7 Biekbuk chung inkhumna dingin kĕl hmulin puonzâr thlè sawmpakhat siem rawh. 8 Puonzâr chu a dung sei tieng meter sawmpathum le a khang tieng meter hni seng ning a ta, an intiet vong ding a nih. 9 Puonzâr panga chu a dung zawngin phêk khata dingin thrui zom la, puonzâr paruk chu phêk danga dingin thrui zom bok rawh. Puon in kot tieng chun puonzâr paruk thrui zom chu zar la, a sîr tak chu thlep rawh. 10 Puonzâr pakhat hmor tieng tlànga chun a naval sawmnga siem la, chuong ang bokin puonzâr danga chun siem bok rawh. 11 Dârin thir kom sawmnga siem la, chu chun bât ton la, biekbŭk chung zar chu thlè khat hung ning a tih. 12 A chung inkhumnaa hmang bâng puonzâr chenve chu biekbuk chawr tieng inkhai thla raw se. 13 Puonzâr centimeter sawmnga la chuong ve ve chu biekbuk bang khing tieng khing tieng inkhumna dingin inkhâi thla raw se. 14 Beramchal vun, rong sena nam chun puon in chung chu inkhum i ta, chu chunga chun tui bawng vunin i la’n khum nawk ding a nih.

15 “Biekbŭk banga hmang ding sitim thing phĕk tlûn tak rem khawm rawh. 16 Phêk tin chu a dung meter lia insang le a khang centimeter sawmruk le paruk a ni ding a nih. 17 Phêk tin chu phêk dang leh phûi taka an inman nghet theina dingin phêk tinah mantu pahnih i siem vong ding a nih. A bang phêk dang po po chu chuong ang vonga siem ding a nih. 18 Biekbŭk sim songa dingin bang phèk sawmhni siem la, 19 a mong phaa hmang ding tangkaruo phêk sawmli siem bok la, bang phêk khat pei chu a mongpha pahni peiah innghat a tih. 20 Biekbŭk hmar songa ding khomin phêk sawmhni siem la, 21 a mong phaa hmang ding tangkaruo phek sawmli siem bok la, bang phek khat pei chu a mong pha pahni peiah innghat atih. 22 Biekbŭk thlang tieng châwra dingin phêk ruk siem la, 23 phêk hni chu a kila thrang ding a nih. 24 A kila phêk hni hi a thruta inthoka a lêr chen kil zom thlap ding a nih. 25 Chuong ang chun phêk riet um a ta, tangkaruoa siem a mongpha sawmparuk um bok a ta, a mong pha pahni pei chu bang phĕk pakhat peia hmang ding a nih.

26 “Chun, sitim thingtluonin bangru ding sawmpanga siem la, biekbŭk bang khing tienga bang phĕk rem tlara chun bangru panga bel la, 27 a khing tienga khom panga bel bok la, biekbŭk chăwr thlang tienga bang rem tlara chun panga bel bok rawh. 28 A bangru lailung taka mi, bang chenvea insanga bel chun biekbŭk chu a vêl tuokin a man khawm ding a nih. 29 Bang phĕk po po chu rangkachakin inluon khum vong la, a bangru man khawmna dingin rangkachak naval siem la, a bangru po po chu rangkachak inluon rawh. 30 Tlânga a ruongâm ka’n entir che ang charin biekbŭk chu i bawl ding a nih.

31 “Biekbŭk sŭng pindana zar ding chu patzai inhmi thlŭr kop, a dum pawl, a sen duk le sen lâr inpola khawng, puon khawng thiemhaiin cherub lim thiem taka an zep chei a ni ding a nih. 32 Sitim thing ban pali, rangkachaka inluon le tangkaruo phêk pali thruta phuna chun rangkachak navalah puonzar chu khâiin i zar ding a nih. 33 Puonzâr chu i zar zo pha leh Thuthlung Bâwm chu a sûng tieng sie lût la, puonzâr chun Hmun Thienghlim le Hmun Thienghlim Tak chu a daidan ding a nih. 34 Hmun Thienghlim Taka chun Thuthlung Bawm le a sǐntu Zangaina Thrungpha chu sie rawh. 35 Puonzâr puo tienga dawkan kha hmar tieng sie la, khawnvar innghatna kha sim tieng sie rawh.

36 “Biekbŭk lŭtna kotkhăra zar ding chu patzai inhmi thlŭr kop, a dum pawl, a sen duk le a sen lâr inpola khăwng, puon khâwng thiemhai kutsuok a ni ding a nih. 37 Puonzâr khaina dingin sitim thing bàn panga, rangkachaka inluon vong chu phun la, puonzâr chu rangkachak navala chun khâi rawh. Ban panga thruta hmang ding dâr phêk panga sung bok rawh.