Thiempu silfĕn
39
1 LALPAN Mosie thu a pĕk angin, pat dum pawl, sen duk le sen lâr hai hmangin Hmun Thienghlima rongbawlna ding silfĕn mawi tak an siem a, Aron ta dingin silfĕn thienghlim an siem bok a.Thiempu zakuo efod
2 Rangkachak zai dam, pat dum pawl, sen duk le sen lâr le pat zâi inhmi tak thlŭr kop dâm hmangin thiempu zakuo an siem a. 3 Rangkachak chu inphân takin an sut pĕr a, pat dumpawl, senduk le senlâr le pat zai inhmi tak leh zĕl kop dingin kut themthiemhai chun rangkachak chu an chik thlêr sang a. 4 Darbak pahnih an siem a, efod kila chun a hmor chu an tringmit a, chu chun a man nghet a nih. 5 Kăwnga efod hrĕn dĕna ding efod ang chie an siem a, Mosie kuoma LALPA hril angin, chu chu efod leh an khawng zom a. 6 Chu taka chun onik lung pahnihai chu rangkachakah an phŭm de a, lunghlu ker thiemin suoi namna ding mawi taka a ker angin chu taka chun Israel nauhai hming chu an ker a. 7 LALPAN Mosie kuoma a hril ang takin, Israel nauhai hriet zingna lung dingin thiempu zakuo dàr bàt khing tieng vé vèa chun rangkachakah an phŭm dĕ a nih.
Thiempu awmbel
8 Mi themthiem tak kutsuok anga thiemin, thiempu dărbât ang bokin rangkachak zâi le pat zâi dum pawl, sen duk le sen lâr le puon zâi inhmi le thlŭr kopin awmbel an siem a. 9 Awmbel chu a dung le khang centimeter sawmhni le pahni ve ve, thlep thuo phaa kil li nei a nih. 10 Chu taka chun lungmantam tlar li an zep a. A tlar hmasa taka chun rubi, topaz le beril lung a um a; 11 a tlar hninaah torkuis, safir le emeral lung a um a; 12 a tlar thumnaah jasin, agate le amethi lung a um a; 13 a tlar linaa chun krisoli, onik le jaspi lung a um. Chu lunghai chu rangkachakah an phŭm de a. 14 Lung po chu sawmpahni a na, lung tina chun Israel thlahai hming an ker seng a, lung tin chu Israel hnam sawmpahnihai suoi namna lung ang a nih.
15 Awmbela ding chun rangkachak hlîr zai, her thlop chu an hruol a. 16 Lungmantam phŭmna rangkachak khuor pahni le rangkachak naval pahni an siem chu awmbel kil chung tieng chun an inbùk vé vè a. 17 Rangkachak khaidiet her thlop chu awmbel sir ve vea rangkachak kuol pahnia chun an thlung a. 18 A hmor khing tieng chu lungmantam phŭmna rangkachak khuor pahni le chun an thlung zom a; awmbel thlungna chu efod darbak hma tienga thlung a nih. 19 Rangkachak naval dang pahnih an siem bok a, awmbel ki hnuoi tieng, a sûng tieng, efod depah an inbûk a. 20 Rangkachak naval dang pahnih an siem bok a, chuonghai chu efod darbak bul tieng inbelna laia kawnghrèn chungah an inbŭk a. 21 Mosie kuoma LALPA hril ang takin, awmbel chu inphaw hâwk loa kawnghrèn chunga a kop thlap theina dingin, awmbela rangkachak naval le efod-a rangkachak naval chu pat dum pawlin an sui mat a.
Thiempuhai inchei dan dang dang
22 Efod hnuoia hàk ding korfuol an siem chu puon khawng thiemhaiin a dumpawl hlaka an khawng a nih. 23 A lai taka chun lu thunna ding an chep ăwng a, a rei inek nawna dingin an kîm vong 24 Zakaw fuol hmor tlànga chun pat zai dum pawl, sen duk le sen lâr hmanga siem theibufai lim a vêl tuokin an bel a. 25 Rangkachak hlîrin telnêng an siem a, theibufai lim le rangkachak telnênghai chu inkârthlâkin an khăi a. 26 Chu thuom, a hmor tlanga telnêng le theibufai lim inkârthlăka khai chu Mosie kuoma LALPA thupĕk anga biekbuka rongbawlnaa hàk dinga siem a nih.
27 Puonkhawng thiem ruoia pat zai inhmia inthoka an inkhawngtir puon hmangin Aron le a nauhai ta ding korfuol dam, 28 lukawm dam, dierkhim dam le kekor hnuoi dam an thrui a. 29 Mosie kuoma LALPA hril ang takin, thil thrui thiemhaiin pat zai inhmi a dum pawl, sen duk le sen lâr thlùr kopa an khawng chun mawi takin cheizema an siem bok a.
30 Lukhum thienghlima dingin rangkachak hlîrin rangkachak phêk an siem a, chu taka chun suoi namnaa an ker ang elin, LALPA PUOL tiin an ker a. 31 LALPAN Mosie kuoma a hril ang takin thiempu lukhum hma tieng chun pat hruol dumpawlin an khit de a.
32 Chuongchun, Intuokna Puon in biekbuk bawlna ding sin po po chu zo fel a lo ni ta a. LALPAN Mosie kuoma thu a pĕk ang charin Israelhai chun an thaw a. 33 Chu zoah biekbŭk ding chu Mosie kuomah an hung tol a: puon in le a hmangruo po po, a cheina hmangruo hai, a chep nghetna hai, a bang phĕk hai, a bangrù hai, a ban hai, a ban thrut hai; 34 a chung khum ding beramchal vun, rong sena an nam hai, tui bawng vun hai, daidanna puonzar hai; 35 Thuthlung Bawm le a zawnfung hai le zangaina thrungpha hai; 36 dawkan le a hmangruo po po le hlanbei hai; 37 rangkachak hlîra siem khawnvar siena le khawnvar sie tlar ding hai le a hmangruohai, khawnvar tuia hmang ding hriek hai; 38 rangkachak maichăm hai, hriek nàla hmang ding hriek rimtui hai, rimtui raw ding hai, puon in lŭtna kota zar ding puonzâr hai; 39 dâr maicham le dâr lên inphan hai, a zawnfung hai, dâra siem bûr le bêl hai, maihŭn le a thrut hai; 40 biekbŭk tuolzawla zar ding puonzâr hai, a ban le thrut hai, tuolpûk lŭtna kota zar ding puonzâr hai, tuolpûka puonzâr keina hrui le a kildèna hai, biekbŭk cheina hmangruo po po hai; 41 hmun thienghlima rongbawlna ding silfen mawi taka khawng hai, thiempu Aron le a naupahaiin thiempu rong an bawl huna an hàk ding silfen thienghlim hai dàm a nih.