Biekbŭk ta dinga thilhlân
25
1 LALPA chun Mosie chu a biek a, 2 “Israelhai kuomah hril la, ka kuomah thilhlân hung chawi raw hai se. Lungrila an phal ang ang thilpêk an hung chawihai chu ka ta dingin i lo lăk khawm ding a nih. 3 Thilpêk i lăk khawm dinghai chu hienghai hi ning a tih: rangkachak dam, tangkaruo dam le dâr dam; 4 patzai dum pawl, sen duk le sen lâr dam, puon zai inhmi dam, kèl hmul dam, 5 beramchal vun, rong sena nam dam, tui bawnga vun dam, sitimb thing dam, 6 khawnvara sit ding oliv hriek dam, hriek năl phaa pol chi mawsawla dam le rimtui raw ding dam, 7 efod le awmbela bel ding onik lung le lunghlu dang dang hai chu an nih. 8 Chun, anni laia ka chĕng ve theina dingin in thienghlim mi bawlpêk rawh. 9 A ruongăm ka’n entir tah chê ang khan biekbŭk chu bâwlin a sûnga hmangruo ding po po khom i siem ding a nih.Thuthlung Bawm
10 “Chun, sitim thingin bâwm insiemtir la, a dung chu centimeter za le sawmpakhat, a khang chu centimeter sawmruk le paruk le a’n sang tieng chu centimeter sawmruk le paruk a ni ding a nih. 11 A sûng le puo tieng rangkachak hlîr hlakin inluon khum vong la, a tlâng po po chu rangkachakin i kâwm bok ding a nih. 12 Rangkachak kuol pali siem la, a ke thrutah khing tieng pahnih, a dang tieng pahnih, inbûk rawh. 13 Sitim thingtluonin zawnfung siem la, chu chu rangkachak tuiin inluon rawh. 14 Zawnfunghai chu bawm zawnna dingin rangkachak kuola chun a khing a khingin rol lŭt vé vè rawh. 15 Rangkachak kuola zawnfung i rol lŭt chu um zing a ta, lak suok ta lo ding a nih. 16 Bawm sŭnga chun Thuthlung ka la pèk ding che chu i sie ding a nih.
Zàngaina thrungpha le cherubhai
17 “Rangkachak hlîr hlakin zangaina thrungpha, a dung centimeter za le sawm, a khang centimeter sawmruk le paruka lien i siem ding a nih. 18 Chun, zangaina thrungpha sǐn hmor intona inthrut ding, rangkachak cherub lim, a suta sut le ser ngei, i siem ding a nih. 19 A sǐn hmor khing ve ve-ah rangkachak cherub lim sie ve ve la, a sǐn le cherub lim chu rangkachak sakhata ser an ni ding a nih. 20 Cherubhai chu inhmatonin zangaina thrungpha tieng ngha’ng an ta, an thlain zangaina thrungpha chu zăr khum an tih. 21 Bawm sunga chun Thuthlung lungphĕk pahni ka la pĕk ding che chu sie la, a sǐn chun inkhum rawh. 22 Chu taka chun intuokpui hlak ka ti che a, thuthlung bawm chunga cherub pahni inkâra zangaina thrungphaa inthok chun Israel mihai kuoma thu ka pĕk ding taphot chu pe hlak ka ti che.
Bei siena dawkan
23 “Sitim thingin dawkan siem la, a dung chu centimeter sawmriet le pariet, a khang chu centimeter sawmli le pali le a’n sangzie chu centimeter sawmruk le paruk a ni ding a nih. 24 Chu chu rangkachak hlîr hlakin inluon khum vong la, a tlâng chu rangkachakin kăwm rawh. 25 Milimeter sawmsari panga tieta lienin a kawm siem i ta, chu chu rangkachakin i kawm ding a nih. 26 Rangkachak kuol pali siem la, chuonghai chu dawkan ke pali kil tina chun inbûk rawh. 27 A zawnfung rol lutna dingin rangkachak kuolhai chu dawkan kawm sîra inbûk ding a nih. 28 Sitim thingtluonin dawkan zawnna ding zawnfung siem la, rangkachak inluon khum rawh. 29 Chu taka ding chun rangkachak hlîra siem thlĕng dam, no dam, uoiin thilhlân bun thlâkna ding no tung le maihŭn dam i sie ding a nih. 30 Dawkan chunga chun ieng lai khomin ka hmaah hlànbeic i sie rop ding a nih.
Khawnvar siena
31 “Rangkachak hlîr hlakin khawnvar siena i siem ding a nih. A ngul le a thrut pawng chu a sera ser ding a na, a lu bâwka par kumùm le a par vul lai limhai le chun ser inzom vong ding a nih. 32 A ngula inthok chun kâu ruk, sîr khatah kâu thum, sir khing tieng kâu thum bok, a pêng suok ding a nih. 33 A kâuzâr tinah ruon par kûmŭm lai le a pàr lai lim pathum pei um a ta, a kâu dota chun chuong ang bok chu um a tih. Chuong ang chun khawnvar siena kâu pêng paruk chu i siem ding a nih. 34 Khawnvar siena ngul zidinga chun a cheimawina ruon kûmŭm le a pàr vul lai lim pali a um ding a nih. 35 A zâr chung le a hnuoi inkărah par kumŭm pakhat pei a um ding a nih. 36 A kumŭm le parhai po po chu a ngul le a thrut păwng leh rangkachak hlîr tlang sakhata inthoka ser zom vong ding a nih. 37 Chu taka sie ding chu khawnvar pasari siem i ta, i sit phâ leh a vêl chu a elvar vong ding a nih. 38 Khawnvar phita chep ruolna le hmangruo danghai khom rangkachak hlîra siem ding a nih. 39 Khawnvar siena le a hmangruo ding po po siemna dingin rangkachak hlîr hlak talend khat i hmang ding a nih. 40 Tlânga a ruongâm kan entir ang chê khan