chun LALPA ta dinga meia thilhlâna pom thei ni ta’ng a tih. 28 Bawngpui amanih berampui amani le a tê chu ni khatah a ruolin in that ding a ni nawh.

29 “Chun, lawmthu hrilna hlănbiek LALPA kuoma in inhlăn phâ a pom tlăk ni dingin inhlăn ro. 30 A ni lá làah in fàk ding a nih; a zinga ding ieng khom hlà naw ro. Kei hi LALPA chu ka nih.

31 “Ka thupêkhai hi vongin zawm ro. LALPA chu ka ni si a. 32 Ka hming thienghlim sukpawi naw ro. Israel thlahaiin mi thienghlimah an mi pom ding a nih. Kei hi nangni sukthienghlimtu LALPA chu ka na, 33 in Pathien ni dinga Aiguptaa inthoka thruoi suoktu chêu chu ka nih. LALPA chu ka nih” tiin a hril a.