Tlawmna chunga beidongna
Kora pawlhai hla var.
A thluk: maskil
44
1 Aw Pathien, tiena tlâng a’nthok,Pipuhai chunga i thilthaw,
An mi hril hlak leiin kan hriet.
2 I kuta hnam dang hnot suokin,
An hmunah anni i phun a;
Hnam danghai chu i tukdol a,
Pipuhai i phun nghet thung a.
3 Kawlhnâmin ram an lăk naw a,
Ralthuom leiin an hnê bok nawh;
I kut hrăt chang tieng chu phar a,
I hmêl êng chu inhmutir a,
I ditsak tawl ĕm lei a nih.
4 Nang chu Pathien, ka lal i na,
Nang ngei i nih Jakob mihai
Kuoma hnèna thu tiemtu chu.
5 Nangma zarin hmêlmahai chu,
Kan hnot zăm a, kan hnaw tom a.
I hming leiin mi dotuhai,
Kèin kan sir hriel neng hlak si.
6 Ka thalngulah kan hnèm naw a,
Kawlhnâmin a mi san him nawh.
7 Ka hmêlmahai chunga hnèna,
Mi’n changtirtu chu nang i na,
Mi dotu i sukmuolpho hlak.
8 Keinin kan uongpui ni tin chu,
Pathien nang chauh i ni si a;
Kumkhuon i hming inpâk kan tih.
9 Tuhin hnâwlin i mi suktlàwm,
Kan sipai ruol lai hin nang chu,
Thrang khom i thrang nuom ta si nawh.
10 Mi dotuhai hmaah nangin,
I mi’n tlansiettir dur dur a,
Hmêlmahan an mi rok ta hi!
11 That ding beram anga ngaiin,
Hnam tin lai i mi sukdar a;
12 I mihai tlawmten i zor a,
An man hlak i sak to nuom nawh.
13 Tuolbâwmhai mi endong hlawin,
Kan vêla chênghai mi diriem,
Nuizat bûr kan lo chang hiel tah.
14 Hnam danghai fiem pawlawt hlàwin,
An lu an mi thin khum hlak a.
15 Nî tin muolphoin kan um a,
Kan hmăi a mâwk zing zing a nih:
16 Diriema mi haltuhai răwl,
Kan chunga phuba la tumtu,
Hmêlmahai mi vauna leiin.
17 Hieng hi kan chungah tlung sien khom,
Nang kan theinghil ngai naw che a,
I thuthlung kan bawsiet ngai nawh.
18 I lakah kan lunghnŭr naw a,
I lampui kan pĕtsan ngai nawh.
19 Nang ruok chun mi sir sop nengin,
Sihalhai lăwmah mi siemin,
Thim să takin i mi’n khum si.
20 Kan Pathien hming chu theinghil a,
Hnam dang pathien bie kan ni chun,
21 Lungril hretu nang Pathien chun,
I hmu tlang vong naw dim a ni?
22 Nangma leiin ni tin elin,
Thǐna ko tlângah kan ngǐr a;
That ding beram ang hiela ngài,
Kan lo ni tawl vong ta si a.
23 Lalpa, tho rawh, iem i zâl zing?
Meng harin, hung tho suok hrăm la,
Kumkhuon mi pei thla tawl naw rawh.
24 Ieng leia i hmêl i thup am?
Soisakna kan tuor inrimzie,
I mi theinghilpĕk am an ta?
25 Pilvut sikin kan kûn zing a,
Hnuoiah kan bok phêk zing a nih.
26 Mi thrangpui di’n hung tho suok la,
I hmangaina chuoi lo zârin,
Mi hung intlansuok tawl hrăm rawh.