Innei tekhinnaa hmang
7
1 Unauhai, dan chun mi a dam sung po chauh a chungah thu a nei hlak ti in hriet naw am a nih? Hi hi Dan hrehai hriet ding bika ka hril a nih. 2 Entirna dingin, nuhmeiin pasal a nei chun a pasal dam sung po chu inneina danin a pasalah a phuor bet a, a pasal thi hnung ruok chun a pasal lakah chu dan chun a khit ta nawh. 3 A pasal dam sung mi dang a nei chun ‘uire nu’ ti’ng an tih; a pasal a thi hnung ruok chun chu dan phuornaa inthok chun sûtin a um a, mi dang nei sien khom uire ti a ni ta nawh.4 Chuong ang bokin unauhai, Krista taksa peng in ni tah leiin Dan chu in thisan tah a, Pathien ta dinga ra ei insuo theina dingin mi dang, mithi laia inthoka keithoa um ta chu ei ni ta lem. 5 Suol khuop dè mihriem hlui ei la put lai khan chu ei chăkna suol, Danin a chok tho khan, ei taksaah sin a thaw a, ei ra suok chu thǐna a nih. 6 Tu ruok hin chu mi khuop hlaktu chu thisanin, dan khuopnaa inthoka insuoin ei um tah a; chuleiin, Dan thu ziek hlui chu zui ta loin, Thlarau dan thar hnuoiah rong ei bawl tah lem a nih.
Suol sŭngkhum
7 Ieng am hril tâng ei ta? Dan chu suol a ni? Teu lo e! Danin mi hril naw sien chu suol hi hre naw ning. Danin “Inhnar naw” lo ti naw sien chu inhnar hi iem a nih ti hre naw bok ka tih. 8 Sienkhom, suol chun dan thupêk chu remchanga hmangin, inhnarna tinrêng ka sûngah a’n umtir a. Dan um naw sien chu suol hi thil thi el a nih. 9 Kha hma khan Dan thrang loin ka lo hring hlak a; nisienlakhom, dan thupêk a hung um phingleh suolna chu a hung har a, kei chu ka thi a. 10 Hringna dinga dan thupêk chu thǐna ding lem a lo nih ti ka hung hmu suok a. 11 Suolna chun dan thupêk chu remchanga hmangin a mi hlĕm a, thupêk chu hmangin a mi sukhlum tah a nih. 12 Chuong chu a ni leiin, Dan chu a thienghlim a, thupêk khom a thienghlim a, a fel a, a thra a nih.
13 Anleh, thil thra chu ka ta dingin thǐna intluntu a lo ni maw? Teu lo e! Suolna chu ka ta dingin thǐna a hung ni ta lem a nih: suol chu suol a nih ti a’n lang theina dingin thil thra chu hmangin a mi sukhlum a, chu dan thupêk chun suolin taluo a nei nawzie a hung suklang tah a nih.
Mihriema mi pahni chu
14 Dan chu thlarau tieng thil a nih ti ei hriet; kei ruok chu taksaa um, suol bawia zor hmang tahnung ka nih. 15 Ka khawsak dan hi a ngaina tak khom ka hriet nawh. Ka thaw nuom zawng thaw loin, ka theida zawng ka thaw lem hlak. 16 Ka thaw nuom naw zawng ka thaw hin dan chu thra ka tipui tǐna a nih. 17 Tuta ka ngirhmun chu, thil ka thawhai hi keima thaw ni loin, keimaa chêng suol chun a thaw lem a nih. 18 Suol kop keima mihriema hin thil thra hrim a chêng nawh ti ka hriet; thil thra thaw nuomna nei lang khom ka phur suok zo si nawh. 19 Thil thra ka thaw nuom chu thaw loin ka thaw nuom naw thil suol chu ka thaw lem si. 20 Ka nuom naw zawng ka thaw si chun, a thawtu chu kei ni loin, keimaa chêng suol chu a ni lem.
21 Chuongchun, hieng hi thil um dan a nih ti ka hung hriet suok tah: thil thra thaw ka nuoma chu suolin a mi chĕng chil zing si. 22 Ka lungril sungril tak chun Pathien dan a lawm a; 23 sienkhom ka taksaa sinthaw, ka lungril thra tizawng dan dotu chu a um ti ka hmu a, chu ka taksa bunghaia sinthaw hlak suol dan chun salah a mi siem hlak a nih.