Judahai kuoma Paula thu hril
22
1 “Unauhai le pahai, tuta in kuoma ka thiemna thu ka hril ding hi ngaithla ro” a ta. 2 Aramik trongin a hril an hriet chun an to nawkzuol a. 3 Ama chun, “Juda mi, Kiliki ram Tarsa khuoa pieng ka na, amiruokchu, hi khawpuia seilien ka nih. Gamaliel zirtirna hnuoiah ei thlatuhai Dan a ngiel a ngana inchûk ta le voisuna nangni ang boka Pathien ta dinga a kûl a tâia thrahnem ngâi ve hlak ka ni a. 4 Hi Lampui mihai hi sukhlum hiel khopa sukdùdàtu ka ni a, a nuhmei a pasalin ka man khawm a, lung inah ka’n khumtir hlak a. 5 Thiempu lal le Kansila membar po pohai hi chu thu mi hrepuituhai chu an nih. An kuoma inthokin Damaskaa unauhai pĕk ding lekha ka lâk a, chu taka umhai chu khuop a, hrem dinga Jerusalema hung thruoi dingin ka’n thok suok a.6 “Chuonga ka fe chu, Damaska ka tlung tawm, sŭn chang lai hin vana inthokin var nasa takin ka vêlin a hung khaw a. 7 Hnuoiah ka tla thla a, rawl ka hriet a, ka kuomah, ‘Saula, Saula, nangin ieng dinga i mi sukdùdà am a na?’ a mi ti a. 8 Kei chun, ‘Lalpa, tu am i na?’ ka ta. Ama chun, ‘Nazaret Isu, i sukdùdà hi ka nih’ a ta. 9 Ka ruolhai chun var chu an hmu vea chu mi betu rawl ruok chu an hriet nawh. 10 Chun, keiin, ‘Lalpa, ieng am thawng ka ta?’ ka ta. Lalpa chun, ‘Tho la, Damaska khuoah lût la, chu taka chun thil iengkim i thaw dinga ruothai chu hril an ti che’ a ta. 11 Chu var ropui tak lei chun khuo hrim ka hmu thei ta naw a, ka ruolhaiin an mi keibăt a, Damaska ka lût a. 12 Mi pakhat Anania, Dan ang taka Pathien be hlak mi le chu khuoa um Judahai po poin an inzà le ngaisang mi chu ka kuomah a hung a. 13 Ka bulah a hung ngir a, ‘Unau Saula, i mit hung var ta raw se’ a ta. Chu phing leh ama chu ka hmu thei ta nghal a.
14 “Ama chun, ‘Ei thlatuhai Pathienin ama ditzawng hretu Mi Feltak a hmu a, chu rawl ngei chu hre dingin a thlang ta che. 15 I thil hmu le hriet thua khan mi po po hmaa a thu hrepuitu ning i tih. 16 Tu hin ieng dinga i la muongchang? Tho la, a hming lamin baptisma chang la, i suolhai sawp fai rawh’ a mi ti a.
17 “Chun, Jerusalemah ka kir nawk a, tempula ka trongtrai laiin zêlin ka um a. 18 Lalpa ka hmu a, ama chun, ‘Inhmaw la, Jerusalem hi suoksan rawh; ka chanchin i hril hi pom chuong naw ni hai’ tiin a mi hril a. 19 Kei chun, ‘Lalpa, sunagog tinah lut a, nangma ringtuhai vaw a, lung ina inkhumtir hlaktu kha ka nizie anni ngeiin an hriet si a. 20 I thu hretu Stefan thisen an insuo lai khan anni lai ka ngir a, ka remtipui a, a thattuhai puon lo vengpektu khom ka ni kha’ ka ta. 21 Ama chun, ‘Fe el rawh, hla takah Jentelhai kuomah ka tir ding che a nih’ a mi ti a” a ta.
22 Chu thu a hril chen chun an ngaithlak a, inring takin, “Hieng ang mi hrep hi, hnuoia inthoka sie hre dai ding a nih, dam tlâk a ni nawh” tiin an khèk a, 23 an khèk ruol chun an silpuonhai an hawk a, pilvut an vàn vawr a. 24 Kawmandar chun Paula chu kulbingah a’n thruoi luttir a, a chunga chuong ang khopa an khĕkna san chu a hmu suok theina dingin vuokna hruola vaw a, dawp suok dingin thu a pêk a. 25 Vaw dinga savun hrui an phier zoin Paulan a kawla ngir sipai zahotu kuomah, “Roman lalram khuo le tui, thiem naw inchangtir khom ni si loa vuok a thieng am a ni?” a ta. 26 Sipai zahotuin chu chu a hrietin kawmandar kuomah a fe a, “Ieng tin am i thaw ding a na? Hi mi hi Roman khuo le tui a lo ni zing el!” a ta. 27 Kawmandar chu a hung a, “Roman khuo le tui i ni maw? Mi hril rawh” a ta. Ama chun, “Ni e” a ta. 28 Kawmandar chun, “Kei chun Roman khuo le tui nina ding hin sum tam tak ka sĕng a nih” a ta. Paula ruok chun, “Kei chu Roman khuo le tui hrima pieng ka nih” a ta. 29 Chuongchun, soisa a, thû dawp suoktu dinghai chun ama chu an maksan a, kawmandar khomin Roman khuo le tui a lo khuop ti a hriet chun a tri thâwng hle a.
30 A zinga chun Judahan Paula chungah thupoi ieng ieng am an nei ti hriet chiengna dingin thiempu lalhai le Sanhedrinhai chu inkhawm dingin thu a pêk a. Paula chu an sŭt a, a thruoi suok a, an hmaah a’n ngirtir a.